YouVersion Logo
Search Icon

Zaˍhkaˍriˆ li‸ 1

1
Gʼuiˬsha yawˇ ve chaw hta‸ kuˬ ve
1Paˇshaˇ mvuhˇmiˬ hta‸ Daˍriˆ uˉ peunˍ ve nyiˇ hkʼaw‸ leh ha pa hiˉ maˬ gaˬ ve teˇ yanˇ, Gʼuiˬsha lehˬ tawˇ chi teˇ hpaˍ tcuh kaˍ paˍ Zaˍhkaˍriˆ hta‸ kʼoˆ piˇ ve yoˬ. (Zaˍhkaˍriˆ lehˬ, Iˉdawˇ ve awˬ hawehˍ, Baˍraˍhkiˆ ve yaˇ hpeh‸ ve yoˬ.) 2Jawˇmawˇ Gʼuiˬsha lehˬ, tawˇ chi teˇ hpaˍ yawˇ ve chaw hui hta‸ ca hto piˇ tuˬ, Zaˍhkaˍriˆ hta‸ kʼoˆ piˇ ve yoˬ. Ngaˬ lehˬ nawˬ hui ve awˬ puˍ awˬ pi hui hta‸ nyi ma zuhˆ jaˇ ve yoˬ. 3Ya‸ hkʼaˇ, chi beu‸ ngaˬ nawˬ hui hta‸ chi hkʼe kʼoˆ laˇ ve yoˬ. Ngaˬ geh kʼaw‸ hpfuhˆ kʼaw‸ la-o. Oˇ hkʼe te ve kʼo, ngaˬ htawˇ nawˬ hui geh kʼaw‸ la tuˬ yoˬ. 4Nawˬ hui ve awˬ puˍ awˬ pi hui hkʼe taˇ te. Aˬ sho-eˬ ngaˬ ve tcuh kaˍ paˍ teˇ hpaˍ lehˬ, yawˇ hui haiˬ ve kanˉ hta‸ maˇ gʼa te tuˬ maˍ piˇ taˍ ve yoˬ. Ya‸ hkʼaˇ, yawˇ hui ngaˬ ve tawˇ hta‸ maˇ na yuˬ. 5Chi beu‸ nawˬ hui ve awˬ puˍ awˬ pi leh tcuh kaˍ paˍ oˇ ve teˇ hpaˍ hkʼa peu-eˬ suh kʼai peuˬ. 6Ngaˬ ve tcuh kaˍ paˍ oˇ ve teˇ hpaˍ hta‸ cuˇ leh, yawˇ hui hta‸ shaˍ ti‸ piˇ taˍ ve yoˬ. Ya‸ hkʼaˇ, yawˇ hui maˇ na yuˬ ve pa taw gʼa tu‸ gʼa hkanˍ ve yoˬ. Hkʼe te leh, ngaˬ dawˇ cheˆ taˍ peuˬ ve hkʼa shuˍ yawˇ hui te taˍ ve kanˉ hta‸ keunˍ da‸ ve hkʼe, ciˍ yanˍ laˇ chehˇ ve hta‸ yawˇ hui shiˍ la ve yoˬ, teh‸ Gʼuiˬsha kʼoˆ ve yoˬ.
Awˬ ha hkʼaw lo iˉ mvuhˇ teˇ hpaˍ hta‸ gʼa mawˬ ve
7Daˍriˆ jawˇmawˇ te ve nyiˇ hkʼaw‸ teˇ hkʼaw‸, ha pa teˇ chi teˇ maˬ, nyiˇ chi awˇ nyi htaˇ, Gʼuiˬsha lehˬ mvuhˇ hpeu‸ htaˇ awˬ ha hkʼaw ngaˬ hta‸ tawˇ yaw laˇ ve yoˬ. 8Gʼuiˬsha ve mvuhˇ naw ma tcuh yaˇ teˇ gʼaˇ, nyiˉ-ehˍ ve iˉ mvuhˇ hkʼoˆ ciˇ taˍ leh, lawˬ hkʼo‸ hkʼaw cawˬ ve suhˉ veˆ de hkʼaw lo huˉ chehˇ taˍ ve yoˬ. Yawˇ hkʼaw‸ nawˉ lo, nyiˉ-ehˍ, hpuˉ-ehˍ, ga‸-ehˍ ve iˉ mvuhˇ teˇ hpaˍ huˉ taˍ ve yoˬ. 9Oˇ htaˇ ngaˬ lehˬ, Jawˇmawˇ-oˬ, iˉ mvuhˇ chi teˇ hpaˍ aˬ hto‸ ma te tuˬ le, teh‸ yawˇ hta‸ na nyi ve teˇ yanˇ, Ngaˬ nawˬ hta‸ kʼoˆ maˍ laˇ tuˬ yoˬ. 10Miˬguiˬ hta‸ ca chaˬ nyi tuˬ, Gʼuiˬsha lehˬ iˉ mvuhˇ chi teˇ hpaˍ hta‸ peu laˇ taˍ ve yoˬ, teh‸ ngaˬ hta‸ kʼaw‸ yaw hkʼaw‸ laˇ ve yoˬ.
11Iˉ mvuhˇ oˇ ve teˇ hpaˍ mvuhˇ naw ma tcuh yaˇ hta‸ tawˇ yaw piˇ leh kʼoˆ ve, Ngaˬ hui lehˬ miˬguiˬ chi hkʼaˬ ti chi ti lo gaˬ taˉ peuˬ. Miˬguiˬ yaˇ hkʼa peu-eˬ dawˇ tui‸ gaˇ tui‸ jaˇ leh, gawˬ lehˍ hpeh‸ chehˇ taˍ ve yoˬ, teh‸ kʼoˆ ve yoˬ.
12Oˇ htaˇ mvuhˇ naw ma tcuh yaˇ lehˬ, Jawˇmawˇ Gʼuiˬsha-oˬ, nawˬ lehˬ Yeˍruˆsaˍlehnˍ venˇ leh Yuˇda‸ mvuhˇmiˬ hkʼaw cawˬ ve venˇ teˇ hpaˍ hta‸ nyi ma zuhˆ ve suhˍ chi hkʼaw‸ gaˬ peuˬ. Nawˬ yawˇ hui hta‸ hkʼaˬ htaˆ kʼaw‸ ha kʼaˉ piˇ tuˬ ve le, teh‸ kʼoˆ ve yoˬ.
13Gʼuiˬsha lehˬ mvuhˇ naw ma tcuh yaˇ oˇ ve hta‸ nyi ma sha tuˬ tawˇ yaw piˇ ve yoˬ. 14Oˇ htaˇ, mvuhˇ naw ma tcuh yaˇ oˇ ve lehˬ Gʼuiˬsha kʼoˆ taˍ ve tawˇ teˇ hpaˍ, shu hta‸ ca kʼaw‸ kʼoˆ maˍ piˇ tuˬ ngaˬ hta‸ hto laˇ ve yoˬ. Yawˇ kʼoˆ ve, Ngaˬ lehˬ da‸ kehˬ jaˇ ve Yeˍruˆsaˍlehnˍ venˇ hta‸ ha‸ jaˇ ve yoˬ. 15Gawˬ lehˍ chehˇ taˍ ve awˬ nu ve chaw ceuˬ teˇ hpaˍ hta‸ ngaˬ nyi ma zuhˆ jaˇ ve yoˬ. Ngaˬ ve chaw teˇ hpaˍ hta‸ ngaˬ nyi ma zuhˆ ve mehˉ kʼai tuˬ te chehˇ ve awˬ yanˇ awˬ hkʼaw lo, awˬ nu ve chaw ceuˬ teˇ hpaˍ lehˬ, ngaˬ ve chaw teˇ hpaˍ hta‸ leuˉ leh kʼaw‸ tu‸ hkanˍ tuˬ te piˇ chehˇ ve yoˬ. 16Chi hta‸ pa taw, Yeˍruˆsaˍlehnˍ venˇ hta‸ kʼaw‸ ha kʼaˉ piˇ tuˬ ngaˬ kʼaw‸ la taˍ ve yoˬ. Ngaˬ ve bon yehˬ hta‸ awˬ suhˉ kʼaw‸ gu te leh, venˇ hta‸ htawˇ awˬ suhˉ teˇ pawˆ kʼaw‸ gu te tuˬ yoˬ, teh‸ ngaˬ hta‸ kʼoˆ laˇ ve yoˬ.
17Chi awˬ hkʼoˆ, mvuhˇ naw ma tcuh yaˇ ngaˬ hta‸ teˇ pawˆ kʼaw‸ kʼoˆ laˇ ve, Gʼuiˬsha chi hkʼe kʼoˆ taˍ ve yoˬ. Gʼuiˬsha lehˬ yawˇ ve venˇ teˇ hpaˍ hta‸ teˇ pawˆ kʼaw‸ uiˍ la da‸ la piˇ tuˬ yoˬ. Yawˇ lehˬ Yeˍruˆsaˍlehnˍ venˇ hta‸ teˇ pawˆ kʼaw‸ ga piˇ leh, venˇ chi hta‸ yawˇ ve venˇ teh‸ kʼoˆ tuˬ yoˬ.
Awˬ ha hkʼaw lo awˬ hkaw teˇ hpaˍ hta‸ gʼa mawˬ ve
18Awˬ ha teˇ maˬ awˬ hkʼaw lo, ngaˬ lehˬ nuˇ hkaw awˇ maˬ hta‸ gʼa mawˬ ve yoˬ. 19Awˬ hkaw oˇ ve teˇ hpaˍ aˬ hto‸ ma hpeh‸ ve le, teh‸ ngaˬ mvuhˇ naw ma tcuh yaˇ hta‸ na nyi ve yoˬ.
Yawˇ kʼoˆ ve, Awˬ hkaw oˇ ve teˇ hpaˍ lehˬ, Yuˇda‸ chaw, Iˉsaˍreˍlaˆ chaw leh Yeˍruˆsaˍlehnˍ venˇ yaˇ hui hta‸ hpaˆ da‸ guiˇ da‸ kʼai piˇ lawˬ ve mvuhˇmiˬ lonˉ teˇ hpaˍ hpeh‸ ve yoˬ.
20Oˇ htaˇ Gʼuiˬsha lehˬ, hta tu yuˬ taˍ ve kanˉ te paˍ awˇ gʼaˇ ngaˬ hta‸ kʼaw‸ maˍ laˇ ve yoˬ. 21Chaw chi teˇ hpaˍ aˬ hto‸ ma ca te la ve le, teh‸ ngaˬ yawˇ hta‸ kʼaw‸ na nyi ve yoˬ.
Yawˇ kʼoˆ ve, Chaw chi teˇ hpaˍ lehˬ, Yuˇda‸ mvuhˇmiˬ hta‸ te luˬ leh mvuhˇmiˬ yaˇ teˇ hpaˍ hta‸ hpaˆ da‸ guiˇ da‸ kʼai piˇ lawˬ ve chaw oˇ ve teˇ hpaˍ hta‸ te luˬ te sheˆ piˇ tuˬ laˬ taˍ ve yoˬ, teh‸ ngaˬ hta‸ kʼaw‸ yaw hkʼaw‸ laˇ ve yoˬ.

Currently Selected:

Zaˍhkaˍriˆ li‸ 1: LHBE

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy