Maˍkuˆ li‸ 1
1
Baˆtiˆsaˬ piˇ paˍ Yoˇhanˬ bon maˍ ve
1Gʼuiˬsha ve Yaˇ hpu Yeˍsuˆ Hkri‸ ve ha lehˬ ve bon hkawˇ awˬ hkuiˉ puiˍ lehˬ chi hkʼe yoˬ. 2Gʼuiˬsha ve tcuh kaˍ paˍ Iˉsaˍyaˆ ve li‸ awˬ hkʼaw lo bvuh‸ taˍ ve hkʼe,
Nyi loˬ, nawˬ awˬ gʼuˇ suhˍ nawˬ ve ya‸ kʼaw hta‸ gu taˍ laˇ tuˬ,
ngaˬ ve tcuh yaˇ hta‸ ngaˬ peu kʼai ve yoˬ. #Mlk 3:1
3Jawˇmawˇ Gʼuiˬsha ve ya‸ kʼaw hta‸ gu taˍ loˬ.
Yawˇ ve ya‸ kʼaw teˇ hpaˍ hta‸ hteˇ lehˍ te-o teh‸,
heh puiˉ hkʼaw lo chaw teˇ gʼaˇ kuˬ ve yoˬ. #Isy 40:3
4Yoˇhanˬ heh puiˉ hkʼaw lo tawˆ la leh baˆtiˆsaˬ piˇ ve yoˬ. Venˇbaˆ hpehˇ hkʼa gʼa tuˬ, venˇbaˆ dawˇ hpfuhˆ ve hta‸ caˉ da‸ ve baˆtiˆsaˬ teˇ ceuˬ hta‸ yawˇ maˍ piˇ ve yoˬ. 5Yuˇda‸ mvuhˇmiˬ chaw hkʼa peu-eˬ leh Yeˍruˆsaˍlehnˍ venˇ yaˇ hkʼa peu-eˬ Yoˇhanˬ geh kʼai ve yoˬ. A shu yawˇ ve venˇbaˆ hta‸ kʼaoˍ maˍ piˇ leh, Yoˇhanˬ yawˇ hui hta‸ Yawˇdanˍ gʼuiˬ ma awˬ hkʼaw lo baˆtiˆsaˬ piˇ ve yoˬ.
6Yoˇhanˬ lehˬ, kaˍlaˍoˆ awˬ mvuh te taˍ ve veu‸ kʼaˇ hta‸ veu‸ deh leh, caw‸ cehˍ nyi lo shaˍ guiˬ haˍ pi caˆ tsuh‸ taˍ ve yoˬ. Paˉ ce‸ leh heh puiˉ hkʼaw ve pehˇ gʼuiˬ hta‸ yawˇ caˇ ve yoˬ. 7Yawˇ bon maˍ leh kʼoˆ ve, Ngaˬ awˬ hkʼaw‸ nawˉ laˬ tuˬ ve teˇ gʼaˇ lehˬ, ngaˬ a‸ kehˉ kanˇ paˆ uiˍ ve yoˬ. Ngaˬ kʼaw‸ lehˍ te leh yawˇ ve hkuiˉ nuˆ caˆ hta‸ hpui tuˬ ve ceh ka‸ maˇ keunˍ. 8Ngaˬ lehˬ nawˬ hui hta‸ iˉ kaˆ awˬ hkʼaw lo baˆtiˆsaˬ piˇ ve yoˬ. Ya‸ hkʼaˇ yawˇ lehˬ, nawˬ hui hta‸ da‸ ve kehˬ ve Awˬ ha hpu awˬ hkʼaw lo baˆtiˆsaˬ piˇ tuˬ yoˬ teh‸ maˍ piˇ ve yoˬ.
Yeˍsuˆ baˆtiˆsaˬ hkanˍ yuˬ ve
9Awˬ yanˇ oˇ ve awˬ hkʼaw lo, Gaˍliˍlehˇ mvuhˇ miˬ Naˍzaˍrehˆ venˇ hkʼaw lo Yeˍsuˆ tawˆ la leh, Yawˇdanˍ gʼuiˬ ma awˬ hkʼaw lo Yoˇhanˬ yawˇ hta‸ baˆtiˆsaˬ piˇ ve yoˬ. 10Yeˍsuˆ iˉ kaˆ awˬ hkʼaw lo teˇ cawˬ haˉ tawˆ la htaˇ, mvuhˇ naw ma hpaw leh Awˬ ha hpu lehˬ aˉ pui kʼaˍ hkʼe yawˇ awˬ hkʼoˆ ya‸ la ve hta‸ Yeˍsuˆ gʼa mawˬ ve yoˬ. 11Nawˬ lehˬ ngaˬ ha‸ jaˇ ve ngaˬ ve Yaˇ hpu yoˬ. Nawˬ hta‸ ngaˬ nyi hkʼaˇ suh jaˇ ve yoˬ teh‸, mvuhˇ naw ma lo awˬ hkawˇ tawˆ la ve yoˬ. #Chi 2:7, Isy 42:1
Yeˍsuˆ beˬ ve lawˇ ve hta‸ gʼa hkanˍ ve
12Teˇ cawˬ haˉ Awˬ ha hpu yawˇ hta‸ heh puiˉ hkʼaw lo gʼa‸ peu ve yoˬ. 13Yawˇ heh puiˉ hkʼaw lo awˇ chi nyi chehˇ leh, Saˍtanˍ yawˇ hta‸ beˬ ve lawˇ ve yoˬ. Yawˇ haiˬ ve to nuˇ to shaˆ teˇ hpaˍ geh chehˇ leh, mvuhˇ naw ma tcuh yaˇ teˇ hpaˍ yawˇ loˍ ve hta‸ ga piˇ ve yoˬ.
Yeˍsuˆ kanˉ tanˬ te ve
14Yoˇhanˬ hta‸ shu hpeh yuˬ peuˬ hkʼaw‸ nawˉ, Yeˍsuˆ Gaˍliˍlehˇ mvuhˇ miˬ lo laˬ ve yoˬ. 15Gʼuiˬsha ve ha lehˬ ve bon hkawˇ hta‸ Yeˍsuˆ maˍ piˇ leh kʼoˆ ve, Awˬ yanˇ biˇ la peuˬ. Gʼuiˬsha ve mvuhˇmiˬ gaˬ la paˇ neˇ peu. Venˇbaˆ hta‸ dawˇ hpfuhˆ leh ha lehˬ ve bon hkawˇ hta‸ yonˍ loˬ teh‸ maˍ piˇ ve yoˬ.
Ngaˇ ca paˍ awˇ gʼaˇ hta‸ Yeˍsuˆ kuˬ yuˬ ve
16Gaˍliˍlehˇ gʼuiˬ po paˇ lo Yeˍsuˆ kʼai chehˇ htaˇ, Siˉmonˍ leh yawˇ ve awˬ nyi paˍ Anˍdrehˍ gʼuiˬ po awˬ hkʼaw lo geu‸ hpehˇ chehˇ ve hta‸ gʼa mawˬ ve yoˬ. Awˬ lawn kʼo, yawˇ huiˉ maˬ lehˬ ngaˇ ca paˍ hpeh‸ ve yoˬ. 17Yeˍsuˆ kʼoˆ ve, Ngaˬ hkʼaˇ suh laˬ-o‸. Ngaˬ nawˬ hui hta‸ chaw ca shehˍ hpaˇ te tcuh laˇ tuˬ yoˬ teh‸, yawˇ huiˉ maˬ hta‸ kʼoˆ piˇ ve yoˬ. 18Yawˇ huiˉ maˬ teˇ cawˬ haˉ geu‸ hta‸ teh taˉ leh yawˇ awˬ hkʼaˇ suh kʼai ve yoˬ.
19Yeˍsuˆ awˬ gʼuˇ suhˍ a ciˉ kʼaw‸ kʼai htaˇ, Zeˍbeˍdehˇ ve awˬ yaˇ paˍ Yaˍkoˆ leh yawˇ ve awˬ nyi paˍ Yoˇhanˬ, haw lo‸ kʼoˍ hkʼaw geu‸ gu tawˉ chehˇ ve hta‸ gʼa mawˬ ve yoˬ. 20Teˇ cawˬ haˉ Yeˍsuˆ yawˇ huiˉ maˬ hta‸ kuˬ yuˬ ve yoˬ. Gʼaˇ ga caˇ paˍ hui geh awˬ pa Zeˍbeˍdehˇ hta‸ haw lo‸ kʼoˍ hkʼaw lo teh taˉ peuˬ leh, yawˇ huiˉ maˬ yawˇ awˬ hkʼaˇ suh kʼai ve yoˬ.
Neˇ cha‸ chiˆ geh ve chaw awˬ lawn
21Yawˇ hui Kaˍpeˍneˍonˍ lo taˆ-e leh maˍ piˇ ve yoˬ. 22Yawˇ maˍ piˇ ve hta‸ yawˇ hui anˇ jaˇ ve yoˬ. Awˬ lawn kʼo, li‸ bvuh‸ paˍ hui maˍ piˇ ve hkʼe yawˇ maˍ ve maˇ heˆ. Yawˇ kanˇ paˆ cawˬ ve awˬ hkʼaw lo maˍ piˇ ve yoˬ.
23Oˇ teˇ hkui yawˇ hui ve bon yehˬ awˬ hkʼaw lo neˇ cha‸ chiˆ geh ve chaw teˇ gʼaˇ cawˬ ve yoˬ. 24Yawˇ kuˬ leh kʼoˆ ve, Naˍzaˍrehˆ chaw Yeˍsuˆ-oˬ, nawˬ ngaˬ hui hta‸ hkʼaˬ hkʼe caˉ da‸ le. Ngaˬ hui hta‸ te luˬ laˇ tuˬ nawˬ laˬ ve laˇ. Nawˬ hta‸ ngaˬ shiˍ taˍ ve yoˬ. Nawˬ lehˬ, Gʼuiˬsha ve da‸ kehˬ ve chaw hpeh‸ ve yoˬ teh‸ kʼoˆ ve yoˬ.
25Oˇ htaˇ Yeˍsuˆ yawˇ hta‸ deˇ leh kʼoˆ ve, Ta‸ iˉ chehˇ-oˆ. Yawˇ awˬ hkʼaw lo tawˆ kʼai-o teh‸, yawˇ hta‸ kʼoˆ piˇ ve yoˬ.
26Neˇ cha‸ chiˆ lehˬ, chaw oˇ ve hta‸ gʼaˇ hte‸ hpeˆ dawˇ tcuh leh, awˬ hkawˇ bvuhˬ chaweh kuˬ leh yawˇ awˬ hkʼaw lo tawˆ kʼai ve yoˬ. 27Chaw hkʼa peu-eˬ anˇ leh kʼoˆ ve, Chi ve lehˬ, hkʼaˬ hkʼe le. Maˍ piˇ ve chi lehˬ, awˬ suhˉ teˇ ceuˬ law leˇ. Neˇ cha‸ chiˆ teˇ hpaˍ hta‸ ka‸ kanˇ paˆ awˬ hkʼaw lo yawˇ tawˇ piˇ leh yawˇ hui na yuˬ ve yoˬ teh‸, yawˇ hui teˇ gʼaˇ leh teˇ gʼaˇ kʼoˆ da‸ ve yoˬ.
28Yawˇ ve awˬ lawn teˇ cawˬ haˉ Gaˍliˍ lehˇ mvuhˇ miˬ teˇ kaˬ le le lo bvuhˬ kʼai ve yoˬ.
Siˉmonˍ awˬ miˇ ma ve awˬ e hta‸ Yeˍsuˆ gu na-e piˇ ve
29Teˇ cawˬ haˉ yawˇ hui bon yehˬ awˬ hkʼaw lo tawˆ kʼai leh, Yaˍkoˆ leh Yoˇhanˬ geh Siˉmonˍ leh Anˍdrehˍ hui ve yehˬ hkʼaw lo‸-e ve yoˬ. 30Siˉmonˍ awˬ miˇ ma ve awˬ e kaˆ naˬ leh zuh‸ chehˇ ve yoˬ. Yawˇ awˬ lawn Yeˍsuˆ hta‸ yawˇ hui teˇ cawˬ haˉ hto piˇ ve yoˬ. 31Yeˍsuˆ laˬ leh, yaˇ miˇ oˇ ve la‸ sheh hta‸ vawˆ leh tu la piˇ lawˬ ve yoˬ. Yawˇ ve kaˆ naˬ ve na-e la leh, yawˇ yawˇ hui hta‸ te caˍ te taw piˇ ve yoˬ.
Mehˆ muiˉ naˆ la htaˇ, chaw naˬ laiˉ gʼaˇ hta‸ gu na-e piˇ ve
32Mvuhˇ nyi kʼehˬ peuˬ leh mehˆ muiˉ naˆ la paˇ neˇ htaˇ, naˬ ve gawˬ ve chaw hkʼa peu-eˬ leh, neˇ geh ve chaw teˇ hpaˍ hta‸ Yeˍsuˆ geh shiˍ veu laˇ ve yoˬ. 33Venˇ yaˇ hkʼa peu-eˬ yehˬmiˉhpe‸ awˬ paˇ lo hpawnˬ chehˇ taˍ ve yoˬ. 34A naˍ laiˉ ceuˬ te naˬ chehˇ ve chaw maˇ maˇ hta‸ yawˇ gu na-e piˇ leh, neˇ teˇ hpaˍ hta‸ htawˇ gʼa‸ kʼoˬ piˇ ve yoˬ. Neˇ teˇ hpaˍ yawˇ hta‸ shiˍ ve pa taw Yeˍsuˆ yawˇ hui hta‸ tawˇ maˇ yaw tcuh.
Yeˍsuˆ bon ca maˍ ve
35Mvuhˇ shawˉ teˇ na‸, mvuhˇ maˇ htiˇ sheˍ htaˇ, Yeˍsuˆ tu leh heh puiˉ hkʼaw lo kʼai leh, oˇ kaˬ lo bon lawˬ chehˇ ve yoˬ. 36Siˉmonˍ leh yawˇ geh chehˇ ve awˬ chawˇ teˇ hpaˍYeˍsuˆ hta‸ gʼa‸ ca ve yoˬ. 37Yawˇ hui Yeˍsuˆ hta‸ mawˬ htaˇ, Chaw hkʼa peu-eˬ nawˬ hta‸ ca chehˇ ve yoˬ teh‸ yawˇ hta‸ hto piˇ ve yoˬ.
38Yeˍsuˆ yawˇ hui hta‸ kʼoˆ piˇ ve, Awˬ paˇ awˬ kui lo cawˬ ve venˇ hkʼaˆ teˇ hpaˍ hta‸ htawˇ ngaˬ bon gʼa maˍ piˇ tuˬ awˬ gʼuˇ suhˍ kʼai-a veuˬ. Awˬ lawn kʼo, chi hkʼe te tuˬ ngaˬ laˬ ve yoˬ teh‸, yawˇ kʼaw‸ kʼoˆ piˇ ve yoˬ.
39Gaˍliˍlehˇ mvuhˇmiˬ teˇ kaˬ le le yawˇ hui ve bon yehˬ teˇ hpaˍ awˬ hkʼaw lo yawˇ bon ca maˍ piˇ leh, neˇ teˇ hpaˍ hta‸ gʼa‸ kʼoˬ ve yoˬ.
Hkiˬ tu‸ paˍ hta‸ Yeˍsuˆ gu na-e piˇ ve
40Hkiˬ tu‸ paˍ teˇ gʼaˇ yawˇ geh laˬ leh hkui tcuhˉ teh leh kʼoˆ ve, Nawˬ te gaˇ ve kʼo, ngaˬ hta‸ da‸ la kehˬ la tuˬ nawˬ te hpeh‸ ve yoˬ teh‸, Yeˍsuˆ hta‸ lawˬ hkawˉ ve yoˬ.
41Yeˍsuˆ yawˇ hta‸ ha kʼaˉ ve pa taw, la‸ sheh che leh yawˇ hta‸ htawˇ leh kʼoˆ ve, Ngaˬ te gaˇ ve yoˬ. Da‸ la kehˬ la-o teh‸ kʼoˆ piˇ ve yoˬ. 42Teˇ cawˬ haˉ hkiˬ tu‸ a naˍ mehˉ kʼai leh yawˇ da‸ la kehˬ la ve yoˬ. 43Yeˍsuˆ yawˇ hta‸ tawˇ hehnˇ chaweh kʼoˆ piˇ ve, 44Awˬ lawn chi chaw teˇ gʼaˇ hta‸ ka‸ taˇ ca hto piˇ. Nawˬ kʼai leh paw hkuˇ hta‸ nawˬ awˬ to ca maw piˇ-oˆ. Shu mehˆ gʼuˇ suhˍ shaˉ hkiˆ hpeh‸ tuˬ, nawˬ da‸ la kehˬ la peuˬ ve awˬ pon Moˉseˍ awˬ liˇ teh taˍ ve hkʼe, tanˇ tuˬ ca tanˇ piˇ-oˆ teh‸, Yeˍsuˆ kʼoˆ piˇ leh teˇ cawˬ haˉ yawˇ hta‸ kʼo‸-e tcuh ve yoˬ.
45Ya‸ hkʼaˇ, yawˇ tawˆ kʼai leh awˬ lawn oˇ ve hta‸ gʼaˇ hte‸ ca kʼaoˍ piˇ leh, teˇ kaˬ le le awˬ hkawˇ bvuhˬ kʼai piˇ lawˬ ve yoˬ. Chi hta‸ pa taw Yeˍsuˆ lehˬ venˇ teˇ hpaˍ hkʼaw hkʼa tawˍ lehˆ kʼaw‸ lo‸-e maˇ hpeh‸ leh, heh puiˉ hkʼaw lo chehˇ taˍ ve yoˬ. Hkʼaˬ hpawˇ chi hpawˇ lo chehˇ ve chaw hui yawˇ geh laˬ ve yoˬ.
Currently Selected:
Maˍkuˆ li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.