Jon 2
2
Jesus nuhig uɗat digmeum
1Aria deɗ aɗit uue, deɗ ewamppa, aab Galilinu aab Kana, appa danab laa ah aokkun heum. Jesus anig nug hobul amuppa danab amu laugppa dayom amu, 2ag Jesus Nug nuhikkud ippunittak awak danab ele, ag oh ele hobul amuppa daaglagnu onilagppa eppig. 3Ag anam eeg daaegeg, dimppa wain iitta me, Jesus anig nug Jesus amegppa aum. “Wain ahilag iitta meum,” awa aum. 4Nug anam a amu, Jesus Nug amegppa aum. “Anai, imuam i ihinih ohnu keeke iitta, amge da kobol danab hekkunu elele iitta, amu hekkulnu haen iite doum?” awa aum. 5Jesus anam a amu, anig nug maɗi nid amelagppa aum. “Nug aɗi nai laa ag amelagppa ab amu, ag Nug oɗe dim lamitteg!” awa aum. 6Amu le itaknu hanak menppa hak eblaih laippu ele, Juda ag haen oh ahilag kobolppa amuppa le laaglagnu meeg daappig. Hanak amu anen anen 100 lita anam le inakkunu elele. 7Amu Jesus Nug maɗi nid amelagppa aum. “Ag le itappeg, hanak ambeig!” awa aum. Nug anam aum amunu, ag le itaeg, hanak amu oh ambena agappa beppig. 8Hanak ambeeg, Nug aum. “Laa itappeg nob, aon gona, ee gumak danab okkai metteg!” awa aum. Nug anam a, ag aon gona, 9nug mettaeg, amu ee gumak danab okkai nug le geha wain eɗuom amu baag dookkunu nakok laum. Nug wain amu adeppanu amu, nug ii doyom, amge maɗi nid le itappig ele, ag dooppig. Aria, ee gumak danab okkai nug wain amu nakok lawowa, nug danab ah aotte ele, nug danab amu onigppa eum. 10Onigppa e uɗie amu, nug aum. “Danab oh ag wain ena tatam mattaeg laeg, dimppa danab ah ag wain amu nakok okkai laeg amu, ag wain nakok nau bia madatteb. Amge na wain ena hagakka awe dayom, geha iikku wain ena aon dome,” awa aum. 11Aria, Jesus Nug amu heum amu, amuppa Nug Kayak dabmettaknu kobol danab haknu elele iitta, kobol amu hekkunu digma heum. Nug Galilinu aab Kana appa anam ha, amuppa Nug Nug binag amahlak oppiaawak ele he miag atie, nuhikkud ippunittak awak danab ag nuhignu oolagppa genab dooppig. 12Hobul amu male, Jesus Nug anig, amakkud, amu nuhikkud ippunittak awak danab ele ag Kaperneam appa nona, haen tutu daappig.
Jesus Nug Kayaknu mettid lakka ukkom
13Appa daaegeg ukke, Juda dilag Pasowanu Hobul guguittette, Jesus Nug Jerusalem ukkom. 14Appa Kayaknu mettid lag haɗap oolkadppa danab ag makau, sipsip, amu uppuɗil beɗulag nakok ele ag dadennu mattegeg daden maadppig anattom. Amu danab men doɗo baolitteb ele, ag ele balalppa daanna, anam heegeg anattom. 15Jesus Nug anam anatta, Nug mataɗaknu keeke muɗippa akka, danab amu Kayaknu mettid lag nuhig tomppan keeke oh ele appa daappig ele amu, Nug ahilkad sipsip, makau oh lamattatta, amu Nug danab balalppa silwa men doɗo baolinna daappig ele, Nug ahilag men doɗo gokkaɗe no, balal ele humatta awe, nena qeppig. 16Nena qena, danab uppuɗil beɗulag nakok ele dadennu maatteg daden maadppig ele amelagppa aum. “Keeke amu akkan ukkeg! Ag da Mamel laug amu aib heppeg, ee oɗiak aben bia dayom!” awa aum. 17Jesus anam a, nuhikkud ippunittak awak danab ag Kayak naippa nai daatte, nai amu ag daulagppa doum. Nai amuam inam. “Na lautppa, na ig attemnab daagnignu ippunigttem amu, da amunu yag-nab-bak doye hettem.”
18Anam daye amu, Juda okkai ag amu anidna, ag Jesus amegppa appig. “Na Kayak dabmettaknu kobol danab haknu elele iitta aɗi laa heppe, ig anidta, na heme imu hekkutnu ehah ele daattem amu, ig doognig?” aon appig. 19Aeg amu, Jesus Nug ag oɗelagppa awa aum. “Ag Kayaknu mettid lag imu heppeg nauheb, da deɗ ewam ooppa da eɗue bappaidkkul,” awa aum. 20Jesus anam a amu, ag appig. “Maɗ 46 ukke, ag Kayaknu mettid lag imu henan daappig, amu na deɗ ewam ooppa hekkutnu attemte?” aon appig. 21Amge Jesus Nug Kayaknu mettid lagnu ii aum. Iitta. Nug beɗunu aum. 22Amunu dimppa Kayak he, Jesus Nug eɗua hibaitte amu, ippunittak awak danab ag Nug anukka aum amu daulagppa do, ag Kayak nai, amu nai Jesus Nug aum, nai amu ele ag oolagppa genab dooppig.
23Amu Jesus Nug Jerusalem appa Pasowanu Hobul amuppa dayaya, Kayak dabmettaknu kobol danab haknu elele iitta kuɗum heehe, danab ag anidna, nuhignu oolagppa genab dooppig. 24Amge Jesus Nug danab ah dilag dabmak, diilag ele oh doyom amunu, Nug ahilag dabmak dim lamidkkunu, Nug nugakka Nug ag eppegppa ii meum. 25Nug danab dilag dabmak, diilag ele oh doyatta malom amunu, Nug danab laippu laa nug danab dilag dabmaknu, diilagnu ele Nug amegppa akkunu duttunak laa ii doyom. Iitta!
Currently Selected:
Jon 2: NB
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.