Ifyakufuma 21
21
1Lomba amafunde ayo wakwikalika pamenso awo maya:
2Kani umuule kalume umuEbeya, akalukupyuŋga imyake'sanu naumo; popele pamwaka waŵuisanu naiŵili eli akafume lukoso, akalukuli mwanawaŵene. 3Kani enjile eŋka, akafume eŋka: kani aliupile, lomba umukasi wakwe akafume nakwe. 4Kani ŵawisikulu ŵamupele umukasi, naye umukasi wakwe nekumufyalila aŵana aŵalalume neli ŵanakasi; lombo'mukasi uyo pamo neŵana ŵakwe ŵakalukuli ŵaŵawisikulu, naye umwine akafume eŋka. 5Sombi kani kalume Ilyo akalaŵile icine ati: Ndukuŵatemwa wasikulu ŵanji nemukasi wanji neŵana ŵanji, tesi ŋkafume-mo ndi mwana-waŵene; 6popele ŵawisikulu eli ŵakamulete kuli ŵaLesa, nekumufisya kuciŵi neli nikuciti icakumulyaŋgo; lomba ŵawisikulu eli ŵakatiŵule ukutwi kwakwe necakutiŵula-ko; naye akalukuŵapyunjila insiku syonse lukoso.
7Kaŵili kani umuntu amuule umwana wakwe umwanakasi ati aŵe musyakasi, tesi akafume uyo-musyakasi koti nifyefyo ifi ŵafuma ŵakalume. 8Kani taalukuŵatemwesya ŵawisikulu, aŵamwambisye aŵene, eli ŵakasumine ati akaluŵulwe; tesi ŵakaŵe neŵukulu ubwakumuula ukumuposa kuŵantu aŵensu, pakuti kale ŵamutumpaicile. 9Lomba kani ŵamuufye kumwana waŵo umwalalume, eli ŵakamucitile koti mulokasi waŵo. 10Kani ŵakope naumbi umukasi, tesi ŵakacefye ifyakulya fyakwe, neli fyaku fwala fyakwe, neli nifyefyo ifyelelwe umukasi. 11Popele kani tesi ŵakamucitile ifyo fyotatu, eli akafume lukoso uwakuŵulo'kulambula neli kantu.
12Uyo uwakumupamo'muntu ati afwe, icine akepaiwe uyo-muntu. 13Lomba kani umuntu taalukuŵelamina, sombi kani ŵaLesa ŵakamupele muminwe yakwe, ilyo ŋkakusalulwila apakuŵutucila ye. 14Kani umuntu akamwisile umuŵyakwe umumbo, ukumwipaya ukumoŋgola, ukamufumye nakuconto canji ati akafwe. 15Kaŵili uyo uwakuwapama ŵawisi neli niŵanyina, akepaiwe icine.
16Kaŵili uyo uwakwiŵa umuntu nekumuula, neli kuŵoneka ali nakwe muminwe yakwe, uyo akepaiwe icine.
17Kaŵili uyo uwakuwafiŋga ŵawisi neli niŵanyina, akepaiwe icine.
18Kaŵili kani ŵalukulwa aŵantu, lomba umbi nekumupamo'muwyakwe kwibwe neli nikucimfumfu, naye nekuŵulo'kufwa, sombi nekulwalila paŵulo bwakwe, 19kani akaŵuke nekwendaenda ili akontamine pamukombo wakwe, eli fikalyana newamupamine; sombi akamulambule pakuti pampindi iyo alukulwala, kaŵili akamuŵusye icine.
20Kaŵili kani umuntu amupame kalume wakwe neli musyakasi wakwe kundondo, naye kaafwa muminwe yakwe, akaŵe nemulandu icine. 21Naŋgaŵe'fyo kani akulukwikala simbi insiku kalume, lomba wisikulu tesi akaŵe nemulandu; pakuti uyo-kalume nindalama syakwe.
22Kaŵili kani ŵalukulwa aŵantu, lomba nekumusomesyo'mwanakasi uli nepafu, ati apulumusye, sombi nekuŵuloʼkwisa-po nafimbi ifiŵipile; uyo uwamusomesye akaŵe icine nemulandu uwakufute'ndalama, isyo isyakumupinda kumulume wamwanakasi; naye akafute koti kusololola kwawakusololola. 23Sombi kani kukese-po nafimbi ifiŵipile, eli ukafumye umweo pakuti pamweo, 24nelinso pakuti palinso, nelino pakuti palino, nekuwoko pakuti pakuŵoko, nelukasa pakuti palukasa, 25nekoca pakuti pakoca, necilonda pakuti pacilonda, nemukakambo pakuti pamukakambo.
26Popele kani umuntu apame ilinso lyakwe kalume wakwe neli linso lyamusyakasi wakwe, nekuliipailila, eli akamuleke lukoso, akalukuli mwana-wawene pakuti palinso lyakwe. 27Kaŵili kani amusokole ilino kalume wakwe, neli kumusokole'lino umusyakasi wakwe, eli akamuleke lukoso akalukuli mwanawaŵene pakuti palino lyakwe.
28Kaŵili kani inembe isoŋge umwalalume neli mwanakasi ati afwe, iyoŋombe ikepaiwe kumabwe, kaŵili ifinani fyaiyo tesi fikaliwe; sombi umwine waŋombe fikalyana nakwe. 29Sombi kani iŋombe yalukusoŋga-soŋga pampindi iyapitile, nakaŵili kani kale ŵamuŵulile umwine waiyo, sombi ye taalukwiisalila, nayo kaimwipayo'mwalalume neli mwanakasi; lomba iŋombe iyo ikepaiwe kumabwe, nemwine waiyo naye akepaiwe. 30Sombi kani ŵalukumupindo'mulandu wa ndalama, eli akafute mukupulusyo'mweo wakwe fyonse'fyo ifi ŵalukumupinda. 31Naŋgawa ati yasoŋgo'mwana umwalalume, naŋgawa ati yasoŋgo'mwana umwanakasi, fikalukucitwa kuli ye koti lifunde ilyo. 32Kani imusoŋge kalume kani musyakasi iŋombe, umwine waiyo akamupele wisikuluŵo amasyekeli esilifa amakumi ata tu, kaŵili iŋombe ikepaiwe kumabwe.
33Kaŵili kani umuntu afimbulule-po pekanda, kani atule ikanda nekuŵulo'kufimba-po, lomba nekuponena-mo iŋombe neli nimboŋgolo, 34eli akafute umulandu uyo umwine wekanda; akamupele umwine wasisyo indalama, lombe'sifwile sikalukuli syakwe.
35Kaŵili kani iŋombe yamuntu umbi isomesye iŋombe yamuŵyakwe, nayo kaifwa, eli ŵakole indalama iyo-ŋombe ilaŵi, ŵakaaŵane indalama syamulo; nayeyo ifwile nayo ŵakaaŵane kaŵili. 36Sombi kani ŵaliisi ati iyo-ŋombe yalukusoŋga-soŋga pampindi iya pi tile, nemwine waiyo naye taalukwiisalila, icine akafute umulandu, akapele iŋombe pamupunda waŋombe: nayeyo ifwile nayo ikalukuli yakwe.
Currently Selected:
Ifyakufuma 21: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
