Yawˇlaˆ li‸ 1
1
Awˬ shiˍ awˬ nu luˬ kʼai ve pa taw dawˇ haˍ ve
1Chi ve lehˬ, Beˍtuˍlaˆ ve yaˇ paˍ Yawˇlaˆ geh gaˬ la ve Gʼuiˬsha ve tawˇ hpeh‸ ve yoˬ.
2Nawˬ hui a sha‸ mawˇ peuˬ ve chaw teˇ hpaˍ leh,
Yuˇda‸ mvuhˇmiˬ hkʼaw chehˇ ve chaw hui-oˬ, na sheˍ.
Nawˬ hui teˇ co-e maˇ heˆ kʼo,
nawˬ puˍ nawˬ pi teˇ co-e hkʼaw, chi hkʼe ve awˬ ceuˬ teˇ pawˆ hpeh‸ la jaw laˇ.
3Awˬ lawn chi teˇ hpaˍ, nawˬ hui ve yaˇ teˇ hpaˍ hta‸ hto maˍ piˇ-oˆ.
Nawˬ hui ve yaˇ teˇ hpaˍ lehˬ,
yawˇ hui ve yaˇ teˇ hpaˍ hta‸ teˇ caˉ kʼaw‸ hto maˍ piˇ kʼai tuˬ yoˬ.
4Paˉ ce‸ moˍ lonˉ teˇ moˍ peuˬ teˇ moˍ awˬ cehˬ teˇ hpaˍ hta‸ caˇ baˬ peuˬ ve yoˬ.
Teˇ moˍ caˇ maˇ peuˬ taˉ ve teˇ hpaˍ hta‸ awˬ nu ve teˇ moˍ kʼaw‸ caˇ peuˬ sheˬ ve yoˬ.
5Tzuhˬ bvuhˆ paˍ teˇ hpaˍ-oˬ, nawˇ la leh hawˬ chehˇ-oˆ.
Tzuhˬ dawˬ paˍ teˇ hpaˍ-oˬ, nawˬ hui htawˇ gʼaˇ hte‸ kuˬ hawˬ chehˇ-oˆ.
Nawˬ hui tzuhˬ te dawˬ tuˬ ve a pehˉ meuˇ shiˍ teˇ hpaˍ luˬ kʼai sheˆ kʼai peuˬ.
6Maˇ jaˇ ve paˉ ce‸ moˍ lonˉ lehˬ, ngaˬ hui ve mvuhˇmiˬ hta‸ te luˬ peuˬ.
Yawˇ hui awˬ gʼaˇ uiˍ jaˇ leh, gʼaw maˇ peuˬ htaˇ hkʼa gaˬ maˇ jaˇ ve yoˬ.
Yawˇ hui ve ciˬ lehˬ, laˇ caˬ shiˉ ve ciˬ hkʼa shuˍ tcuhˆ jaˇ ve yoˬ.
7Yawˇ hui lehˬ, ngaˬ hui ve a pehˉ meuˇ te teˇ hpaˍ hta‸ te luˬ leh,
ngaˬ hui ve maˉ nawˆ cehˬ teˇ hpaˍ hta‸ caˇ baˬ peuˬ.
Awˬ guiˬ kʼuˉ hkʼa peu-eˬ hta‸ ka‸ geu‸ baˬ leh,
awˬ kʼaˉ teˇ hpaˍ hpuˉ-ehˍ hpeh‸ la peuˬ.
8Chaw yaˇ teˇ hpaˍ-oˬ, yaˇ miˇ haˉ teˇ gʼaˇ yawˇ heuˆ tuˬ ve chaw haˉ paˍ suh-e ve pa taw dawˇ haˍ leh hawˬ chehˇ ve hkʼe,
nawˬ hui htawˇ gʼaˇ hte‸ kuˬ hawˬ chehˇ-oˆ.
9Bon yehˬ hkʼaw Gʼuiˬsha hta‸ tanˇ piˇ tuˬ ve awˬ shiˍ awˬ nu leh, a pehˉ meuˇ gʼuiˬ maˇ kʼaw‸ cawˬ-o.
Gʼuiˬsha hta‸ tuˉ tanˇ tuˬ maˇ kʼaw‸ cawˬ ve pa taw, paw hkuˇ teˇ hpaˍ htawˇ dawˇ haˍ leh hawˬ chehˇ ve yoˬ.
10Ti mi teˇ hpaˍ goˇ kʼai peuˬ.
Miˬguiˬ lehˬ, dawˇ haˍ leh hkʼanˇ chehˇ ve yoˬ.
Awˬ lawn kʼo, awˬ shiˍ awˬ nu teˇ hpaˍ luˬ kʼai sheˆ kʼai peuˬ.
A pehˉ meuˇ shiˍ teˇ hpaˍ goˇ kʼai peuˬ leh,
shaˍ lonˍ cehˬ teˇ hpaˍ htawˇ nawˍ kʼai goˇ kʼai peuˬ.
11Muiˬ caˇ shehˍ hpaˇ teˇ hpaˍ-oˬ, dawˇ haˍ chehˇ-oˆ.
A pehˉ meuˇ hko hta‸ ha‸ shaˉ chehˇ ve chaw teˇ hpaˍ-oˬ,
gʼaˇ hte‸ hawˬ chehˇ-oˆ.
Awˬ lawn kʼo, caˬ cehˬ leh awˬ kaˍ awˬ nu ve awˬ shiˍ awˬ nu teˇ hpaˍ hkʼa peu-eˬ luˬ kʼai peuˬ.
12A pehˉ meuˇ te leh maˉ nawˆ cehˬ teˇ hpaˍ goˇ kʼai peuˬ.
Awˬ nu ve iˉ shiˍ cehˬ hkʼa peu-eˬ htawˇ nawˍ kʼai goˇ kʼai peuˬ.
Chaw yaˇ ve ha lehˬ tuˬ teˇ hpaˍ mehˉ kʼai peuˬ.
13Tuˉ tanˇ kuiˬ lo kanˉ te chehˇ ve paw hkuˇ teˇ hpaˍ-oˬ,
meh htuˉ pui hpa veu‸ deh leh hawˬ chehˇ-oˆ.
Teˇ haˉ tanˇ hkuinˇ Gʼuiˬsha ve bon yehˬ hkʼaw chehˇ taˍ leh hawˬ chehˇ-oˆ.
Nawˬ hui ve Gʼuiˬsha hta‸ tuˉ tanˇ piˇ tuˬ ve awˬ shiˍ awˬ nu leh, a pehˉ meuˇ gʼuiˬ maˇ kʼaw‸ cawˬ-o.
14Caˇ tuˬ ce leh Gʼuiˬsha hta‸ oˉ kʼoˍ pui tuˬ
chaw yaˇ teˇ hpaˍ hta‸ kuˬ hpawnˬ-o‸.
Awˬ hoˉ awˬ naˬ teˇ hpaˍ leh,
Yuˇda‸ chaw hkʼa peu-eˬ hta‸
nawˬ hui ve Gʼuiˬsha ve bon yehˬ hkʼaw kuˬ hpawnˬ leh,
yawˇ hta‸ gʼaˇ hte‸ kuˬ chehˇ-oˆ.
15Gʼuiˬsha ve awˬ nyi gaˬ la chehˇ ve yoˬ.
Kanˇ paˆ uiˍ ve Gʼuiˬsha lehˬ, luˬ ve sheˆ ve teˇ ceuˬ hta‸ yuˬ laˬ tuˬ yoˬ.
Awˬ nyi oˇ ve lehˬ, hkʼaˬ ma kawˆ tuˬ cawˬ ve le.
16Awˬ shiˍ awˬ nu teˇ hpaˍ luˬ kʼai sheˆ kʼai ve hta‸ ngaˬ hui hkʼa tawˍ lehˆ gʼa mawˬ peuˬ.
Ngaˬ hui ve Gʼuiˬsha ve bon yehˬ hkʼaw lo htawˇ, ha lehˬ tuˬ ve maˇ kʼaw‸ cawˬ.
17Awˬ yawˇ teˇ hpaˍ lehˬ, goˇ choˆ jaˇ ve miˬguiˬ hkʼaw suh peuˬ sheˬ ve yoˬ.
Shaw hpoˆ taˍ tuˬ ve awˬ shiˍ awˬ nu a ciˉ ka‸ maˇ kʼaw‸ cawˬ.
Hkʼe te leh, caˬ ciˇ yehˬ teˇ hpaˍ luˬ kʼai paˆ kʼai chehˇ ve yoˬ.
18Meu‸ ve kaˆ ve hta‸ pa taw, ceˇ teˇ hpaˍ kuˬ chehˇ ve yoˬ.
Awˬ lawn kʼo, yawˇ hui awˬ pon kʼaˆ caˇ kuiˬ maˇ kʼaw‸ cawˬ.
Yawˬ teˇ hpaˍ htawˇ gʼa hkanˍ jaˇ chehˇ ve yoˬ.
19Gʼuiˬsha-oˬ, ngaˬ nawˬ hta‸ kuˬ chehˇ ve yoˬ.
Awˬ lawn kʼo, zuhˇ de leh suhˆ tsuh de teˇ hpaˍ lehˬ,
aˬ miˍ to‸ ve hta‸ gʼa hkanˍ ve hkʼa shuˍ, nawˍ kʼai goˇ kʼai peuˬ.
20Haiˬ ve to nuˇ to shaˆ teˇ hpaˍ htawˇ, nawˬ hta‸ kuˬ chehˇ ve yoˬ.
Awˬ lawn kʼo, iˉ kaˆ lawˬ kʼaˉ teˇ hpaˍ htawˇ fiˍ kʼai goˇ kʼai ve yoˬ.
Currently Selected:
Yawˇlaˆ li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.