Mak 16

Jesus eɗua hibaittom

1Aria, Sabat deɗ male, Maria, Makdala ted, Jems anig Maria amu Salome ele ag spais muttuɗig ena ele Jesus gaɗa bappaidkkulagnu daden meppig. 2Anam amu, wagɗe mettidnu deɗ digmakppa buttuanab aam digma beebe amu ag ahan, moɗppa, Jesus gaɗa bappaidkkulagnu gonana, 3ag akka akka appig. “Aun nug ehanikka, men naɗi moɗ oɗeppanu buɗibɗib metteb ukkeb megakku?” appig. ⌊Men amuam naɗinab amunu ag anam appig.⌋

4Ag anam madippig, amge haen ag neekkeg ukke amu, men naɗi moɗ oɗeppanu amu, laa nug buɗibɗib mette ukkom 5amunu, ag gona, moɗ ooppa nona, nid bau laa nug lamen elab hakkab ele nug naɗiap-ppa heɗep na dayeye anidna, ag baɗappig. 6Ag anam baɗan heegeg amu nid bau amu nug aum. “Ag aib baɗappig. Ag Nasaret ted Jesus, ad emaitakppa atulppig ele maditteb, amge Nug ippa ii daatte. Nug eɗua hibaittom. Ag Nug meppig aben iikkude antteg! 7Amunu ag gona, Pita amu Jesusnu ippunittak awak danab laa oh ele inam appeg doyeg! ‘Jesus Nug anuqa, Galili gotte amunu, ag ele gona, Nug anukka aum bia appa Nug anidkkulag,’ ” awa aum. 8Nug anam a amu ah ag eɗun, dimittim gona, moɗ uuna, ag beɗulag hahaɗeɗe, dabmak kuɗum aoppig. Ag huan baɗappig amunu, ag danab laa amegppa ii appig.

9((Jesus Nug mettidnu deɗ anuqakppa, wagɗe buttuanab eɗua hibaittowa amu, Nug tatam Maria, Makdala ted, nug gumitta waum. Ah amunu amu, Jesus Nug anukka ouɗi nau eblaih aɗit ele beɗuppanu lamattom. 10Ah nug Jesus antta nug ukka, nuhikkud ippunittak awak danab, ag oolag uug ele gaana daaegeg amelagppa amunu aum. 11Nug anam a, ag Jesus eɗua hibaittom, ah amu Nug ele anttom dooppig, amge ag oolagppa genab ii dooppig.

12Aria, dimppa danab aɗit laa aa laih gokkulahnu ibppa ukkaeheh, Jesus Nug beɗu eɗue gumata waum. 13Wana amu Jesus Nug he, aa Nug dooyya, aa eɗuya goya, nai amu aeh amu, laa ag oolagppa genab ii dooppig.

14Dimppa amu Jesus Nug ippunittak awak danab 11 ag ee lanana daaegeg, Nug tula gumatta wana, Nug ag ooppa genab doyak iitta daanna, ag laa ag Nug eɗua hibaittom dimppa anidna, ag amelagppa appig, amge ag oolagppa genab dooglagnu uun, ahilag dabmak amu ɠagattag eppom, Nug amunu daulag batom. 15Daulag batowa, Nug ag amelagppa aum. “Ag ahan, wan atu ohppa gona, dahilnu Nai Ena danab oh amelagppa mehuqeg! 16Ag mehuqppeg doona amu, danab laa nug ooppa genab doya, layattak aweb, Kayak Nug eɗua aokku. Laa nug ooppa genab ii doya amu, nug Kayak noobppa nai ele daakku. 17Danab ag dahilnu oolagppa genab dootteb ele, ag da onilppa Kayak dabmettaknu kobol danab haknu elele iitta laala imubia hekkulag. Ag ouɗi nau lamadkkulag, ag nailag piɗe piɗe mattiglag. 18Ag mat nau aɗaglag, o le nau danab qe mauhtte ele, ag amu lakkulag, amge ag amuppa ii mauhmana. Ag oɗe danab beɗulag aɗappeg, ag oɗe uuadkku,” awa aum.

19Naɗi Jesus Nug anam a amu Kayak Nug he, Jesus Nug hab aabppa ta, Kayak eppeg naɗiap-ppa heɗep na dayom. 20Aria, ippunittak awak danab ag wan ohppa gona, Jesusnu nai mehuqegeg, Naɗi Nug ag ehanattette, ag Kayak dabmettaknu kobol danab haknu elele iitta laala ele heegeg, amuppa danab ag mehuqak ahilag genab dooppig.))

Currently Selected:

Mak 16: NB

Highlight

Copy

Compare