Luku 24
24
1Sombi pakasuŵa kakutatika umuluŋgu, kucinyamaca, ŵaliisile kucilende, ukuleta ifinuncile bwino ifyo ifi ŵacitile. 2Peŋka ŵalisanjile ati icibwe caalamuka-ko kucilende; 3naŵo ŵaliinjile-mo, sombi taŵaubwene-po umuŵili waŵaSikulu Yesu. 4Lomba ili ŵalukukaŋkamana ifyafyefyo, paliŵele ati aŵantu ŵaŵili awafwite ifisasamucile ŵaliiminine pali ŵo. 5Peŋka pakususwa nekwinamisya pansi, ŵalilaŵile kuli ŵo ati: Mbanindo mulukuwafwaila aŵalaŵi pakati paŵafwile? 6Taŵa-po pano, ŵaŵusiwa! Kamulaŋguluke'fyo ifi ŵalaŵile kuli mweŵo ili ŵacili muGalili, 7ati, Ukumwelelwa Umwana waMuntunsi ukuloŵelwa kuminwe yaŵantu aŵakuŵifya, nekutalikwa, nekuŵuka liŵili pansiku yaŵusitatu. 8Naŵo walilaŋgulucile amasiwi aŵo; 9nekubwela kucilende, nekuŵaŵule'fyo fyonse aŵo ikumi naumo, naŵambi ŵonse. 10Aŵo-ŵanakasi, umbi niMaliya uwakuMagadala, umbi nijoana, umbi niMaliya ŵanyina Jakobo, pamo neŵanakasi ŵambi, eŵasiŵulile intanjisi ifyo-fintu. 11Nemasiwi ayo aliumfwanicile pamenso aŵo ati alukoso; naŵo taŵaacetekele. 12Sombi Petilo aliimine, nekuŵutucila kucilende; peŋka ili ainamisye nekuliŋgamisya-mo mukati, alibwene iŋguwo sili syeŋka: lomba alikumbulucile ukulukuya kwaŵo, nekulukukaŋkamana pakuti pali fyefyo ifyacitilwe.
13Lomba akasuŵa ako kopele ŵambi ŵawili aŵapali ŵo ŵalukuya kumusi umbi uilicilwe ati niEmau, umusinso pakufuma kuJelusalemi ukwesya amasitalyo amakumi asanu nalimo. 14Peŋka ŵalukwambala ifyafyefyo fyonse ifyacitilwe. 15Lomba, ili ŵalukwambala, nekwipusyansyanya, paliŵele ati ŵaYesu aŵene ŵalipalamine nekwenda naŵo. 16Sombi pamenso aŵo palikenwe ati ŵeŋgesa-kuŵesiŵa. 17Naŵo ŵalilaŵile kuli ŵo ati: Mbafisa-fyeŵo ifi mulukwambala, pakulukwenda? Naŵo ŵaliimakene, nekulukuŵombomene. 18Peŋka umbi uwailicilwe ati niKleopa, aliŵaasucile ati: Kani mweŵo mweŋka mulukulinsya lukoso mujelusalemi, mweŵakuŵulo' kwisiŵa ifyafyefyo ifyacitilwe mulya sino-nsiku? 19Naŵo nekuŵeŵa ati: Mbafisa-fintu? Naŵo kaŵalaŵila kuli ŵo ati: Ifintu ifyo ifyakuli ŵaYesu aŵakuNasaleti, aŵali ŵakusimika ŵamakosa mumilimo namumasiwi pamenso aŵaLesa napamenso aŵantu ŵonse; 20nefyafyefyo ifi ŵaŵaloŵele aŵapapatilisi aŵakulu nempemba syesu, mukuŵasinina kumfwa, peŋka nekuŵatalika. 21Sombi fweŵo twalukucetekela ati ŵo eŵaŵo aŵakaŵaluŵula aŵaIsilaeli. Icine nakaŵili, lelo kasuŵa kaŵusitatu aka fyawele ifyo-fintu. 22Nakaŵili ŵambi aŵanakasi aŵamwiŵumba lyesu, watukaŋkamtka, aŵacelele ukuya kucilende; 23peŋka, pakuwulo'kusaŋga umuŵili waŵo, ŵali ŵaisa nekulaŵila ati: Twaŵona nekuŵoneka kŵaŋkalamba isyalaŵila ati: Ŵalukulaŵa! 24Eli ŵaile kucilende ŵambi naŵo, aŵali nafweŵo, nekufiŵone'fyo fyopele ifi ŵalaŵila aŵanakasi; sombi ŵo taŵaŵabwene-po. 25Naŵo ŵalilaŵile kuli ŵo ati: Mweŵatumpile, mwemulukukokola mumitima yenu ukucetekela muli fyefyo fyonse ifi ŵalaŵile aŵakusimika! 26Kansi tafyaliŵelelwe ŵaKlistu ukusomenwa kufintu ifyo nekwinjila muŵuleme bwaŵo? 27Lomba ukutatika kuli Mose nakuŵakusimika ŵonse, ŵaliŵaŵulisisye mumalembo onse ifyo-fintu ifyakuli ŵo aŵene.
28Eli ŵapalamine nakumusi, uko ŵalukuya, naŵo ŵaYesu ŵalibwenekele koti ŵalukuya kuntanjile. 29Naŵo ŵaliŵakakatisye, nekulaŵila ati: Mwikale nafweŵo; pakuti iciŋgulo capalamina nekasuŵa nako kalukuwa. Naŵo ŵaliinjile mukwikala naŵo. 30Lomba ili ŵasamine naŵo ukulukulya, ŵaliŵulile siŋkwa, nekucindika, nekumukumala nekuŵapela. 31Peŋka nemenso aŵo nekusiŵuka, naŵo ŵaliŵesiŵile; sombi ŵalisimine pamenso aŵo. 32Lomba naŵo nekulaŵilana ati: Kansi imitima yesu tayalukupya muli fweŵo, ili ŵalukwambala nafweŵo munsila, nekulukutuŵulisisya amalembo. 33Naŵo ŵaliimine iyompindi yopele, nekubwelela kujelusalemi, nekuŵaŵona aŵo ikumi naumo ŵaliwuŋgene, pamo naŵaŵo aŵo ŵali naŵo, 34aŵalukulaŵila ati: ŴaSikulu ŵaŵuka icinenene, nekulibwenesya kuli Simoni. 35Eli ŵaŵaŵulile ifyafintu ifyo ifyamunsila, nefyafyefyo ifi ŵaisiŵilwe kuli ŵo pakukumala siŋkwa.
36Ili ŵacilaŵile'fyo, ŵaYesu aŵene ŵaliimakene pakati pali ŵo, nekulaŵila kuli ŵo ati: Uŵutende bwikale nenu! 37Sombi naŵo ŵalisusilwe nekutina, nekulukweŵa ati tulukuŵono'mupasi. 38Naŵo ŵalilaŵile kuli ŵo ati: Mbanindo mulukulikutwila? Pakuti pando kwaŵucila ukwipusya mumitima yenu? 39Ŵoneni amapi anji, nemakasa anji, ati nineŵo nemwine: ŋgamunsalale muŵone; pakuti umupasi taukwete umunefu nemafupa, koti nififi ifi mulukuŵona ati ndi nafyo. 40Ili ŵalaŵile'fyo, ŵaliŵalanjisye amapi aŵo nemakasa. 41Lomba ili ŵacikanika pakuti pakutemwa, nekulukukaŋkamana, ŵalilaŵile kuli ŵo ati: Muli-po nekakulya muno? 42Peŋka ŵaliŵapele icisinsa cesaŵi icakoca. 43Naŵo ŵaliciŵulile nekulukulya pamenso aŵo.
44Eli ŵalaŵile kuli ŵo ati: Aya masiwi anji, analaŵile kuli mweŵo, ili ncili nenu, ati ukwelelwa ati ifintu fyonse fikonsiwe, ifilembelwe mumafunde akwe Mose namuŵakusimika namuMasamo, ifyakuli neŵo. 45Peŋka ŵaliiswile-mo mumitima yaŵo ati ŵesiŵe bwino amalembo; 46naŵo ŵalilaŵile kuli ŵo ati: Palilembelwe ifyakuŵe'fi ati ukuŵelelwa ŵaKlistu ati ŵasomenwe, ŵaŵuke-po pakati kaŵafwile pansiku yaŵusitatu; 47nakaŵili ati, ifyakulapila nefyakufitulucilwa kwaŵumbifi fikaŵulisisiwe mwisina lyaŵo kuŵantu aŵamisyoŵo yonse, ukutatika kuJelusalemi. 48Mweŵo muli nimboni syafintu ifi. 49Peŋka ŵoneni, ŋkatuma ukulaya kwaŵaTata pali mweŵo; sombi mwakulukupembelela mumusi ili tamuŋgafwikwa nemakosa akufuma kwiulu.
50Lomba ŵaliŵatanjilile ukufika uko ukusiŋkamene naBetania: naŵo ŵalisuntwile nemaŵoko, nekulukuŵasyucisya. 51Lomba, pakulukuŵasyucisya, ŵalilekene naŵo, nekupintwa kwiulu. 52Naŵo ŵaliŵalambile, nekubwelela kuJelusalemi nekutemwa ukukulu; 53nekulukwikele mwitempuli, ili ŵaŵalemya ŵaLesa.
Currently Selected:
Luku 24: AAL59
Highlight
Share
Copy
Want to have your highlights saved across all your devices? Sign up or sign in
Lamba Bible Version © United Bible Societies, 1959.