Hpeu‸maˍ ve li‸ 1
1
Yeˍsuˆ Hkri‸ hpeu‸ maˍ laˇ ve awˬ lawn teˇ hpaˍ
1Yeˍsuˆ Hkri‸ hpeu‸ maˍ laˇ ve awˬ lawn teˇ hpaˍ li‸ chi awˬ hkʼaw lo bvuh‸ taˍ ve yoˬ. Maˇ maw maw hpeh‸ la tuˬ ve awˬ lawn teˇ hpaˍ Yeˍsuˆ Hkri‸ lehˬ, yawˇ ve awˬ ceˬ teˇ hpaˍ hta‸ maw piˇ tuˬ, hpeu‸ maˍ laˇ ve awˬ lawn chi teˇ hpaˍ Gʼuiˬsha Yeˍsuˆ hta‸ piˇ taˍ ve yoˬ. Gʼuiˬsha lehˬ yawˇ ve mvuhˇ naw ma tcuh yaˇ teˇ gʼaˇ hta‸ peu laˇ leh, yawˇ ve awˬ ceˬ Yoˇhanˬ hta‸ awˬ lawn chi teˇ hpaˍ shiˍ piˇ mawˬ piˇ ve yoˬ. 2Gʼuiˬsha ve tawˇ hkawˇ leh Yeˍsuˆ Hkri‸ shaˉ hkiˆ hkanˍ taˍ ve awˬ lawn hta‸ Yoˇhanˬ yawˇ gʼa mawˬ ve hkʼe shaˉ hkiˆ hkanˍ ve yoˬ. 3Gʼuiˬsha ve tcuh kaˍ paˍ ve tawˇ hkawˇ chi hta‸ gʼaw maˍ ve chaw maˇ kʼoˆ, bvuh‸ taˍ ve teˇ hpaˍ hta‸ gʼa kaˇ leh te ve chaw teˇ hpaˍ maˇ kʼoˆ, awˬ bon uiˍ ve yoˬ. Awˬ lawn kʼo, awˬ yanˇ gaˬ la paˇ neˇ ve yoˬ.
Hkri‸ yaˇ awˬ moˍ suhˍ moˍ hta‸ li‸ bvuh‸ piˇ ve
4Ngaˬ Yoˇhanˬ lehˬ, Aˍsiˆ mvuhˇmiˬ awˬ hkʼaw lo cawˬ ve Hkri‸ yaˇ awˬ moˍ suhˍ moˍ hta‸ li‸ bvuh‸ laˇ ve yoˬ.
Ponˬ laˬ htaˇ ka‸, chi beu‸ ka‸, laˬ tuˬ ve awˬ yanˇ awˬ hkʼaw lo ka‸, te‸ chehˇ ve teˇ gʼaˇ geh lo maˇ kʼoˆ, yawˇ ve kʼaw jaw mehˆ gʼuˇ suhˍ lo chehˇ taˍ ve awˬ ha suhˍ maˬ geh lo maˇ kʼoˆ, 5ka ti‸ yeˬ ve shaˉ hkiˆ hkanˍ shehˍ hpaˇ Yeˍsuˆ Hkri‸ geh lo maˇ kʼoˆ, awˬ bon awˬ shinˉ leh dawˇ sha gaˇ sha tuˬ nawˬ hui geh cawˬ piˇ-oˆ. Yeˍsuˆ Hkri‸ lehˬ, suh peuˬ ve chaw hui awˬ hkʼaw lo awˉ lawˉ kʼaw‸ te‸ tu la ve teˇ gʼaˇ hpeh‸ leh, miˬ guiˬ hkʼoˆ ve hkunˉ hawˉ hkanˇ teˇ hpaˍ hta‸ uˉ peunˍ shehˍ hpaˇ hpeh‸ ve yoˬ.
Yawˇ ngaˬ hui hta‸ ha‸ leh, yawˇ ve awˬ suhˍ hta‸ cuˇ leh ngaˬ hui ve venˇbaˆ hta‸ hpehˇ hkʼa laˇ peuˬ. 6Ngaˬ hui lehˬ, yawˇ ve mvuhˇmiˬ yaˇ hpeh‸ la tuˬ maˇ kʼoˆ, yawˇ ve Awˬ pa Gʼuiˬsha ve paw hkuˇ teˇ hpaˍ hpeh‸ la tuˬ maˇ kʼoˆ, yawˇ te ve yoˬ. Co co taiˍ taiˍ yawˇ hta‸ awˬ me‸ awˬ hponˇ leh kanˇ paˆ cawˬ piˇ-oˆ. A menˬ.
7Nyi loˬ, yawˇ lehˬ moˬ geh teˇ geh ya‸ la tuˬ yoˬ. Mehˆ shiˍ teˇ shiˍ le le leh yawˇ hta‸ juˆ pawnˍ ve chaw hui yawˇ hta‸ gʼa mawˬ tuˬ yoˬ. Miˬ guiˬ hkʼoˆ chehˇ ve chaw ceuˬ hkʼa peu-eˬ yawˇ hta‸ pa taw gʼa paˆ hawˬ tuˬ yoˬ. Chi hkʼe hpeh‸ la tuˬ yoˬ. A menˬ.
8Ngaˬ lehˬ awˬ hkuiˉ puiˍ leh awˬ leh meuˇ hpeh‸ ve yoˬ teh‸, Jawˇmawˇ Gʼuiˬsha kʼoˆ ve yoˬ. Yawˇ lehˬ, ponˬ laˬ htaˇ ka‸, chi beu‸ ka‸, laˬ tuˬ ve awˬ yanˇ awˬ hkʼaw lo ka‸, te‸ chehˇ ve Kanˇ paˆ uiˍ shehˍ hpaˇ hpeh‸ ve yoˬ.
Chaw yaˇ ve Yaˇ hpu hta‸ Yoˇhanˬ gʼa mawˬ ve
9Ngaˬ lehˬ, nawˬ hui ve awˬ viˉ awˬ nyi Yoˇhanˬ yoˬ. Tu‸ ve hkanˍ ve teˇ ceuˬ hta‸ maˇ kʼoˆ, Gʼuiˬsha uˉ peunˍ ve teˇ ceuˬ hta‸ maˇ kʼoˆ, yeunˇ hkanˍ ve teˇ ceuˬ hta‸ maˇ kʼoˆ, Yeˍsuˆ awˬ hkʼaw lo ngaˬ nawˬ hui geh teˇ geh hkanˍ chehˇ ve yoˬ. Ngaˬ lehˬ Gʼuiˬsha ve tawˇ hkawˇ maˍ leh, Yeˍsuˆ awˬ lawn shaˉ hkiˆ hkanˍ ve pa taw, Paˍmoˆ conˇ lo ngaˬ gʼa chehˇ taˍ ve yoˬ. 10Jawˇmawˇ Yeˍsuˆ ve awˬ nyi teˇ nyi htaˇ Awˬ ha hpu awˬ hkʼaw lo ngaˬ chehˇ leh, behˬ heh ma awˬ hkawˇ bvuhˬ ve hkʼa shuˍ shuˍ, ngaˬ awˬ hkʼaw‸ nawˉ hpawˇ lo bvuhˬ jaˇ ve tawˇ hkawˇ hta‸ ngaˬ gʼa kaˇ ve yoˬ. 11Tawˇ hkawˇ oˇ ve lehˬ, Nawˬ gʼa mawˬ ve teˇ hpaˍ hta‸ li‸ hkʼaw bvuh‸ taˍ leh, Hkri‸ yaˇ awˬ moˍ chi suhˍ moˍ hta‸ feu piˇ-oˆ. Eˇfeˇsu‸, Saˍmuˇraˍnaˆ, Peˍraˍgaˍ, Saˍtiˍrehˇ, Saˍdiˆ, Hpiˇlaˍdeˍhpiˆ leh Lawˍdiˍkiˆ, awˬ moˍ chi teˇ hpaˍ hta‸ feu piˇ-oˆ teh‸ kʼoˆ laˇ ve yoˬ.
12Ngaˬ hta‸ tawˇ yaw laˇ shehˍ hpaˇ hta‸ gʼa mawˬ tuˬ ngaˬ hpfuhˆ nyi htaˇ, shi kawˆ faiˇ suhˍ maˬ hta‸ ngaˬ gʼa mawˬ ve yoˬ. 13Kawˆ faiˇ oˇ ve teˇ hpaˍ awˬ kʼaw ji lo chaw yaˇ ve. Yaˇ hpu hta‸ shuˍ ve chaw teˇ gʼaˇ hta‸ ngaˬ gʼa mawˬ ve yoˬ. Chaw oˇ ve lehˬ, hkui sheh hkʼa gaˬ zuhˬ ve aˉ po‸ hta‸ veu‸ deh leh, yawˇ ve nyi ma pui lo shi haˍ pi caˆ tsuh‸ taˍ ve yoˬ. 14Yawˇ ve oˉ kʼoˍ leh yawˇ ve uˉ hkeh mvuh lehˬ, hpu ve yawˬ mvuh hkʼa shuˍ shuˍ maˇ kʼoˆ, vaˇ meu-e hkʼa shuˍ shuˍ maˇ kʼoˆ, hpu ve yoˬ. Yawˇ ve mehˆ shiˍ lehˬ, aˬ miˍ ha hkʼa shuˍ shuˍ hpeh‸ ve yoˬ. 15Yawˇ ve hkui sheh lehˬ, aˬ miˍ awˬ hkʼaw lo lawˍ taˍ ve kuiˇ hkʼa shuˍ shuˍ hpeh‸ ve yoˬ. Yawˇ tawˇ yaw ve awˬ hkawˇ lehˬ, iˉ kaˆ gʼuiˬ baˇ maˇ jaˇ ve awˬ hkawˇ bvuhˬ ve hkʼa shuˍ shuˍ hpeh‸ ve yoˬ. 16Yawˇ ve la‸ sheh la‸ sha paˉ lo meu‸ keu shiˍ suhˍ shiˍ vawˆ taˍ ve yoˬ. Yawˇ ve maw‸ kʼaw awˬ hkʼaw lo awˬ viˇ nyiˇ hpawˇ cawˬ ve tcuhˆ jaˇ ve aˉ htaw teˇ maˬ tawˆ la ve yoˬ. Yawˇ ve mehˆ hpfuhˇ lehˬ, mvuhˇ nyi gʼeuˆ hkʼa shuˍ shuˍ ba da‸ jaˇ ve yoˬ. 17Yawˇ hta‸ ngaˬ mawˬ ve teˇ yanˇ, ngaˬ lehˬ suh ve chaw teˇ gʼaˇ hkʼa shuˍ shuˍ yawˇ ve hkui paˇ lo paiˍ taˍ ve yoˬ. Ya‸ hkʼaˇ, yawˇ ve la‸ sha paˉ la‸ sheh ngaˬ awˬ hkʼoˆ taˍ leh kʼoˆ laˇ ve, Taˇ kawˆ. Ngaˬ lehˬ, awˬ hkuiˉ puiˍ leh awˬ leh meuˇ hpeh‸ ve yoˬ. 18Te‸ chehˇ ve teˇ gʼaˇ htawˇ ngaˬ hpeh‸ ve yoˬ. Ngaˬ suh peuˬ ve htawˇ chi beu‸ co co taiˍ taiˍ ngaˬ te‸ chehˇ ve yoˬ. Suh ve teˇ ceuˬ ve shawˇ leh suh mvuhˇmiˬ ve shawˇ hta‸ ngaˬ vawˆ taˍ ve yoˬ. 19Hkʼe te leh, nawˬ gʼa mawˬ peuˬ ve teˇ hpaˍ hta‸ maˇ kʼoˆ, chi beu‸ hpeh‸ chehˇ ve teˇ hpaˍ hta‸ maˇ kʼoˆ, awˬ hkʼaw‸ nawˉ hpeh‸ la tuˬ ve teˇ hpaˍ hta‸ maˇ kʼoˆ, bvuh‸ taˍ-o‸. 20Ngaˬ ve la‸ sheh la‸ sha paˉ lo nawˬ gʼa mawˬ peuˬ ve meu‸ keu shiˍ suhˍ shiˍ leh, shi kawˆ faiˇ suhˍ maˬ ve faˉ taˍ ve tcuhˉ kuiˬ lehˬ chi hkʼe yoˬ. Meu‸ keu shiˍ suhˍ shiˍ lehˬ, Hkri‸ yaˇ awˬ moˍ suhˍ moˍ ve tcuh yaˇ teˇ hpaˍ hpeh‸ leh, kawˆ faiˇ suhˍ maˬ lehˬ, Hkri‸ yaˇ awˬ moˍ suhˍ moˍ hpeh‸ ve yoˬ.
Currently Selected:
Hpeu‸maˍ ve li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.