Tiˇtuˆ li‸ 1
1
Awˬ chawˇ hta‸ dawˇ nawˇ ve hkawˇ
1Gʼuiˬsha ve awˬ ceˬ leh Yeˍsuˆ Hkri‸ ve tcuh yaˇ hpeh‸ ve ngaˬ Pawˇlu‸ lehˬ, yonˍ ve teˇ ceuˬ tiˉ awˬ hkʼaw lo ngaˬ ve yaˇ awˬ tehˬ awˬ na hpeh‸ ve Tiˇtuˆ hta‸ li‸ chi bvuh‸ laˇ ve yoˬ. 2Ngaˬ Yeˍsuˆ Hkri‸ ve tcuh yaˇ hpeh‸ ve lehˬ, Gʼuiˬsha leuˆ yuˬ taˍ ve chaw hui yonˍ ve teˇ ceuˬ uiˍ la maˇ la leh, Gʼuiˬsha hta‸ yawˆ yan ve hta‸ caˉ da‸ ve hteˇ ve cawˇ ve teˇ ceuˬ hta‸ shiˍ la tuˬ awˬ pon tcuh yaˇ hpeh‸ ve yoˬ. 3Yawˇ piˇ tuˬ yoˬ teh‸, maˇ heˍ puiˉ ve Gʼuiˬsha aˬ sho-eˬ htaˇ ka‸ kʼoˆ taˍ ve co ti‸ ha ti‸ hta‸ ngaˬ dawˇ law taˍ ve awˬ hkʼaw lo te ve yoˬ. Co ti‸ ha ti‸ oˇ ve lehˬ, awˬ yanˇ cawˇ ve teˇ yanˇ htaˇ yawˇ ngaˬ hui hta‸ hpeu‸ maˍ laˇ ve yoˬ. Ngaˬ hui ve Htaiˍ hkʼaw‸ paˍ Gʼuiˬsha lehˬ, tawˇ hkawˇ oˇ ve hta‸ maˍ piˇ tuˬ ngaˬ hta‸ tawˇ pe‸ laˇ leh chiˇ a‸ laˇ ve yoˬ.
4Awˬ pa Gʼuiˬsha leh ngaˬ hui ve Htaiˍ hkʼaw‸ paˍ Yeˍsuˆ Hkri‸ ve awˬ bon awˬ shinˉ leh dawˇ sha gaˇ sha ve teˇ ceuˬ nawˬ geh cawˬ piˇ-oˆ.
Awˬ hoˉ chaw mawˇ teˇ hpaˍ hkʼaˬ hkʼe ve chaw gʼa hpeh‸ ve
5Ngaˬ nawˬ hta‸ maˍ piˇ taˍ ve hkʼe, loˍ sheˍ ve awˬ ceuˬ teˇ hpaˍ hta‸ kʼaw‸ gu kʼaw‸ te leh, teˇ venˇ le le awˬ hkʼaw lo awˬ hoˉ chaw mawˇ teˇ hpaˍ hta‸ leuˆ teh taˍ tuˬ, ngaˬ nawˬ hta‸ Keˍreˍteˍ conˇ lo chehˇ tcuh taˉ laˇ ve yoˬ. 6Awˬ hoˉ chaw mawˇ chi teˇ hpaˍ lehˬ, venˇbaˆ taˍ kuiˬ maˇ cawˬ ve chaw leh, awˬ miˇ ma teˇ gʼaˇ tiˉ cawˬ ve chaw gʼa hpeh‸ ve yoˬ. Yawˇ hui ve yaˇ teˇ hpaˍ lehˬ, Hkri‸ yaˇ gʼa hpeh‸ ve awˬ hkʼoˆ ka‸, yawˇ hui awˬ lawn shu kʼoˆ kuiˬ yaw kuiˬ maˇ gʼa cawˬ tuˬ, awˬ liˇ da‸ leh, shu ve hkawˇ hta‸ na yuˬ puiˉ ve chaw gʼa hpeh‸ ve yoˬ. 7Awˬ lawn kʼo, Hkri‸ yaˇ awˬ moˍ hta‸ nyi ha‸ shaˉ ve chaw lehˬ, Gʼuiˬsha ve mawˇ hta‸ ha‸ shaˉ shehˍ hpaˇ hpeh‸ ve pa taw, venˇbaˆ taˍ kuiˬ maˇ cawˬ ve chaw gʼa hpeh‸ ve yoˬ. A shu yawˇ ve a loˍ awˬ hkʼaˇ suh te ve chaw, nyi ma ngeh ve chaw, a pehˉ meuˇ gʼuiˬ dawˬ ponˬ dawˬ leuˉ ve chaw, shu hta‸ ya‸ da‸ dawˆ da‸ ve chaw leh, hpu shi mawˇ jeˬ hta‸ sheˉ lai ve chaw maˇ gʼa hpeh‸. 8Ya‸ hkʼaˇ, hkehˉ chaw hta‸ ha‸ yuˬ puiˉ ve chaw, da‸ ve hta‸ nyi ma cawˇ ve chaw, nyi ma taˍ puiˉ ve chaw, hteˇ ve cawˇ ve chaw, da‸ ve kehˬ ve chaw leh, a shu yawˇ awˬ to hta‸ gʼaˇ puiˉ ve chaw gʼa hpeh‸ ve yoˬ. 9Da‸ jaˇ biˇ jaˇ ve tawˇ hkawˇ teˇ hpaˍ maˍ piˇ ve awˬ hkʼaw lo shu hta‸ awˬ gʼaˇ piˇ hpeh‸ leh, gʼawˬ hkʼaˆ ve chaw teˇ hpaˍ hta‸ maˍ gʼaˇ hpeh‸ tuˬ, maˍ piˇ taˍ ve ka ti‸ yeˬ ve tawˇ hkawˇ hta‸ yeˬ chaweh vawˆ taˍ ve chaw gʼa hpeh‸ ve yoˬ.
10Awˬ lawn kʼo, shu hkawˇ maˇ na yuˬ puiˉ ve chaw, awˬ bon maˇ cawˬ ve tawˇ hkawˇ hta‸ hkʼe leˇ ca kʼoˆ puiˉ ve chaw leh, heˍ puiˉ ve chaw teˇ hpaˍ maˇ maˇ cawˬ ve yoˬ. Awˬ guiˬ meuˇ shoˍ ve chaw teˇ moˍ awˬ hkʼaw lo chi hkʼe ve chaw leuˉ leh cawˬ maˇ ve yoˬ. 11Yawˇ hui ve maw‸ kʼaw hta‸ gʼa hoˆ taˍ tuˬ yoˬ. Awˬ lawn kʼo, yawˇ hui lehˬ, hpu shi mawˇ jeˬ hta‸ gʼa tuˬ awˬ pon, maˍ piˇ maˇ keunˍ ve hta‸ maˍ piˇ leh, yehˬ kʼa teˇ hpaˍ awˬ hkʼaw lo sho‸ sha‸ tuˬ te ve yoˬ. 12Yawˇ hui awˬ hkʼaw lo, yawˇ hui ve awˬ ceuˬ awˬ hkʼaˇ ve tcuh kaˍ paˍ teˇ gʼaˇ kʼoˆ taˍ ve, Keˍreˍteˍ chaw hui lehˬ, hkʼaˬ htaˆ ka‸ heˍ ve chaw, haiˬ ve to nuˇ to shaˆ hkʼe hpeh‸ ve chaw leh, caˇ ponˬ caˇ leuˉ ve chaw bawˬ hpeh‸ ve yoˬ teh‸ kʼoˆ taˍ ve yoˬ. 13Shaˉ hkiˆ hkanˍ ve tawˇ oˇ ve teˇ hkawˇ lehˬ cawˇ ve yoˬ. Hkʼe te leh, Yuˇda‸ ve kaˇ puiˇ kaˇ lao teˇ hpaˍ hta‸ maˇ kʼoˆ, hteˇ ve cawˇ ve hta‸ baˬ taˉ ve chaw hui tawˇ piˇ taˍ ve teˇ hpaˍ hta‸ maˇ kʼoˆ, maˇ gʼa na yuˬ leh, yonˍ ve awˬ hkʼaw lo awˬ gʼaˇ uiˍ la tuˬ, 14yawˇ hui hta‸ hehnˇ chaweh maˍ piˇ-oˆ. 15Nyi ma hkʼaw da‸ kehˬ ve chaw hui awˬ pon, awˬ ceuˬ hkʼa peu-eˬ da‸ kehˬ ve yoˬ. Ya‸ hkʼaˇ cha‸ chiˆ ve chaw leh maˇ yonˍ ve chaw hui awˬ pon, da‸ kehˬ ve teˇ ceuˬ ka‸ maˇ cawˬ. Yawˇ hui ve dawˇ hkʼaˇ leh yawˇ hui ve shiˍ puiˉ ve nyi ma lehˬ, cha‸ chiˆ ve yoˬ. 16Gʼuiˬsha hta‸ shiˍ ve yoˬ teh‸ yawˇ hui kʼoˆ ve htawˇ, yawˇ hui te ve teˇ hpaˍ awˬ hkʼaw lo yawˇ hta‸ maˇ shiˍ ve hkʼe te ve yoˬ. Shu yawˇ hui hta‸ cha‸ naˬ ve chaw, maˇ na yuˬ puiˉ ve chaw leh, da‸ ve kanˉ te tuˬ awˬ pon yawˇ hui hta‸ a ciˉ ka‸ yehˇ maˇ hpeh‸ ve chaw hpeh‸ ve yoˬ.
Currently Selected:
Tiˇtuˆ li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.