Ifyakufuma 20
20
1Popele apo ŵaLesa ŵalilaŵile ayamasiwi onse ati:
2Neŵo nineŵaYawe Lesa woŵe, aŵakufumisye mucalo caIjipiti, muŋanda yaŵukalume.
3Tekwikala naŵalesa ŵambi pamenso anji.
4Tekulicitila ifiŵumbwaŵumbwa, neli fyakupalana nefyakwiulu, neli fyapacalo capansi, nefyamumenda amunsi mucalo; 5tekuti winamisye kuli fyo neli kufipyunjila, tau; pakuti neŵo neŵaYawe, Lesa woŵe, ndi ŵaLesa ŵaŵukwa, aŵacite'milandu yaŵakuŵifya paŵana ŵaŵo ukufika nakufitentekwa fyaŵufitatu nefyaŵufine ifyaŵaŵo aŵalukumfitilwa; 6awacite'ŋkumbu aŵantu imyanda namyanda aŵalukuntemwa nekulukulama'mafunde anji.
7Tekulape'sina lyaŵaYawe Lesa woŵe ukwakuŵepa; pakuti ŵaYawe tesi ŵamweŵe ati wakuŵulo'mulandu uyo uwakuJape'sina lyaŵo ukwakuŵepa.
8Laŋguluka akasuŵa kasabata, mukukatonda. 9Ukalukupyuŋga nekucite'milimo yoŵe yonse ukukumana insiku sisanu nakamo; 10sombi akasuŵa kansiku sisanu nasiŵili kasabata waŵaYawe Lesa woŵe; pakasuŵa ako tekuti ucite'milimo tau, weŵo neli ŵana ŵoŵe aŵalalume neŵanakasi, neli ŵantu ŵoŵe aŵalalume neŵanakasi, neli ninama syoŵe, neli mwensu uwisile mumilyaŋgo yoŵe; 11pakuti, pansiku sisanu nakamo, ŵaYawe walileŋgele iulu necalo capansi, nesiŵa, nafyo fyonse ifili-mo, popele nekutusya pakasuŵa kansiku sisanu nasiŵili; pakuti pali fyefyo waYawe ŵalisyucisye akasuŵa kasabata, nekukatonda.
12Utote ŵawiso naŵanoko, ati insiku syoŵe silukucilunduluka pacalo icilukukupela ŵaYawe Lesa woŵe.
13Tekwipayo'muntu, koku.
14Tekucito'ŵucende, tau.
15Tekwiŵa, koku.
16Tekumuŵepelo'muŵyoŵe, yo.
17Tekucito'luŋkumbwa iŋanda yamuŵyoŵe: tekucito'luŋkumbwa umukasi wamuŵyoŵe, neli ŵantu ŵakwe aŵalalume neŵanakasi, neli niŋombe yakwe, neli nimboŋgolo yakwe, neli cintu cimbi icili camuŵyoŵe.
18Popele aŵantu ŵonse ŵalibwene ukululuma netumpesimpesi nesiwi lyalupeŋga nelupili ukulukututumuko'wusi: naŵo, pakuŵone'fyo, ŵalitutumine, nekwimakanina apatali. 19Naŵo ŵalilaŵile kuli Mose ati: Kamulaŵila kuli fweŵo mweŵo, eli twakumfwa; sombi ŵaLesa tekulaŵila kuli fweŵo, twifwa. 20Popele Mose walilaŵile kuŵantu ati: Mwitina pakuti ŵaLesa ŵaisa mukumwesyeni, ati ukuŵatina kukalukuli pamenso enu, mwikesa kuŵifya.
21Popele aŵantu ŵaliimakanine apatali, eli aŋgapalamina Mose apepi pakufita ukutikeme uko ŵali ŵaLesa.
22Popele ŵaYawe ŵalilaŵile kuli Mose ati: Wakulaŵile'fi kuŵaIsilaeli ati: Mweŵene mulibwene ati naambala nenu ukufuma kwiulu. 23Tesi mukaleŋge ŵalesa ŵesilifa ukwikala naneŵo, neli kuliŵumbila ŵalesa ŵegolide. 24Wakuncitila iconto celoŵa, nekuposela-po imilambu yowe iyakoca nemilambu yoŵe iyaŵutende, nembelele syoŵe, neŋombe syoŵe; lomba apo ponse, apa ndembeʼsina lyanji, ŋkesa kuli weŵo nekukusyucisya. 25Sombi kani wakuncitila ico nto camabwe, tekuti uciiŵake kumabwe akuŵasa; pakuti kani ucicite kumbaso, kale waciŵifya. 26Kaŵili tesi ukaninine pafitantilo paconto canji, iŋgesa kufisulucila-po insoni yoŵe.
Currently Selected:
Ifyakufuma 20: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
