MATHAI 4
4
Zisu tuhsonah
(Mk 1:12-13; Luk 4:1-13)
1Mataico, Zisu cawh Thlawpaw takhei Setan tah tuhso ná seh tah ka, raangcaa lang a seikhui. 2Ning songli le zai songli batui cahe tah a ungnah cawtah a ngai a di ngetei. 3Tuhsotu cawh Ama kha a vong ka, a hai letah, “Khazing Sawcapaw na cang caco, ma alung sahlo heh very tah cang law tah ca,” tatah a tah.
4Zisu taco, “Khazing bia letah ma hrahei ciapaw a cang, ‘Cawngsaw heh very suipaw tah a hring tlung be, Khazing hmokaw taitah a chuhpaw bia maikaw tah a hring hri,’#Biary 8:3 tah a cang,” tatah a chai.
5Mataico, Setan taco Zisu cawh khuapui pathai Jerusalem lang khah seikhui ka, behnah ing a sangcainah ing cung lekhei a dawsah ka, 6“Khazing Sawcapaw na cang caco, ma taihei a zythlah tua. Zecawtamaw tatah ma hrahei cia a cang,
‘Nama na kong lehei Khazing tah a vaiming sahlo khah naw pei a he ka,
na phe cawh alung letah na khawng ly nápawtah
aa kiá tah aa ca caling a,’#Hlaw 91:11-12 a tah,”
tatah a tah.
7Zisu tah, “Ma hrahei ciapaw a cang, ‘Abuipaw na Khazing cawh hnehsah kheh,’#Biary 6:16 tah a cang,” tatah a chai.
8Setan taco Zisu cawh tlaang saang ngeteipaw lang kekhui ka, khazaw painah raang vytei le aa rungnawnah vytei khah a ming sah. 9“Khuh panai tah na pa beh caco, ma vytei heh ka ca pae a,” tatah a tah.
10Zisu taco, “Setan, seihly myca! Zecawtamaw tatah Capathai letah ma hrahei cia a cang, ‘Abuipaw na Khazing khah beh la, Ama a rai suipaw hre my lo,’#Biary 6:13 tahpaw a cang,” tatah a palei.
11Mataico Setan taco seisai ka, vaiming sahlo cawh a vong he ka, Ama cawh aa mingkai.
Zisu phungrei a patho
(Mk 1:14-15; Luk 4:14-15)
12Johan thong a tlah tahpaw khah Zisu tah a thui tihtah Galili raang lang a paleh kaw. 13Nazaret khua khah piasai ka, sei ka, Zebulun le Naftali raang letei a ungpaw Galili rili kae khua a cangpaw Kapernaum lekhei a va ung. 14Ma heh Khazing khuavang Isaiah hmokaw tei reipaw,
15“Zebulun raang le Naftali raang, Jordan tuivaw hrong tei rili lang seinah, Gental cawngsaw sahlo ungnah Galili,
16a zingnah letei a ungpaw cawngsaw sahlo tah, khainah rungnawpaw aa hmuh myca,
thihnah raang ningpahlipaw letah a ungpaw sahlo cung letah,
khainah khua a dui myca,”#Isai 9:1-2
tahpaw a tlingnah a cang.
17Ma cai taico Zisu cawh phungrei patho ka, “Vaicung painah raang a ne myca cawtah naa suanah a ngepachih tua o,” tatah a tah.
A hningzuitu hmetawpaw sahlo ynah
(Mk 1:16-20; Luk 5:1-11)
18Zisu cawh Galili rili ngaekang letah a khiakaly ning takhei uny pahning Piter aa tahpaw Simon le a unypaw Andru khah a hmuh he. Aaning cawh ngawtletu cang he ka, tuili letah aso aa va leimei. 19Zisu taco, “A vong la, va pa zui o, cawngsaw a tletu tah ka ca tua he a,” tatah a tah he. 20Ma cangkaw leco, aa so sahlo cawh seisai he ka, Zisu cawh aa zui.
21Mataico va sei vy ka, ahringpaw uny pahning Zebedi a sawcapaw Jeims le a unypaw Johan khah a hmuh he. Aaning cawh aa paw Zebedi khakhei tuilawng chung letah ung thlang he ka, aa so sahlo khah aa thei leimei. Zisu taco y he ka, 22ma cangkaw leco, aa lawng le aa paw cawh seisai he ka, Zisu cawh aa zui.
Zisu tah a sahpaw a dangsah
(Luk 6:17-19)
23Zisu cawh Galili raang chung lekhei a khia ka, synagog sahlo#4:23 Synagog cawh, Juda sahlo behnah ing, a cang. lekhei a cawngpah he. Vaicung painah raang kong thawngchawbia khah ching he ka, asawnah maikaw le danglynah maikaw taikhei aa sahpaw sahlo khah a dangsah he. 24A thongpang cawh Siria raang pungpaluh lekhei a thang ka, asawnah a phingphing tei aa sahpaw sahlo, hmawchia aa ingpaw sahlo, khachia tei a tlepaw sahlo, hruihri aa hnuipaw sahlo le a songpaw sahlo khah cawngsaw taco Ama khatah va chuakhui he ka, a dangsah he. 25Galili raang, Dekapoli#4:25 Dekapoli cawh, Khuapui sanghraw, tahnah a cang. raang, Jerusalem khuapui le Judia raang le Jordan tuivaw raechai lang raang tahpaw sahlo taikhei cawngsaw rungpui tah Zisu cawh aa zui.
Currently Selected:
MATHAI 4: zyp
Highlight
Share
Copy
Want to have your highlights saved across all your devices? Sign up or sign in
© 2017, Bible Society of Myanmar and Wycliffe Bible Translators, Inc.