Ma‸htehˍ li‸ 5
5
Yeˍsuˆ hkʼaw pui hkʼoˆ lo bon maˍ ve
(ka nanˉ uiˍ 5–7)
Awˬ bon uiˍ ve awˬ lawn
1Chaw awˬ moˍ lonˉ teˇ hpaˍ hta‸ Yeˍsuˆ gʼa mawˬ htaˇ, hkʼaw pui hkʼoˆ lo yawˇ taˆ-e ve yoˬ. Yawˇ mui taˍ htaˇ, yawˇ ve awˬ la‸ gʼawˇ teˇ hpaˍ yawˇ geh laˬ ve yoˬ. 2Oˇ htaˇ yawˇ maw‸ kʼaw ngaˉ leh awˬ la‸ gʼawˇ hui hta‸ maˍ piˇ leh kʼoˆ ve,
3Nyi ma hkʼaw haˍ ve gʼawˇ ve chaw hui awˬ bon uiˍ ve yoˬ.
Awˬ lawn kʼo, mvuhˇ naw ma mvuhˇmiˬ lehˬ, yawˇ hui ve mvuhˇmiˬ hpeh‸ ve yoˬ.
4Dawˇ haˍ gaˇ haˍ ve chaw hui awˬ bon uiˍ ve yoˬ.
Awˬ lawn kʼo, yawˇ hui hta‸ nyi ma sha la piˇ tuˬ yoˬ.
5Nyi ma nuˇ nuˇ nehˬ nehˬ cawˬ ve chaw hui awˬ bon uiˍ ve yoˬ.
Awˬ lawn kʼo, miˬguiˬ lehˬ yawˇ hui gʼa tuˬ ve awˬ shinˉ hpeh‸ ve yoˬ.
6Hteˇ ve cawˇ ve hta‸ meu‸ ve kaˆ ve chaw hui awˬ bon uiˍ ve yoˬ.
Awˬ lawn kʼo, yawˇ hui gʼa caˇ bvuhˆ dawˬ bvuhˆ tuˬ yoˬ.
7Ha kʼaˉ puiˉ ve chaw hui awˬ bon uiˍ ve yoˬ.
Awˬ lawn kʼo, yawˇ hui hta‸ shu kʼaw‸ ha kʼaˉ piˇ tuˬ yoˬ.
8Nyi ma hkʼaw hpu ve kehˬ ve chaw hui awˬ bon uiˍ ve yoˬ.
Awˬ lawn kʼo, yawˇ hui Gʼuiˬsha hta‸ gʼa mawˬ tuˬ yoˬ.
9Cawˇ da‸ hui da‸ tuˬ te ve chaw hui awˬ bon uiˍ ve yoˬ.
Awˬ lawn kʼo, yawˇ hui hta‸ Gʼuiˬsha ve awˬ yaˇ teh‸ shu kʼoˆ tuˬ yoˬ.
10Hteˇ lehˍ cawˇ lehˍ te ve pa taw fawˉ ve mehˍ ve hta‸ gʼa hkanˍ ve chaw hui awˬ bon uiˍ ve yoˬ.
Awˬ lawn kʼo, mvuhˇ naw ma mvuhˇmiˬ lehˬ, yawˇ hui ve mvuhˇmiˬ hpeh‸ ve yoˬ.
11Ngaˬ hta‸ pa taw shu nawˬ hui hta‸ hkʼa mvuhˇ hkʼa na kʼoˆ ve, fawˉ mehˍ ve, heˍ leh nawˬ hui awˬ lawn haiˬ ve teˇ ceuˬ le le hta‸ kʼoˆ ve teˇ yanˇ, nawˬ hui awˬ bon uiˍ ve yoˬ. 12Ha lehˬ ve hkʼa biˇ cawˬ piˇ-oˆ. Awˬ lawn kʼo, mvuhˇ naw ma hkʼoˆ lo nawˬ hui ve la‸ shawnˍ uiˍ jaˇ ve yoˬ. Nawˬ hui awˬ gʼuˇ suhˍ tawˆ la peuˬ ve Gʼuiˬsha ve tcuh kaˍ paˍ hui hta‸ htawˇ shu oˇ hkʼe te fawˉ mehˍ jaw ve yoˬ.
Miˬguiˬ ve aˉ leh‸
13Nawˬ hui lehˬ miˬguiˬ ve aˉ leh‸ hpeh‸ ve yoˬ. Aˉ leh‸ lehˬ mehˬ ve pehˆ kʼai peuˬ ve kʼo, hkʼaˬ hkʼe te kʼaw‸ mehˬ la hpeh‸ tuˬ le. Aˉ leh‸ oˇ ve awˬ bon maˇ kʼaw‸ cawˬ ve pa taw, shu yuˬ baˬ leh, chaw yaˇ naˆ toˇ ve ceh tiˉ yoˬ.
Miˬguiˬ ve awˬ gʼeuˆ
14Nawˬ hui lehˬ miˬguiˬ ve awˬ gʼeuˆ hpeh‸ ve yoˬ. Hkʼaw pui hkʼoˆ lo cawˬ ve venˇ hta‸ faˉ taˍ maˇ gʼa. 15Chi hkʼoˆ ka‸, kawˆ faiˇ tuˉ leh hkʼawˍ lawˇ tcuhˍ mvuh‸ taˍ ve teˇ ceuˬ chaw teˇ gʼaˇ ka‸ maˇ te jaw. Ya‸ hkʼaˇ, yehˬ yaˇ kʼa yaˇ hkʼa peu-eˬ awˬ gʼeuˆ hta‸ gʼa mawˬ tuˬ, mvuh kuiˬ lo taˍ ve yoˬ. 16Oˇ ve hkʼa shuˍ shuˍ, nawˬ hui htawˇ awˬ gʼeuˆ ba piˇ-oˆ. Oˇ hkʼe te ve kʼo, nawˬ hui ve da‸ ve kanˉ hta‸ shu gʼa mawˬ htaˇ, mvuhˇ naw ma hkʼoˆ chehˇ ve naw hui ve Awˬ pa hta‸ chiˇ uiˍ chiˇ mvuh piˇ tuˬ yoˬ.
Awˬliˇtawˇhkawˇ awˬ lawn
17Awˬliˇtawˇhkawˇ leh Gʼuiˬsha ve tcuh kaˍ paˍ hui ve tawˇ hkawˇ hta‸ te luˬ tuˬ ngaˬ laˬ ve teh‸ taˇ dawˇ. Te luˬ tuˬ ngaˬ laˬ ve maˇ heˆ. Te biˇ la tuˬ ngaˬ laˬ ve yoˬ. 18Ngaˬ nawˬ hui hta‸ awˬ tehˬ awˬ na kʼoˆ laˇ ve, miˬguiˬ mvuhˇ naw ma maˇ luˬ sheˍ ve ceh ceh, hkʼa peu-eˬ biˇ la htaˇ hkʼa gaˬ awˬliˇtawˇhkawˇ awˬ hkʼaw lo li‸ mehˆ ehˉ maˇ kʼoˆ, awˬ maiˉ ehˉ maˇ kʼoˆ, teˇ maˬ ka‸ maˇ luˬ maˇ mehˉ taˬ. 19Hkʼe te leh, hkʼaˬ ve chaw teˇ gʼaˇ maˇ kʼoˆ, awˬliˇtawˇhkawˇ chi teˇ hpaˍ awˬ hkʼaw lo i jaˇ ve teˇ maˬ maˬ hta‸ yawˇ awˬ to ka‸ maˇ te leh, shu ka‸ maˇ te tuˬ maˍ piˇ ve chaw lehˬ, mvuhˇ naw ma hkʼoˆ lo shu a‸ kehˉ i ve chaw hpeh‸ tuˬ yoˬ. Ya‸ hkʼaˇ, hkʼaˬ ve chaw teˇ gʼaˇ maˇ kʼoˆ, yawˇ awˬ to ka‸ te leh, shu ka‸ te tuˬ maˍ piˇ ve chaw lehˬ, mvuhˇ naw ma hkʼoˆ lo uiˍ ve chaw hpeh‸ tuˬ yoˬ. 20Awˬ lawn kʼo, li‸ bvuh‸ paˍ leh Hpaˍriˍsehˇ hui a‸ kehˉ nawˬ hui hteˇ ve cawˇ ve teˇ ceuˬ maˇ cawˬ leuˉ ve kʼo, nawˬ hui mvuhˇ naw ma mvuhˇmiˬ hkʼaw lo maˇ gʼa lo‸-e taˬ teh‸, ngaˬ nawˬ hui hta‸ kʼoˆ laˇ ve yoˬ.
Nyi ma zuhˆ ve awˬ lawn
21Aˬ sho-eˬ ve chaw hui hta‸ kʼoˆ piˇ ve tawˇ hkawˇ nawˬ hui gʼa kaˇ peuˬ. Shu hta‸ nawˬ maˇ gʼa tiˇ pehˍ. Shu hta‸ tiˇ pehˍ ve chaw lehˬ, suhˉ jehˬ ve hta‸ gʼa hkanˍ ve yoˬ. #Taw 20:13 22Ya‸ hkʼaˇ, ngaˬ nawˬ hui hta‸ kʼoˆ laˇ ve, awˬ viˉ awˬ nyi hta‸ nyi ma zuhˆ ve chaw lehˬ, suhˉ jehˬ ve hta‸ gʼa hkanˍ ve yoˬ. Yawˇ ve awˬ viˉ awˬ nyi hta‸ maˇ shawˍ maˇ caˆ kʼoˆ ve chaw lehˬ, jehˬ shehˍ hpaˇ awˬ moˍ mehˆ gʼuˇ suhˍ lo suhˉ jehˬ ve hta‸ gʼa hkanˍ ve yoˬ. Awˬ viˉ awˬ nyi hta‸ hkeu ve chaw lehˬ, moˬ naˆ ho‸ aˬ miˍ hkʼaw gʼa hkanˍ ve yoˬ. 23Hkʼe te leh, nawˬ ve tanˇ tuˬ hta‸ tanˇ kuiˬ lo yuˬ laˬ htaˇ, nawˬ ve awˬ viˉ awˬ nyi nawˬ awˬ hkʼoˆ venˇbaˆ teˇ ceuˬ ceuˬ taˍ ve hta‸ nawˬ dawˇ nawˇ ve kʼo, 24tanˇ kuiˬ awˬ gʼuˇ suhˍ lo tanˇ tuˬ hta‸ teh taˉ leh kʼo‸-e sheˍ. Awˬ viˉ awˬ nyi hta‸ nawˬ kʼaw‸ cawˇ da‸ taˉ peuˬ heh‸, kʼaw‸ laˬ leh tanˇ tuˬ hta‸ yuˬ tanˇ loˬ.
25Nawˬ hta‸ tawˇ te ve chaw geh teˇ geh shaˉ nanˉ lo kʼai chehˇ htaˇ, nawˬ huiˉ maˬ kʼaw‸ cawˇ da‸ tuˬ haˆ haˆ te loˬ. Hkʼe maˇ heˆ kʼo, yawˇ lehˬ suhˉ taˆ shehˍ hpaˇ la‸ hkʼaw lo nawˬ hta‸ chiˇ a‸ piˇ tuˬ yoˬ. Suhˉ taˆ shehˍ hpaˇ htawˇ nawˬ hta‸ htawnˍ awˬ hoˉ la‸ hkʼaw lo kʼaw‸ chiˇ a‸ piˇ leh, nawˬ hta‸ htawnˍ hkʼaw keu laˇ tuˬ yoˬ. 26Ngaˬ nawˬ hta‸ awˬ tehˬ awˬ na kʼoˆ laˇ ve, peh‸ shanˍ awˬ leh teˇ peh‸ hkʼa gaˬ maˇ shaiˍ peuˬ ve ceh ceh, htawnˍ hkʼaw lo nawˬ maˇ gʼa tawˆ kʼai taˬ.
Haˉ chawˇ haˉ paˆ te ve awˬ lawn
27Nawˬ haˉ chawˇ haˉ paˆ maˇ gʼa te teh‸ kʼoˆ taˍ ve tawˇ hkawˇ hta‸ nawˬ hui gʼa kaˇ peuˬ. #Taw 20:14 28Ya‸ hkʼaˇ, ngaˬ nawˬ hui hta‸ kʼoˆ laˇ ve, yaˇ miˇ hta‸ nyi leh peh‸ ve tzuhˆ ve nyi ma cawˬ ve chaw teˇ gʼaˇ le le lehˬ, a shu yawˇ ve nyi ma awˬ hkʼaw lo yaˇ miˇ oˇ ve hta‸ haˉ chawˇ haˉ paˆ te peuˬ. 29Hkʼe te leh, nawˬ la‸ sha paˉ ve mehˆ shiˍ nawˬ hta‸ te ya‸ piˇ lawˬ ve kʼo, mehˆ shiˍ oˇ ve hta‸ kʼehˉ baˬ sheˍ. Awˬ to hkʼa peu-eˬ moˬ naˆ ho‸ awˬ hkʼaw lo gʼa hkanˍ ve a‸ kehˉ, awˬ hkʼeun teˇ maˬ luˬ kʼai ve lehˬ da‸ leuˉ ve yoˬ. 30Oˇ ve hkʼa shuˍ shuˍ, la‸ sha paˉ ve la‸ sheh htawˇ nawˬ hta‸ te ya‸ piˇ lawˬ ve kʼo, la‸ sheh oˇ ve hta‸ tawˆ baˬ-o‸. Awˬ to teˇ to hkʼa peu-eˬ moˬ naˆ ho‸ awˬ hkʼaw lo gʼa hkanˍ ve a‸ kehˉ, awˬ hkʼeun teˇ maˬ luˬ kʼai ve lehˬ da‸ leuˉ ve yoˬ.
Awˬ miˇ ma hta‸ baˬ ve awˬ lawn
31A shu yawˇ ve awˬ miˇ ma hta‸ baˬ ve kʼo, baˬ da‸ ve li‸ teˇ kʼoˆ yawˇ hta‸ gʼa piˇ tuˬ yoˬ teh‸ kʼoˆ taˍ ve tawˇ chi teˇ hkawˇ hta‸ ka‸ nawˬ hui gʼa kaˇ peuˬ. #Bon 24:3 32Ya‸ hkʼaˇ, ngaˬ nawˬ hui hta‸ kʼoˆ laˇ ve, haˉ chawˇ haˉ paˆ te ve maˇ heˆ kʼo, awˬ kaˍ awˬ nu awˬ lawn hta‸ pa taw a shu yawˇ ve awˬ miˇ ma hta‸ baˬ ve kʼo, yawˇ lehˬ yawˇ ve awˬ miˇ ma hta‸ haˉ chawˇ haˉ paˆ te tcuh ve yoˬ. Shu baˬ taˍ ve yaˇ miˇ hta‸ ca heuˆ ve chaw htawˇ haˉ chawˇ haˉ paˆ te ve yoˬ.
Hkanˍ ve awˬ lawn
33Maˇ heˆ heˆ ve hta‸ nawˬ maˇ gʼa hkanˍ. Nawˬ hkanˍ taˍ ve hkʼe Jawˇmawˇ Gʼuiˬsha mehˆ gʼuˇ suhˍ gʼa te ve yoˬ teh‸, aˬ sho-eˬ ve chaw hui hta‸ kʼoˆ piˇ taˍ ve tawˇ chi teˇ hkawˇ hta‸ ka‸ nawˬ hui gʼa kaˇ peuˬ. #Taw 20:7, Heh 30:2, Bon 23:21 34Ya‸ hkʼaˇ ngaˬ nawˬ hui hta‸ kʼoˆ laˇ ve, a ciˉ ka‸ taˇ hkanˍ. Mvuhˇ naw ma hta‸ cuˇ leh taˇ hkanˍ. Awˬ lawn kʼo, mvuhˇ naw ma lehˬ Gʼuiˬsha ve kʼaw jaw hpeh‸ ve yoˬ. 35Miˬguiˬ hta‸ cuˇ leh taˇ hkanˍ. Awˬ lawn kʼo, miˬguiˬ lehˬ Gʼuiˬsha ve hkui sheh taˍ kuiˬ hpeh‸ ve yoˬ. Yeˍruˆsaˍlehnˍ venˇ hta‸ cuˇ leh taˇ hkanˍ. Awˬ lawn kʼo, venˇ oˇ ve lehˬ Hkunˉ hawˉ hkanˇ lonˉ ve venˇ hpeh‸ ve yoˬ. 36Nawˬ ve oˉ kʼoˍ hta‸ cuˇ leh taˇ hkanˍ. Awˬ lawn kʼo, nawˬ lehˬ uˉ hkeh mvuh teˇ mvuh hpu la tuˬ maˇ kʼoˆ, naˆ la tuˬ maˇ kʼoˆ te maˇ gʼa. 37Nawˬ ve tawˇ hkawˇ lehˬ, yoˬ kʼo yoˬ, maˇ heˆ kʼo maˇ heˆ teh‸ ceh tiˉ kʼoˆ loˬ. Chi a‸ kehˉ leuˉ leh kʼoˆ ve tawˇ hkawˇ teˇ hpaˍ lehˬ, haiˬ ve awˬ hkʼaw lo tawˆ la ve tawˇ hkawˇ hpeh‸ ve yoˬ.
Shu hta‸ hkʼaˬ hkʼe kʼaw‸ te piˇ cawˇ ve awˬ lawn
38Shu nawˬ ve mehˆ shiˍ teˇ shiˍ hta‸ te luˬ laˇ ve kʼo, yawˇ ve mehˆ shiˍ teˇ shiˍ hta‸ kʼaw‸ te luˬ piˇ leh, shu nawˬ ve ciˬ teˇ maˬ hta‸ te hkʼeh‸ laˇ ve kʼo, yawˇ ve ciˬ teˇ maˬ hta‸ kʼaw‸ te hkʼeh‸ piˇ-oˆ teh‸ kʼoˆ taˍ ve awˬliˇtawˇhkawˇ hta‸ nawˬ hui gʼa kaˇ peuˬ. #Taw 21:24 39Ya‸ hkʼaˇ, ngaˬ nawˬ hui hta‸ kʼoˆ laˇ ve, nawˬ hta‸ te ya‸ laˇ ve chaw hta‸ taˇ kʼaw‸ te hkʼaw‸ piˇ. Nawˬ ve la‸ sha paˉ mehˆ hpfuhˇ diˬ hta‸ shu hta laˇ ve kʼo, la‸ mehˍ paˉ kʼaw‸ hpfuhˆ hkʼo piˇ sheˍ. 40Shu nawˬ hta‸ tawˇ te leh aˉ po‸ yuˬ gaˇ ve kʼo, aˉ po‸ lonˉ ka‸ yawˇ hta‸ kʼaw‸ piˇ sheˍ. 41Shu nawˬ hta‸ nyiˉ leh ya‸ kʼaw teˇ laˆ kʼai tcuh laˇ ve kʼo, yawˇ geh nyiˇ laˆ kʼai-o. 42Lawˬ ve chaw hta‸ piˇ-oˆ. Chiˇ gaˇ ngaˍ gaˇ ve chaw hta‸ htawˇ, taˇ hpfuhˆ kʼai.
Canˇ paˍ teˇ hpaˍ awˬ lawn
43A shu yawˇ awˬ paˇ awˬ kui chehˇ ve chaw hta‸ ha‸ leh, a shu yawˇ ve canˇ paˍ hta‸ canˇ-oˆ teh‸ kʼoˆ taˍ ve awˬliˇtawˇhkawˇ hta‸ nawˬ hui gʼa kaˇ peuˬ. #Okʼo 19:18 44Ya‸ hkʼaˇ, ngaˬ nawˬ hui hta‸ kʼoˆ laˇ ve, nawˬ hui ve canˇ paˍ teˇ hpaˍ hta‸ ha‸ leh, nawˬ hui hta‸ fawˉ mehˍ laˇ ve chaw teˇ hpaˍ awˬ pon bon lawˬ piˇ-oˆ. 45Nawˬ hui chi hkʼe te ve kʼo, nawˬ hui lehˬ mvuhˇ naw ma hkʼoˆ chehˇ ve nawˬ hui Awˬ pa ve yaˇ hpeh‸ ve yoˬ. Aw lawn kʼo, chaw haiˬ leh chaw da‸ awˬ hkʼoˆ hta‸ yawˇ ve mvuhˇ nyi hta‸ yawˇ tawˆ la piˇ ve yoˬ. Hteˇ ve chaw leh maˇ hteˇ ve chaw awˬ hkʼoˆ hta‸ yawˇ mvuhˇ yeˬ laˬ piˇ lawˬ ve yoˬ. 46Nawˬ hui hta‸ ha‸ ve chaw hui hta‸ ceh kʼaw‸ ha‸ ve kʼo, aˬ hto‸ ma awˬ bon cawˬ le. Awˬ hkawnˍ shaw paˍ hui ka‸ chi hkʼe te chehˇ ve maˇ heˆ laˇ. 47Nawˬ awˬ viˉ awˬ nyi hta‸ ceh awˬ chawˇ te leh na‸ uˉ te da‸ ve kʼo, shu te ve a‸ kehˉ nawˬ aˬ hto‸ ma te leuˉ ve le. Buiˇ shaˆ aˉ naˆ chaw hui ka‸ chi hkʼe te ve maˇ heˆ laˇ. 48Hkʼe te leh, mvuhˇ naw ma hkʼoˆ chehˇ ve nawˬ ve Awˬ pa biˇ ve hkʼa shuˍshuˍ nawˬ hui htawˇ biˇ la piˇ-oˆ.
Currently Selected:
Ma‸htehˍ li‸ 5: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.