Miˆhkaˍ li‸ 1
1
1Yuˇda‸ mvuhˇmiˬ hkʼaw Yawˇtanˍ, Aˍhaˆ leh Heˍsaˍkiˆ hui jawˇmawˇ te chehˇ htaˇ, Gʼuiˬsha lehˬ Mawˇraˍsaˆ venˇ yaˇ Miˆhkaˍ hta‸ Saˍmaˍriˆ venˇ leh Yeˍruˆsaˍlehnˍ venˇ hta‸ caˉ da‸ ve awˬ lawn chi teˇ hpaˍ kʼoˆ piˇ ve yoˬ.
Saˍmaˍriˆ leh Yeˍruˆsaˍlehnˍ venˇ awˬ pon dawˇ haˍ hkawˇ
2Chaw ceuˬ teˇ hpaˍ-oˬ, na sheˍ.
Miˬguiˬ hkʼoˆ chehˇ ve chaw hkʼa peu-eˬ tawˇ chi ve teˇ hpaˍ hta‸ na taˍ sheˍ.
Gʼuiˬsha lehˬ nawˬ hui hta‸ venˇbaˆ taˍ tuˬ ve yoˬ.
Na sheˍ. Yawˇ lehˬ mvuhˇ naw ma hkʼoˆ lo Yawˇ ve bon yehˬ hkʼaw chehˇ taˍ leh tawˇ yaw chehˇ ve yoˬ.
3Gʼuiˬsha lehˬ yawˇ ve da‸ kehˬ ve chehˇ kuiˬ lo tawˆ la chehˇ leh,
hkʼaw uˉ tzuh teˇ hpaˍ awˬ hkʼoˆ lo juˇ kʼai ve yoˬ.
4Oˇ htaˇ hkʼaw teˇ hpaˍ lehˬ,
aˬ miˍ hkʼaw kuiˬ kʼai chehˇ ve pehˇ hawˍ hkʼa shuˍ yawˇ awˬ hawˉ lo kuiˬ kʼai leh,
hkʼaw hkʼoˆ lo ya‸ la chehˇ ve iˉ kaˆ hkʼa shuˍ
lawˬ hkʼo‸ hkʼaw yoˬ ya‸-e tuˬ yoˬ.
5Iˉsaˍreˍlaˆ chaw teˇ hpaˍ venˇbaˆ te leh Gʼuiˬsha hta‸ kʼaw‸ hpfuhˆ ve pa taw, awˬ ceuˬ chi teˇ hpaˍ hpeh‸ la tuˬ yoˬ. Iˉsaˍreˍlaˆ chaw hui Gʼuiˬsha hta‸ hpfuhˆ ve pa taw, a shu hta‸ venˇbaˆ gʼa taˍ tuˬ le. Saˍ maˍriˆ venˇ lonˉ hta‸ yoˬ. Yuˇda‸ mvuhˇmiˬ hkʼaw shaˉ ho‸ hta‸ oˉ kʼoˍ pui ve pa taw, a shu venˇbaˆ cawˬ ve le. Yeˍruˆsaˍlehnˍ venˇ yoˬ. 6Chi hta‸ pa taw Gʼuiˬsha kʼoˆ ve, Saˍmaˍriˆ venˇ hta‸ ngaˬ te luˬ piˇ leh, a pehˉ meuˇ cehˬ ti kuiˬ hpeh‸ la piˇ tuˬ yoˬ. Venˇ hkʼaw luˬ peuˬ sheˆ peuˬ ve yehˬ teˇ hpaˍ hta‸ ngaˬ lawˬ hkʼo‸ hkʼaw baˬ keu leh, venˇ hta‸ te luˬ piˇ tuˬ yoˬ. 7Awˬ hpfuhˇ hkʼaˆ ve shaˉ ho‸ teˇ hpaˍ hta‸ htawˇ ngaˬ dawˆ meu-e piˇ leh bon yehˬ hkʼaw chehˇ taˍ ve meh maˬ lanˉ hui hta‸ tanˇ piˇ taˍ ve mawˇ hkʼa peu-eˬ hta‸ ngaˬ aˬ miˍ tuˉ baˬ tuˬ yoˬ. Oˇ kaˬ lo dawˆ baˬ taˍ ve shaˉ ho‸ awˬ hpoˆ lonˉ cawˬ tuˬ yoˬ. Saˍmaˍriˆ venˇ lehˬ shaˉ ho‸ oˇ ve teˇ hpaˍ hta‸ te taˍ ve yoˬ. Chi beu‸ canˇ paˍ teˇ hpa lehˬ shaˉ ho‸ oˇ ve teˇ hpaˍ hta‸ awˬ nu ve chehˇ kuiˬ lo kʼaw‸ yuˬ kʼai tuˬ yoˬ, teh‸ kʼoˆ ve yoˬ.
8Oˇ htaˇ Miˆhkaˍ kʼoˆ ve, Chi hkʼe hpeh‸ la tuˬ ve pa taw, ngaˬ dawˇ haˍ leh hkʼanˇ chehˇ tuˬ yoˬ. Ngaˬ dawˇ haˍ ve hta‸ hpeu‸ maˍ piˇ tuˬ, ngaˬ lehˬ hkuiˉ nuˆ maˇ tcuhˉ leh te toˇ tuˬ yoˬ. Heh hpuiˇ hkʼa shuˍ ngaˬ kuˬ toˇ chehˇ leh, kaˍlaˍoˆ ngaˆ hkʼa shuˍ ngaˬ hkʼanˇ chehˇ tuˬ yoˬ. 9Saˍmaˍriˆ ve naˬ kuiˬ teˇ hpaˍ lehˬ, kʼaw‸ na-e la maˇ gʼa taˬ. Yuˇda‸ mvuhˇmiˬ htawˇ oˇ hkʼe gʼa hkanˍ la paˇ neˇ ve yoˬ. Luˬ ve sheˆ ve teˇ ceuˬ lehˬ, ngaˬ ve chaw teˇ hpaˍ chehˇ taˍ kuiˬ Yeˍruˆsaˍlehnˍ venˇ taˍ meu‸ hpe‸ lo gaˬ la peuˬ, teh‸ kʼoˆ ve yoˬ.
Yeˍruˆsaˍlehnˍ venˇ awˬ paˇ lo canˇ paˍ gaˬ la peuˬ
10Ngaˬ hui shonˇ kʼai ve awˬ lawn Gaˍtaˆ venˇ hkʼaw chehˇ ve ngaˬ hui ve canˇ paˍ teˇ hpaˍ hta‸ taˇ hto piˇ. Nawˬ hui hawˬ chehˇ ve yawˇ hui hta‸ taˇ mawˬ tcuh. Beˍtawˇhpaˍraˍ venˇ yaˇ teˇ hpaˍ-oˬ, je‸ meu-e hkʼaw zuh‸ taˍ leh nawˬ hui dawˇ law kuiˬ maˇ cawˬ-o ve hta‸ hpeu‸ maˍ piˇ-oˆ. 11Saˍhpiˉra‸ venˇ yaˇ teˇ hpaˍ-oˬ, awˬ kʼu nyi te leh ya‸ taw ve hkʼaw lo shu mvuhˇmiˬ lo ca chehˇ-oˆ. Zaˍnanˍ venˇ yaˇ teˇ hpaˍ lehˬ, teˇ gʼaˇ ka‸ tawˆ la haˆ tuˬ ve maˇ heˆ. Beˍtaˍseˍlaˆ venˇ hkʼaw chehˇ ve chaw hui hkʼanˇ chehˇ ve awˬ hkawˇ hta‸ nawˬ hui gʼa kaˇ ve teˇ yanˇ, oˇ kaˬ lo gʼaˇ va kuiˬ maˇ cawˬ-o ve hta‸ nawˬ hui gʼa shiˍ tuˬ yoˬ. 12Maˍroˍ venˇ yaˇ teˇ hpaˍ lehˬ, gʼa ponˬ tuˬ ve hta‸ dawˇ law chehˇ tuˬ yoˬ. Awˬ lawn kʼo, Gʼuiˬsha lehˬ kawˆ tuˬ dawˇ haˍ tuˬ awˬ ceuˬ Yeˍruˆsaˍlehnˍ venˇ awˬ paˇ neˇ lo gaˬ la piˇ lawˬ ve pa taw yoˬ. 13Laˍhkiˇsaˆ venˇ yaˇ teˇ hpaˍ-oˬ, iˉ mvuhˇ lawˬ hta‸ hkʼa deh‸ gu taˍ-o‸. Nawˬ hui lehˬ Iˉsaˍreˍlaˆ chaw hui venˇbaˆ te ve hta‸ henˇ yuˬ leh, Yeˍruˆsaˍlehnˍ venˇ hta‸ venˇbaˆ te piˇ lawˬ ve yoˬ. 14Yuˇda‸ chaw hui-oˬ, Mawˍriˆsehˆ Gaˍtaˆ venˇ hta‸ chi beu‸ baˬ taˉ-oˆ. Iˉsaˍreˍlaˆ ve jawˇmawˇ teˇ hpaˍ lehˬ, Aˍhkaˍziˆ venˇ hkʼaw chehˇ ve chaw hui hta‸ gʼaˇ ca va hpeh‸ tuˬ ve maˇ heˆ.
15Maˍreˍshaˆ venˇ yaˇ teˇ hpaˍ-oˬ, Gʼuiˬsha lehˬ nawˬ hui hta‸ canˇ paˍ teˇ hpaˍ ve la‸ sheh hkʼaw lo chiˇ a‸ laˇ tuˬ yoˬ. Yawˇ hui lehˬ, nawˬ hui ve venˇ hta‸ bawˆ yuˬ tuˬ yoˬ. Iˉsaˍreˍlaˆ ve awˬ hoˉ awˬ naˬ teˇ hpaˍ lehˬ, Aˍduˆlanˍ haˉ kʼoˍ hkʼaw gʼa ca va‸ taˍ tuˬ yoˬ. 16Yuˇda‸ chaw teˇ hpaˍ-oˬ, nawˬ hui ha‸ ve yaˇ teˇ hpaˍ awˬ pon dawˇ haˍ leh nawˬ hui ve uˉ hkeh mvuh hta‸ chiˇ baˬ-o‸. Nawˬ hui ve yaˇ teˇ hpaˍ lehˬ, shu mvuhˇmiˬ lo hpeh kʼai ve hta‸ gʼa hkanˍ tuˬ ve pa taw, naˬ beuˬ ngaˆ hkʼa shuˍ a shu yawˇ ve oˉ kʼoˍ hta‸ yiˬ lehˍ te taˍ-o‸.
Currently Selected:
Miˆhkaˍ li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.