Mwanduso 5
5
Lukolo lwa Adamu
1Aluno lukolo lwa Adamu.
Imulungu hayamlumbile imunu, kamlumba yeghale naye mwenyegho. 2Kawalumba immale ne ipinga, kawabaliki. Na hayawalumbile kawakema taghwa lyawo “Iwanu.” 3Adamu hayang'ali na miyaka miya imwe na selasini, keleka imwana yeghalile naye, yane chihanga ka chake, kamkema Seti. 4Kulawa hayoneke Seti, Adamu tsakakala na miyaka miya nane, kuya keleka iwana wangi iwamale ne iwapinga. 5Imiaka yose yakalile Adamu muisi tsaikala miyaka miya tisa selasini, kuya kafa.
6Seti hayang'ali na miyaka miya imwe na mitano, kamweleka Enoshi. 7Kulawa hayoneke Enoshi Seti tsakakala imiyaka ingi miya nane na saba. Keleka iwana wangi wamale na mapinga. 8Imiaka yose yakalile Seti muisi tsaikala miyaka miya tisa na kumi na mili, kuya kafa.
9Enoshi hayang'ali na miyaka tisini, kamweleka Kenani. 10Kulawa hayoneke Kenani, Enoshi tsakakala muisi miyaka miya nane kumi na mitano. Kuya keleka iwana wangi wamale na mapinga. 11Imiyaka yose yakalile Enoshi muisi tsaikala miya tisa na mitano, kuya kafa.
12Kenani hayang'ali na miyaka sabini, kamweleka Mahalaleli. 13Kulawa hayoneke Mahalaleli Kenani tsakakala miyaka miya nane na alubaini. Kuya keleka iwana wangi wamale na mapinga. 14Imiyaka yose yakalile Kenani muisi tsaikala miyaka miya tisa na kumi, kuya kafa.
15Mahalaleli hayang'ali na miyaka sitini na mitano, kamweleka Yaredi. 16Mahalaleli tsakakala miyaka miya nane na selasini kulawa honeke Yaredi. Kuya keleka iwana wangi wamale na mapinga. 17Imiyaka yose yakalile Mahalaleli muisi tsaikala miyaka miya nane na tisini na tano, kuya kafa.
18Yaredi hayang'ali na miyaka miya imwe na sitini na mili, kamweleka Henoki. 19Yaredi tsakakala miyaka miya nane, kuya keleka iwana wangi wamale ne iwapinga. 20Yaredi tsakakala miyaka miya tisa na sitini na mili, kuya kafa.
21Enoki hayang'ali na miyaka sitini na mitano, kamweleka Metusela. 22Na hayamweleke Metusela, Enoki tsakakala pfinoghile ne Imulungu kwa miyaka miya tatu, kuya keleka iwana wangi wamale na mapinga. 23Enoki tsakakala miyaka miya tatu sitini na mitano. 24Enoki tsakakala pfinoghile ne Imulungu, kuya iwanu ng'awamwonile keli baye, kwaapfila Imulungu tsakamsola.
25Metusela hayang'ali na miyaka miya imwe na semanini na saba, kamweleka Lameki. 26Na hayamweleke Lameki, Metusela tsakakala na miyaka miya saba semanini na mili, kuya keleka iwana wangi wamale na mapinga. 27Metusela tsakakala miyaka miya tisa na sitini na tisa, kuya kafa.
28Lameki hayang'ali na miyaka miya imwe na semanini na mili, keleka imwana. 29Tsakamkema imwana ayo Nuhu, kalonga, “Imwana yuno katsotukanza mna sang'ano tsetu ng'omu tsatusang'ana kwa ghamoko ghetu mna lidongo ililighitighwe ne Imulungu.” 30Nuhu hayaelekighwe, Lameki tsakakala miyaka miya tano na tisini na mitano, kuya keleka iwana wangi wamale na mapinga. 31Lameki tsakakala miyaka miya saba sabini na saba, kuya kafa.
32Nuhu hayang'ali na miyaka miya tano, kamweleka Shemu, Hamu na Yafeti.
Currently Selected:
Mwanduso 5: LBV
Highlight
Share
Copy
Want to have your highlights saved across all your devices? Sign up or sign in
