YouVersion Logo
Search Icon

Hpiˇleˍmonˍ li‸ 1

1
Awˬ chawˇ hta‸ dawˇ nawˇ ve hkawˇ
1Yeˍsuˆ Hkri‸ awˬ pon htawnˍ hkʼaw gʼa chehˇ ve ngaˬ Pawˇlu‸ leh, ngaˬ hui ve awˬ viˉ awˬ nyi Tiˆmoˉseˍ lehˬ,
ngaˬ huiˉ maˬ geh teˇ geh kanˉ te ve ha‸ ve Hpiˇleˍmonˍ hta‸ maˇ kʼoˆ, 2awˬ nyi ma Aˍpiˆ leh ngaˬ huiˉ maˬ geh teˇ geh bon hpawˇ ma‸ yaˇ te ve Aˍhkiˇpuˆ hta‸ maˇ kʼoˆ, nawˬ ve yehˬ awˬ hkʼaw lo hpawnˬ da‸ ve Hkri‸ yaˇ awˬ moˍ hta‸ maˇ kʼoˆ, li‸ chi bvuh‸ laˇ ve yoˬ.
3Ngaˬ hui ve Awˬ pa Gʼuiˬsha leh Jawˇ mawˇ Yeˍsuˆ Hkri‸ ve awˬ bon awˬ shinˉ leh dawˇ sha gaˇ sha tuˬ nawˬ hui geh cawˬ piˇ-oˆ.
Hpiˇleˍmonˍ yonˍ leh ha‸ ve awˬ lawn
4Nawˬ lehˬ, Jawˇmawˇ Yeˍsuˆ hta‸ yonˍ leh, Hkri‸ yaˇ hkʼa peu-eˬ hta‸ ha‸ ve yoˬ teh‸ ngaˬ gʼa kaˇ ve pa taw, 5nawˬ awˬ pon ngaˬ bon lawˬ chehˇ ve teˇ yanˇ, nawˬ hta‸ pa taw ngaˬ ve Gʼuiˬsha hta‸ hkʼaˬ htaˆ ka‸ ngaˬ chiˇ mvuh ve yoˬ. 6Ngaˬ bon lawˬ ve lehˬ, shu geh teˇ geh nawˬ Hkri‸ hta‸ yonˍ ve awˬ hkʼaw lo, yawˇ hta‸ pa taw ngaˬ hui cawˬ taˍ ve da‸ ve hkʼa peu-eˬ hta‸ nawˬ shiˍ maˇ la tuˬ awˬ pon ngaˬ lawˬ ve yoˬ. 7Awˬ nyi paˍ-oˬ, nawˬ ve ha‸ pehnˇ ve hta‸ pa taw, ngaˬ ha lehˬ dawˇ sha jaˇ ve yoˬ. Awˬ lawn kʼo, nawˬ hta‸ pa taw Hkri‸ yaˇ teˇ hpaˍ ve nyi ma awˬ gʼaˇ cawˬ la ve yoˬ.
Awˍneˍsiˍmuˆ awˬ pon Pawˇlu‸ lawˬ hkawˉ ve
8Chi hta‸ pa taw, nawˬ te keunˍ te cawˇ ve kanˉ hta‸ te tuˬ awˬ pon nawˬ hta‸ tawˇ piˇ tuˬ, Hkri‸ awˬ hkʼaw lo ngaˬ ha‸ hanˉ ve nyi ma cawˬ ve htawˇ, ngaˬ oˇ hkʼe maˇ te. 9Chaw mawˇ hpeh‸ leh, chi beu‸ Yeˍsuˆ Hkri‸ awˬ pon htawnˍ hkʼaw gʼa chehˇ taˍ ve ngaˬ Pawˇlu‸ lehˬ, ha‸ pehnˇ ve awˬ hkʼaw lo nawˬ hta‸ lawˬ hkawˉ ve yoˬ. 10Ngaˬ htawnˍ hkʼaw chehˇ ve awˬ yanˇ awˬ hkʼaw lo, co ha hpawˇ ngaˬ paw la piˇ taˍ ve, ngaˬ ve yaˇ Awˍneˍsiˍmuˆ awˬ pon ngaˬ nawˬ hta‸ lawˬ hkawˉ ve yoˬ. 11(Yawˇ lehˬ, ponˬ laˬ htaˇ nawˬ awˬ pon awˬ bon maˇ cawˬ ve htawˇ, chi beu‸ nawˬ awˬ pon maˇ kʼoˆ, ngaˬ awˬ pon maˇ kʼoˆ, awˬ bon cawˬ tehˬ ve yoˬ.)
12Ngaˬ yawˇ hta‸ nawˬ geh kʼaw‸ peu laˇ ve yoˬ. Ngaˬ chi hkʼe peuˬ laˇ ve teˇ yanˇ, ngaˬ ve nyi ma shiˍ hta‸ nawˬ geh peu laˇ ve hkʼe yoˬ. 13Ha lehˬ ve bon hkawˇ hta‸ pa taw ngaˬ htawnˍ hkʼaw gʼa chehˇ ve awˬ yanˇ awˬ hkʼaw lo, yawˇ nawˬ ve awˬ tan te leh ngaˬ awˬ pon kanˉ te tuˬ yawˇ hta‸ ngaˬ geh chehˇ tcuh gaˇ ve yoˬ. 14Ya‸ hkʼaˇ, nawˬ awˬ bon te laˇ ve lehˬ, gʼa te ve pa taw te ve teˇ ceuˬ maˇ gʼa hpeh‸ leh, te gaˇ ve awˬ hkʼaw lo te ve teˇ ceuˬ gʼa hpeh‸ tuˬ, nawˬ geh a hkaw-anˬ maˇ gʼa ve ceh ceh, ngaˬ a ciˉ ka‸ maˇ te gaˇ.
15Chi hkʼoˆ ka‸, yawˇ nawˬ geh hkʼaˬ htaˆ ka‸ chehˇ hpeh‸ tuˬ, yawˇ nawˬ hta‸ teˇ tcuhˉ teˇ yanˇ gʼa hpaˆ da‸ ve yoˬ hehˉ. 16Ya‸ hkʼaˇ, chi teˇ pawˆ nawˬ geh kʼaw‸ chehˇ ve lehˬ, awˬ ceˬ hkʼe maˇ heˆ. Ha‸ ve awˬ viˉ awˬ nyi hkʼe chehˇ piˇ-oˆ. Ngaˬ yawˇ hta‸ ha‸ jaˇ ve yoˬ. Nawˬ htawˇ chi a‸ kehˉ leuˉ leh, awˬ suhˍ awˬ shaˍ hpawˇ maˇ kʼoˆ, Jawˇmawˇ Yeˍsuˆ awˬ hkʼaw lo maˇ kʼoˆ, yawˇ hta‸ ha‸ cawˇ ve yoˬ.
17Ngaˬ hta‸ awˬ tehˬ awˬ na nawˬ ve awˬ chawˇ hpeh‸ ve yoˬ teh‸ nawˬ shawˍ taˍ ve kʼo, ngaˬ hta‸ ha‸ yuˬ ve hkʼe yawˇ hta‸ ha‸ yuˬ-o‸. 18Yawˇ nawˬ hta‸ teˇ ceuˬ ceuˬ te ya‸ ve maˇ kʼoˆ, jeˬ teˇ ceuˬ ceuˬ cawˬ ve maˇ kʼoˆ, ngaˬ ve jeˬ hkʼe shawˍ taˍ-o‸. 19Ngaˬ Pawˇlu‸ lehˬ, jeˬ oˇ ve hta‸ shaiˍ laˇ tuˬ yoˬ teh‸ ngaˬ awˬ to bvuh‸ ve yoˬ. Ya‸ hkʼaˇ, nawˬ awˬ to nawˬ ve co ha ngaˬ hta‸ shaiˍ laˇ cawˇ ve awˬ lawn ngaˬ te‸ chiˉ maˇ kʼoˆ. 20Awˬ nyi paˍ-oˬ, Jawˇmawˇ Yeˍsuˆ awˬ hkʼaw lo ngaˬ nawˬ geh awˬ bon teˇ ceuˬ ceuˬ gʼa gaˇ ve yoˬ. Hkri‸ awˬ hkʼaw lo ngaˬ ve nyi ma hta‸ awˬ gʼaˇ cawˬ la piˇ-oˆ.
21Nawˬ ngaˬ ve hkawˇ hta‸ na yuˬ tuˬ yoˬ teh‸, ngaˬ yonˍ ve pa taw, ngaˬ nawˬ hta‸ li‸ bvuh‸ laˇ ve yoˬ. Ngaˬ kʼoˆ ve a‸ kehˉ ka‸ nawˬ te tuˬ yoˬ teh‸ ngaˬ shiˍ ve yoˬ. 22Chi hkʼoˆ ka‸, ngaˬ awˬ pon chehˇ kuiˬ a ciˉ gu taˍ-o‸. Awˬ lawn kʼo, nawˬ hui bon lawˬ ve hta‸ pa taw, ngaˬ nawˬ hui geh teˇ pawˆ gʼa kʼaw‸ laˬ tuˬ yoˬ teh‸ ngaˬ dawˇ law taˍ ve yoˬ.
Awˬ leh meuˇ ve tawˇ hkawˇ
23Yeˍsuˆ Hkri‸ hta‸ pa taw ngaˬ geh teˇ geh htawnˍ hkʼaw chehˇ taˍ ve Eˇpaˍhpaˍraˆ lehˬ, nawˬ hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ. 24Ngaˬ geh teˇ geh kanˉ te shehˍ hpaˇ Maˍkuˆ, Aˍriˍtaˍhkuˆ, Deˍmaˆ leh Luˉka‸ hui htawˇ, nawˬ hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ.
25Jawˇmawˇ Yeˍsuˆ Hkri‸ ve awˬ bon awˬ shinˉ nawˬ hui ve nyi ma awˬ hkʼaw lo cawˬ piˇ-oˆ.

Currently Selected:

Hpiˇleˍmonˍ li‸ 1: LHBE

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy