Yaˍkoˆ li‸ 1
1
Awˬ chawˇ hui hta‸ dawˇ nawˇ ve hkawˇ
1Ngaˬ lehˬ, Gʼuiˬsha leh Jawˇmawˇ Yeˍsuˆ Hkri‸ ve awˬ ceˬ Yaˍkoˆ yoˬ. Nawˬ hui hpaˆ da‸ kʼai peuˬ ve chaw teˇ chi nyiˇ ceuˬ awˬ hkʼoˆ lo dawˇ sha ha lehˬ tuˬ cawˬ piˇ-oˆ.
Gʼuiˬsha geh cuˇ yiˍ gʼa ve awˬ lawn
2Ngaˬ ve awˬ viˉ awˬ nyi teˇ hpaˍ-oˬ, beˬ ve lawˇ ve laiˉ ceuˬ hta‸ gʼa hpuˇ da‸ ve teˇ yanˇ ha lehˬ chehˇ-oˆ. 3Awˬ lawn kʼo, nawˬ hui yonˍ ve nyi ma lehˬ, lawˇ nyi ve hta‸ gʼa hpuˇ da‸ htaˇ, nawˬ hui yeunˇ hkanˍ puiˉ la tuˬ ve hta‸ nawˬ hui shiˍ ve yoˬ. 4Nawˬ hui teˇ ceuˬ ka‸ maˇ yawnˇ kʼai leh, teˇ ceuˬ le le awˬ hkʼaw lo hkʼa biˇ hpeh‸ la tuˬ yeunˇ hkanˍ puiˉ ve nyi ma biˇ la htaˇ hkʼa gaˬ te-o. 5Nawˬ hui awˬ hkʼaw lo teˇ gʼaˇ gʼaˇ cuˇ yiˍ maˇ biˇ ve kʼo, Gʼuiˬsha geh lawˬ-o‸. Gʼuiˬsha lehˬ, maˇ deˇ leh chaw hkʼa peu-eˬ hta‸ maˇ chaweh hkʼe leˇ piˇ ve hkʼa shuˍ shuˍ, cuˇ yiˍ lawˬ ve chaw hta‸ ka‸ piˇ tuˬ yoˬ. 6Ya‸ hkʼaˇ, yonˍ ve awˬ hkʼaw lo lawˬ-o‸. Nyi ma htawˇdawˇnawˬdawˇ taˇ te. Awˬ lawn kʼo, nyi ma htawˇ dawˇ nawˬ dawˇ te ve chaw lehˬ, laˇ tsuhˇ gʼuiˬ hta‸ mvuhˇ haw meuˆ leh gʼuiˬ baˇ taˆ taˆ ya‸ ya‸ te ve hkʼe hpeh‸ ve yoˬ. 7Oˇ hkʼe ve chaw lehˬ, Jawˇmawˇ Gʼuiˬsha geh yawˇ teˇ ceuˬ ceuˬ gʼa tuˬ ve teh‸ taˇ dawˇ. 8Yawˇ lehˬ, nyi ma nyiˇ shiˍ cawˬ ve chaw hpeh‸ leh, hkʼa peu-eˬ awˬ hkʼaw lo yawˇ maˇ yeˬ ve chaw hpeh‸ ve yoˬ.
9Shu awˬ hawˉ lo chehˇ ve awˬ viˉ awˬ nyi teˇ gʼaˇ gʼaˇ, awˬ me‸ awˬ hponˇ cawˬ ve chehˇ kuiˬ awˬ hkʼaw lo gʼa chehˇ ve kʼo, yawˇ ha lehˬ cawˇ ve yoˬ. 10Paw sha ve awˬ viˉ awˬ nyi teˇ gʼaˇ gʼaˇ, awˬ me‸ awˬ hponˇ maˇ cawˬ ve chehˇ kuiˬ awˬ hkʼaw lo gʼa chehˇ ve kʼo, yawˇ htawˇ ha lehˬ cawˇ ve yoˬ. Awˬ lawn kʼo, paw sha ve chaw lehˬ, mvuh‸ veˆ hkʼa shuˍ shuˍ mehˉ kʼai tuˬ yoˬ. 11Mvuhˇ nyi tawˆ la leh, haw jaˇ chiˆ jaˇ ve teˇ yanˇ, mvuh‸ lehˬ nawˍ kʼai goˇ kʼai ve yoˬ. Awˬ veˆ ka‸ piˬ kʼai ce kʼai leh, nyi sha ve awˬ ceuˬ ka‸ mehˉ kʼai ve yoˬ. Oˇ ve hkʼa shuˍ shuˍ, paw sha ve chaw lehˬ, yawˇ te chehˇ ve kanˉ awˬ hkʼaw lo luˬ kʼai mehˉ kʼai tuˬ yoˬ.
Beˬ ve lawˇ ve hta‸ hpuˇ ve awˬ lawn
12Beˬ ve lawˇ ve hta‸ gʼa hpuˇ da‸ htaˇ, yeunˇ hkanˍ puiˉ ve chaw lehˬ, awˬ bon uiˍ ve yoˬ. Awˬ lawn kʼo, lawˇ nyi ve teˇ ceuˬ hta‸ hkanˍ gʼaˇ peuˬ hkʼaw‸ nawˉ, co ti‸ ha ti‸ shi uˉ tcuhˍ hta‸ yawˇ gʼa tuˬ yoˬ. Shi uˉ tcuhˍ oˇ ve lehˬ, Gʼuiˬsha hta‸ ha‸ ve chaw teˇ hpaˍ hta‸ yawˇ piˇ tuˬ yoˬ teh‸ kʼoˆ taˍ ve yoˬ. 13Venˇbaˆ beˬ ve hta‸ gʼa hkanˍ ve teˇ yanˇ, Gʼuiˬsha ngaˬ hta‸ beˬ chehˇ ve yoˬ teh‸, teˇ gʼaˇ ka‸ taˇ kʼoˆ. Awˬ lawn kʼo, haiˬ ve awˬ ceuˬ Gʼuiˬsha hta‸ beˬ maˇ hpeh‸. Haiˬ ve te tuˬ Gʼuiˬsha chaw teˇ gʼaˇ hta‸ ka‸ maˇ beˬ. 14Hkʼaˬ ve chaw teˇ gʼaˇ maˇ kʼoˆ, a shu yawˇ sheˉ lai puiˉ ve nyi ma lehˬ, venˇ baˆ te tuˬ yawˇ hta‸ heˍ yuˬ beˬ yuˬ chehˇ ve yoˬ. 15Oˇ htaˇ, sheˉ lai puiˉ ve nyi ma lehˬ, yaˇ hu ve hkʼe yawˇ awˬ hkʼaw lo hu la leh, venˇbaˆ hta‸ paw la piˇ ve yoˬ. Venˇbaˆ htawˇ, uiˍ la biˇ la ve teˇ yanˇ, suh ve teˇ ceuˬ hta‸ paw la piˇ ve yoˬ.
16Ngaˬ ha‸ ve awˬ viˉ awˬ nyi teˇ hpaˍ-oˬ, taˇ dawˇ ya‸. 17Da‸ ve awˬ bon hkʼa peu-eˬ leh, biˇ ve la‸ shawnˍ hkʼa peu-eˬ, mvuhˇ naw ma lo chehˇ ve awˬ gʼeuˆ ve Awˬ pa geh ya‸ la ve yoˬ. Yawˇ lehˬ maˇ pa puiˉ. Yawˇ ve awˬ gʼeuˆ awˬ hkʼaw lo aˉ gʼuiˬ ha ka‸ maˇ cawˬ. 18Hpanˍ taˍ ve awˬ ceuˬ hkʼa peu-eˬ awˬ hkʼaw lo ngaˬ hui lehˬ, awˉ lawˉ naw‸ la ve iˉ shiˍ hkʼe hpeh‸ la tuˬ, yawˇ a loˍ cawˇ ve hta‸ pa taw, hteˇ ve cawˇ ve bon hkawˇ hta‸ cuˇ leh ngaˬ hui hta‸ paw la piˇ ve yoˬ.
Tawˇ hkawˇ hta‸ na yuˬ leh te ve chaw awˬ lawn
19Ngaˬ ha‸ ve awˬ viˉ awˬ nyi teˇ hpaˍ-oˬ, awˬ lawn chi hta‸ nawˬ hui shiˍ cawˇ ve yoˬ. Shu tawˇ yaw ve hta‸ hkʼa deh‸ na sheˍ. Tawˇ haˆ haˆ taˇ yaw. Nyi ma haˆ haˆ taˇ zuhˆ. 20Awˬ lawn kʼo, chaw yaˇ nyi ma zuhˆ ve teˇ ceuˬ lehˬ, Gʼuiˬsha ve hteˇ ve cawˇ ve hta‸ tawˆ la tuˬ te maˇ gʼa. 21Chi hta‸ pa taw, cha‸ chiˆ ve hkʼa peu-eˬ leh, haiˬ ve hta‸ te ponˬ te leuˉ ve hkʼa peu-eˬ hta‸ baˬ taˉ-oˆ. Nawˬ hui ve co ha hta‸ htaiˍ hkʼaw‸ puiˉ ve, nawˬ hui awˬ hkʼaw ti taˍ ve bon hkawˇ hta‸ nyi ma nuˇ nehˬ ve awˬ hkʼaw lo ha‸ yuˬ-o‸,
22Nawˬ hui lehˬ, bon hkawˇ hta‸ na yuˬ leh te ve chaw hpeh‸ piˇ-oˆ. Kaˇ ve chaw ceh tiˉ taˇ hpeh‸ piˇ. Kaˇ ve chaw ceh tiˉ hpeh‸ ve kʼo, nawˬ hui a shu yawˇ awˬ to hta‸ heˍ paˍ hpeh‸ ve yoˬ. 23Tawˇ hkawˇ oˇ ve hta‸ gʼa kaˇ leh maˇ te ve chaw hkʼaˬ ve teˇ gʼaˇ maˇ kʼoˆ, mehˆ gʼeuˆ awˬ hkʼaw lo a shu yawˇ ve mehˆ hpfuhˇ hta‸ nyi ve chaw hta‸ shuˍ ve yoˬ. 24Awˬ lawn kʼo, yawˇ mehˆ hpfuhˇ hta‸ nyi peuˬ hkʼaw‸ nawˉ, yawˇ tawˆ kʼai leh, yawˇ awˬ ho‸ awˬ han hkʼaˬ hkʼe cawˬ ve hta‸ teˇ cawˬ haˉ leunˇ kʼai ve yoˬ. 25Chaw hta‸ ponˬ piˇ ve, biˇ ve awˬliˇtawˇhkawˇ hta‸ nyi tcuhˉ taˍ ve chaw teˇ gʼaˇ lehˬ, kaˇ leh leunˇ kʼai ve chaw maˇ heˆ. Ya‸ hkʼaˇ, yawˇ na yuˬ leh te ve chaw hpeh‸ ve pa taw, yawˇ hkʼa te ve kanˉ teˇ hpaˍ awˬ hkʼaw lo awˬ bon uiˍ ve yoˬ.
26Chaw teˇ gʼaˇ gʼaˇ, oˉ kʼoˍ pui ve awˬ liˇ hta‸ yawˇ hkʼa deh‸ te ve teh‸ dawˇ htawˇ, yawˇ ve ha tehˍ hta‸ maˇ gʼaˇ ve kʼo, yawˇ awˬ to hta‸ heˍ chehˇ ve yoˬ. Yawˇ oˉ kʼoˍ pui ve lehˬ hkʼe leˇ hpeh‸ ve yoˬ. 27Awˬ pa Gʼuiˬsha mehˆ gʼuˇ suhˍ cha‸ chiˆ ve maˇ cawˬ leh da‸ kehˬ ve oˉ kʼoˍ pui ve awˬ liˇ lehˬ chi hkʼe yoˬ. Yaˇcuˬshi leh mehˇchawˇma teˇ hpaˍ gʼa tu‸ gʼa hkanˍ ve teˇ yanˇ, yawˇ hui hta‸ nyi ha‸ shaˉ leh, a shu yawˇ awˬ to hta‸ miˬguiˬ ve cha‸ chiˆ ve teˇ hpaˍ maˇ gʼa ngawˉ tuˬ gʼa faˬ taˍ ve yoˬ.
Currently Selected:
Yaˍkoˆ li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.