Eksodas 35
35
Sabat deɗ ɗonu nai
1Amu Moses nug qaukoppanu na, nug Israel danab ah oh onilagppa e uɗieg, nug inam amelagppa aum. “Yawe Nug ag haknunab nai imu dim lamidkkulagnu aum. 2Mettid oh amu, ag deɗ eblaih laippu ele uɗat hekkulag, amge deɗ ebqak eblaih aɗit ele amu, amuam deɗ Yawenu tituanak daakku. Am Sabat deɗ, am hik awaknu deɗ, Yawe Nug deɗ amunu, nuhignu tituanak daatte anidtte. Danab aun nug deɗ amuppa uɗat hekku amu, ag nug qeppeg mauhaɗ! 3Ag Sabat deɗppa lakka aab aib ilappig,” awa aum.
Danab ah ag mettid haknu peh lag haknu keeke Yawe mettaglagnu nai
4Moses nug anam awowa, dimppa nug Israel amelagppa inam aum. “Yawe Nug ag imu hekkulagnunab aum. 5Ag keeke aɗatteb oolagppanu amu, ag aun aɗi ag ofa laa gemu Yawe mettaglagnu oolag daatte, ag danab ah amu ag amu aon metteg! Keeke ag Nug mettaglagnu daatteb am inam: gol, silwa, bras, 6linen muɗi hakkab, linen muɗi kaala iɗu iɗu, am ed, perpel, kokoɗnab ele; aria, meeme uɗig, 7sipsip dawai gaɗa, laa ag heeg kokoɗ eppom daatte, kakai maoi gaɗa, plang ad akasianu, 8lam amotaknu goɗen olip meuppa hak, spais digdig laaittak goɗen babaittaknu, amu kalu danab ile muttuɗig enanag bette ele kaboliaknu, 9aria, men oniks, amu men digdig, daden nob okkainab laa ele. Men digdig amu, ag am lamen enanag-epod, amu momo tonaknu lamen eleppa qataqekkulagnu daaglag. Ag keeke amu oh akkan aon, Yawe mettaglagnu daatteb.
Mettid haknu peh lagnu keeke digdignu nai
10Ag keeke amu aon uɗippeg amu, ag oolagppan danab oh ag keeke hekkulagnu doon autna aotteb ele, ag uɗin, ag keeke oh Yawe haknunab aum amu, ag heig! 11Keeke haknu daatteb am inam: mettid haknu peh lag, amu peh lag amu tonaknu keeke ewam ele, aria nuhig huk-ring, gililnu ukku, emaitak maknu ad, biidod, amu diig ɠagattag daakkunu tatap ele. 12Am laa am, Tituanak Nainu Kunup, nuhig tuqai aɗit, Tituanak Nainu Kunup ameg, amuam eheɗ haknu nob nau tiigppa iitta me elele medatte ippunadtte, amu lamen Oo Gunnab Ele qehagkkunu aihak daakkunu. Tituanak Nainu Kunup am Oo Gunnab Ele, appa qehakkak daatte. 13Aria laa am, balal ⌊epeɗiaknab⌋, nuhig keeke laa oh ele, balal amu mawaknu tuqai aɗit, amu bret ele, bret amuam Yawe Nug ina daattenu ippuanattaknu bret. 14Laa am, danab amahlak mattaknu lam maattaknu balal, nuhig keeke naunau, nuhig lam, am lamnu goɗen ele. 15Laa amu, kalu muttuɗig enanag ileb baknu qaɗab, amu qaɗab amu mawaknu tuqai aɗit, laittaknu goɗen, amu kalu muttuɗig ena ele, am lamen mettid haknu peh lag odppa aihak daakkunu ele. 16Aria, keeke laala am, manaknu ofa haknu qaɗab, nuhig keeke naunau, nuhig keeke laa, battam okkai bia brasppa giɗo giɗo ele hak, qaɗab amu mawaknu tuqai aɗit, amu le layaknu tappiɗ okkai, nug baeg ele. 17Keeke laa haknu daatteb am, lamen aɗ, mettid haknu peh lagnu haɗap talilittaknu, aɗ amunu biidod, biidodnu diig ɠagattag daakkunu tatap, amu lamen laa aɗ odppa daakkunu ele. 18Aria, keeke laala am pin elab, mettid haknu peh lag taietteb, ɠagattag qaadkkunu, amu haɗapnu aɗ talilittaknu ele, amu lag, aɗ ele, ahilah muɗi oh taiettaknu ele. 19Laa am lamen akkakppa hak, lamen amuam Yawenu tituanak daatteb, mana mettak danab Aron, nug bekkod ele, haen ag Yawenu mettid haknu peh lagppa Yawenu ɗo maɗoɗnu uɗat henana, mekkulagnu daatteb. Ag keeke amu oh hekkulagnu daatteb,” awa aum.
Danab ah ag mettid haknu peh lag, lag amunu keeke ele hekkulagnu keeke aɗi aɗi aon, Yawe medappignu nai
20Moses nug anam a, aria Israel danab ah oh ag Moses uuidna gona, 21am aun aɗi ag Mosesnu nai amu doon, ag oolag he, ahilag dabmak ele ag oolag ye, ag Moses aum bia hena, keeke digdig ofa daakkunu Yawe mettaglagnu aon doppig. Keeke ag aon doppig ele amu, keeke amuam mettid haknu peh lag danab ah appa qagmetteb ele, peh lag amu haknu, amuppa uɗat hekkulagnu keeke haknu, amu mana mettak danab dilag lamen haknu ele. Lamen amuam Yawenu tituanak daatteb. 22Am danab ah ele oh, ag oolag heum ele amu, ag bala digdig iɗu iɗu ele akkan, aon uɗippig. Amuam pin momoppa maknu, eppelagppanu ring, ring daulagppanu, kalele baalagppanu, amu gol bala digdig laa ele. Am danab ah ag keeke amu aon uɗin, amuppa ag huma epponitta mettaknu ofa hena, Yawe medappig. 23Am danab laala, ah laala ele ag linen muɗi hakkab, o muɗi linen kaala iɗu iɗu, am ed, perpel, kokoɗnab ele, lamen otala okkai akkaglagnu, amu ele, o meeme uɗig ele, o sipsip dawai gaɗa, laa ag heeg, kokoɗ eppom daatte ele, o kakai maoi gaɗa ele amu, ag keeke anam aakku akkan, aon uɗippig. 24Am danab ah laala ag silwa, o bras ele akkan, Yawe gumidna uɗin, Nug medappig amu, ag ofa anam henan heppig. Amu danab ag ad akasia ele, ag mettid haknu peh lag haknu akkan uɗippig. 25Am ah oh muɗi akkak doyak ele ag linen muɗi ed, perpel, kokoɗnab ele, amu linen muɗi hakkab ele hena, ag muɗi amu oh aon uɗippig. 26Aria, ah laala ag oolag heum ele, ag muɗi meeme uɗigppa hak dooppig ele amu, ag amu hena, ag amu aon uɗippig. 27Am ikki danab ag men oniks, amu men digdig, daden nob okkainab ele aon uɗippig. Ag men amuam lamen enanag-epodppa, amu momo tonaknu lamenppa ele qata-aqaknu, men amu aon uɗippig. 28Ag amu aona amu, ag spais muttuɗig enanag diig laala, olip goɗen ele aon uɗippig. Keeke amuam lam maknu, amu laittaknu goɗen haknu, amu kalu danab ile muttuɗig enanag bette ele haknu daatte. 29Am Israel danab ah, ag oolag heum ele amu, ag keeke amu oh ɗo hamu mettaknu ofa hena, aon uɗin, Yawe medappig. Yawe Nug Moses oɗeppa ag uɗat digdig hekkulagnu ag amelagppa aum amunu, ag uɗat amunu keeke amu oh aon uɗippig.
Moses nug Yawe Besalel Oholiap ele tituanatomnu Israel danab ah amelagppa aum
30Ag anam heeg, Moses nug Israel amelagppa inam aum. “Antteg! Yawe Nug Israel dilag huu okkai Juda ted Besalel, nug Uri bekka, Hur alag amu, Nug nug uɗat imu hekkunu tituanom. 31Nug nug tituana, nug uɗat kobol ele, nug uɗat amu, laa oh ele hekkunu amu, Nug nuhig Ouɗi, ehah, dabmak ena, doyak ena ele nug mettom. 32Nug nug keeke kobol kobol enanagnab dabma, golppa, o silwappa, o brasppa keeke, nug keeke amu hekkunu elele daakkunu, 33nug men daden nob okkainab ele hoiya, bala golppa, o silwappa maknu hekkunu, nug adppa ele keeke hoikkunu, amu uɗat kobol ele oh danab nug amu haknu doyak okkai ele hekkunu amu, Yawe Nug doyak anam nug mettom. 34Amu Yawe Nug Besalel, amu Ahisamak bekka Oholiap ele, nug Israel dilag huu okkai Dannu danab amu, Nug aa oh danab laala uɗat amu haknu kobol ippunadkkulahnu ehah ele matom. 35Am Yawe Nug he, danab aɗit amu aa danab uɗat digdig haknu doyak okkai ele daattep. Doyak aa aopiɗ, amuam inam: menppa, golppa, silwappa, brasppa ele uɗat haknu doyak, keekenu dottog pepappa babaittaknu doyak, muɗi ed, perpel, kokoɗnab ele linenppa hak, amu muɗi linen hakkab ele awa, kobol kobol koitaknu doya autanab awak, muɗi awa, lamen akkaknu doyak ele. Danab amu aa uɗat amu oh haknu doyak okkainab ele daattep.
Currently Selected:
Eksodas 35: NB
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
