Ifyakufuma 22
22
1Kani umuntu eŵe inembe neli nimbelele, nekwiipaya neli kwiposa mukuula; akafute umulandu waŋombe sisanu pakuti paŋombe imo, newambelele sine pakuti pambelele imo.
2Kani aŵoneke silumfundi alukutowe'nanda, naye apamwe, afwe, lomba tapakalukuli umulandu wamilopa pakuti pali ye, koku. 3Kani kale kaimina pali ye akasuŵa, pakalukuli umulandu wamilopa pakuti pali ye; popele ukubwesya akabwesye; sombi kani taakwete-po neli kantu, lomba ŵakamuule pakuti pakwiŵa kwakwe. 4Kani icintu ici aiŵa ciŵoneke muminwe yakwe cili nemweo, kani niŋombe, kani nimboŋgolo, kani nimbelele; akafute ifyakuŵili.
5Kani asumine umuntu ati liliwe iŵala kani lyamfaina, kani akakulule inama yakwe, nayo kailila mwiŵala lyamuŵyakwe; akabwesye-po ifyafiweme lukoso ifyamwiŵala lyakwe umwine, nefyafiweme lukoso ifyamwiŵala lyakwe ilyamfaina.
6Kani wake umulilo, wambucile kumyuŋga, lomba nekupya imipo yamasaka, neli masaka alukumena, neli liŵala; lombo'yo uwakuncile umulilo icine akabwesye ifyamulandu.
7Kani umuntu apele umuŵyakwe indalama neli fintu fimbi ati undamine, lomba kani fiiŵilwe muŋanda yamuŵyakwe uyo; kani aŵonwe silumfundi, akafute ifyakuŵili. 8Sombi kani tesi akaŵonwe silumfundi, eli akapalamine kuli ŵaLesa umwine wananda mukulapa ati nsiiŵile ifintu fyamuŵyanji. 9Pakuti, pafyeŵo fyonse ifyakwiŵa ukwakutumpaika kani kwaŋombe, kani kwamboŋgolo, kani kwambelele, kani kwafyakufwala, kani kwacintu cimbi icakuluŵako, ifyaceco walaŵilo'muntu ati canji; eli pakese pamenso aŵaLesa iceŵo caŵantu aŵo ŵoŵilo; popele uyo uyu ŵakasinina ŵaLesa, eukafuta kuŵili kumuŵyakwe.
10Kani umuntu apele umuŵyakwe imboŋgolo neli niŋombe neli nimbelele neli ninama imbi ati undamine; lomba nayo nekufwa kani kusomenwa kani kutamfiwa apakuŵulo'kuŵono'muntu; popele pakalukuli pakati pali ŵo icilapo caŵaYawe, 11ati nsiiŵile ifintu fyamuŵyanji; popele umwine wafvefyo akasumine, tesi akabwesye ifyamulandu uyo umbi. 12Sombi kani fyamwiŵilwe, akamubwesesye ifyamulandu umwine wafifyo. 13Kani isansalwe, ŋgaakailete koti niŵumboni; tesi akabwesye ifyamulandu pakuti pali yeyo iyasansalwe.
14Kaŵili kani umuntu aapule icintu kumuŵyakwe, lomba naco nekusomenwa neli kufwa, apakuŵulo'kulukuli-ko umwine waceco, lombo'yo-muntu icine akabwesye icamulandu. 15Kani umwine waceco nekulukuli-ko pamo naco, teti akabwesye icamulandu uyo-muntu; kani cakwapula pakuti pandalama, kale caisile pakuti pakulambulwa kwaciko.
16Kani umuntu amoŋgole umwanakasi umusice uswetele lukoso, utaaŋgaambisiwa, lomba nekulala nakwe, icine akamufutile icupo ati akaŵe mukasi wakwe. 17Kani ŵawisi umwanakasi uyo ŵakaninine ukumupela kuli ye, eli akafute indalama koti cupo caŵanakasi aŵasice aŵaswetele lukoso.
18Tesi ukasumine ati ekale nemweo umwanakasi imfwiti.
19Aŵantu ŵonse, uwakulala nenama, icine akepaiwe.
20Uyo uwakuŵepaile'milambu ŵalesa ŵambi, aŵataŵali niŵaYawe ŵeŋka, akepaililwe lukoso.
21Kaŵili umwensu tesi ukamucite ifyakuŵifya, neli kumupensya; pakuti mweŵene mwali ŵensu mucalo caIjipiti.
22Tesi mukaŵapensye ŵamukamfwilwe neli umo, neli kumupensyo'mwanice ufwililwe ŵawisi. 23Kani ukaŵapensye kani panini, naŵo kani ŵakandilile kani panini, eli ŋkomfwe'cine ukulila kwaŵo; 24nekufitwa kwanji eli kukakalipa, naneŵo eli ŋkamwipayeni kumpoko; popele aŵakasi ŵenu ŵakalukuli niŵamukamfwilwe, neŵana ŵenu naŵo ŵakalukuŵula ŵawisiŵo.
25Kani umwapwisye indalama umbi umuntu wanji upeŋgele uli naweŵo, tesi ukamuŵele koti wakumupindo'mulandu; kaŵili tesi ukamukakatisye ati akulundile-po indalama. 26Kani upoke icakufwala camuŵyoŵe koti kesiŵilo kamulandu, wakumubwesesya ili takaŋgawa akasuŵa; 27pakuti ico cakufimba-po cakwe icili ceŋka, cakufimba-po paŋkanda yakwe; mbaakulala mundo? Popele apo lomba, ili akandilila newo, eli ŋkomfwa, pakuti ndi neluse.
28Tesi uwatoŋgale ŵaLesa, neli kumufiŋga umwikalicisi waŵantu ŵoŵe.
29Tekukokolo'kupose'milambu iyakufula kwafyakulya fyoŵe nekwafyakunwa fyoŵe. Umuŵele uwakutaŋgo' kufyalwa paŵana ŵoŵe aŵalalume ukamupose kuli neŵo. 30Ukacite koti nifyopele'fyo nakuŋombe syoŵe, nakumbelele syoŵe; umwana ukalukwikala nanyina insiku sisanu nasiŵili, popele pakasuŵa akansiku sisanu nasitatu epo ukamupose kuli neŵo.
31Popele mukalukuli ŵantu aŵaswetelele aŵakuli neŵo; pakuti pali fyefyo tesi mukalye kufinani ifyakusansalwa kufilwani mumpaŋga; mukafipose kumbwa.
Currently Selected:
Ifyakufuma 22: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
