Ifyakufuma 23
23
1Tesi usumine iceŵo icakuŵepa; neli kusuminansyanya nembifi ukwikala nimboni isendeme. 2Tesi ulonde iŵumba lyaŵantu mukulukucite'fyakuŵifya; neli kulaŵila paceŵo ukwakulilondelela iŵumba lyaŵantu mukusendeko'kusololola. 3Kaŵili tesi umucitile ifyamusalululo umukaŵi pamulandu wakwe.
4Kani usaŋgane iŋombe yamupate woŵe kani nimboŋgolo yakwe ilukupasuka, icine wakumubwesesya yo. 5Kani uŵone imboŋgolo yawoyo ukufitilwa ilele itwicilwe icipinto caiyo, naŋgawa ati wati ukane ukumofwa-ko, icine wakumofwa-ko nayo.
6Tesi usendeke ukusololola kwaupeŋgele woŵe pamulandu wakwe. 7Ulukwikele apatali napaceŵo icakuŵepa; kaŵili tekuŵepaya aŵakuŵule'milandu newaluŋgeme. 8Tesi upoke isiŋkakanwa; pakuti isiŋkakanwa lilapofola aŵo aŵali nemenso, nekusendeka amasiwi aŵaluŋgeme; pakuti tesi ndunjike imbifi. 9Kaŵili umwensu tesi umupensye; pakuti mweŵo mwense muli wisi umutima wabwensu, pakuti mwali ŵensu mucalo caIjipiti.
10Kaŵili imyaka isanu naumo ukalukuŵyala mwiŵala lyoŵe, nekulukuloŋgela ifyakufula fyaliko; 11sombi pamwaka waŵuisanu naiŵili ukalileke, likatusye, likalale; ati ŋgawakalye aŵapeŋgele aŵapaŵantu ŵoŵe; kaŵili ifyo ifi ŵakasya-po efyo sikalukulya inama isyamumpaŋga. Koti nifyopele'fyo ukalukucita neŵala lyoŵe lyamifaina nelyamaolife.
12Insiku sisanu nakamo wakulukucite'milimo yoŵe, lomba pakasuŵa kansiku sisanu nasiŵili ukatusye, ati ŋgasikatusye iŋombe yoŵe nemboŋgolo yoŵe, kaŵili nemwana wamusyakasi woŵe pamo nemwensu ati ŋgaŵakakatuluke.
13Kaŵili kamukuticila pafintu fyonse'fyo ifi namuŵuleni; tekweŵa amasina aŵalesa ŵambi, neli ku sumina ati omfwanicile mukanwa koŵe.
14Impindi sitatu pamwaka ukalukundamina icitenje. 15Ukalukulame'citenje cafimpwampwa ifyakuŵulo'musuŋga: insiku sisanu nasiŵili ukalukulya ifimpwampwa ifyakuwulo'musuŋga, koti nifyopele'fyo ifi nakuŵulile, pampindi iyansicilwe pamwensi waAbibi (pakuti nipali wo epo wafumine mucalo caIjipiti); kaŵili tapakalukuli uwakuŵoneka pamenso anji minwe lukoso; 16kaŵili necitenje cakuteŵula, ifyamutulu ifyamilimo yoŵe, ifyo uŵyala mwiŵala; nakaŵili necitenje cakuloŋgela, pakusilo'mwaka, pakuloŋgela ifyamilimo yoŵe ukufifumya mwiŵala. 17Impindi sitatu pamwaka aŵalalume ŵoŵe ŵonse wakalukuŵoneka pamenso a ŵa Yawe Lesa.
18Tesi upose imilopa yamulambu wanji pamo nasiŋkwa uli nemusuŋga: kaŵili amafuta akucitenje canji tekuti asyale uŵusiku ŵonse ukufiko'lucelo.
19Ifyamutulu ifyakutaŋga lukoso ifyapamusili woŵe ukafiinjisye muŋanda yaŵaLesa ŵoŵe. Tesi wipicile umwana wambelele mumandili akwe nyina.
20Wona, ndukutume'ŋkalamba pamenso oŵe, mukukulama pansila nekukufisyo'ko uku ŋkwansicile. 21Kamucenjela kuli yo, mulukukutike'siwi lyaiyo; tekwikalipisya; pakuti tesi ikufitulucile kukupulaisya kwenu, pakuti isina lyanji lili muli yo. 22Sombi kani icine wakulukukutike'siwi lyaiyo, nekulukucite'fyo fyonse ifi ndaŵila; ilyo ŋkalukuli ninekapondo katupondo toŵe, ninemupate waŵapate ŵoŵe. 23Pakuti iŋkalamba yanji ikalukukutanjilila, nekukwinjisya umuli aŵaAmoli neŵa Yeti neŵaPelisi neŵaKanani neŵaYifi neŵaJebusi; lomba ŋkawapinikako. 24Tesi ukenamisisye ŵalesa ŵaŵo, neli kuŵapyunjila, neli kucita koti milimo yaŵo; sombi ukaŵawisye lukoso, ukatoŵale impanda syaŵo. 25Lomba mukalukuŵapyunjila ŵaYawe Lesa wenu, popele ŵo ŵakalukusyucisye'fyakulya fyoŵe nemenda oŵe; kaŵili ŋkafumya pakati pali weŵo ukulwala. 26Mucalo coŵe tamukalukuli uwakupulumusya neli niŋumba; ukupenda kwansiku syoŵe ŋkakukumanisya. 27Ŋkatanjisya pamenso oŵe ukususwa kwanji, nekuŵakatasya aŵantu ŵonse aŵo ukafika-ko; kaŵili ŋkatutatisya kuli weŵo utupondo toŵe tonse, 28Nakaŵili ŋkatanjisya pali weŵo amatembo, aakatamfya aŵaYifi neŵaKanani neŵa Yeti pamenso poŵe. 29Tesi ŋkawatamfye pamenso poŵe pamwako'mo; icalo ciikesa konalwa, lomba nefilwani fiikesa kukufulila. 30Panini panini ŋkaŵatamfya pamenso oŵe, ukufike'mpindi iyo ukafula nekupyane'calo. 31Kaŵili ŋkekaliko'mupaka woŵe ukutatika paCisiŵa leikasicile ukufika nakuCisiŵa caŵaFilisiti, nekutatika napampanta ukufika nakuNika; pakuti ŋkasipela muminwe yenu injikale isyamucalo; popele ukasitamfye pamenso oŵe. 32Tesi ukalayane nasyo neli lulayana konse, neli kulayana naŵalesa ŵasiko. 33Tesi sikalukwikala mucalo coŵe, siikesa kukuleŋgesya ukuŵifya kuli neŵo: pakuti kani ukapyunjile ŵalesa ŵasiko, ifyo fikalukuli fyakukuteya.
Currently Selected:
Ifyakufuma 23: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
