Eˇfeˇsu‸ li‸ 1
1
Awˬ chawˇ hui hta‸ dawˇ nawˇ ve hkawˇ
1Gʼuiˬsha ve a loˍ cawˇ ve hta‸ pa taw, Yeˍsuˆ Hkri‸ ve tcuh yaˇ hpeh‸ ve ngaˬ Pawˇlu‸ lehˬ, Eˇfeˇsu‸ venˇ hkʼaw chehˇ ve Hkri‸ yaˇ hpeh‸ leh Yeˍsuˆ Hkri‸ hta‸ yonˍ yeˬ ve chaw hui hta‸ li‸ chi teˇ kʼoˆ bvuh‸ laˇ ve yoˬ.
2Ngaˬ hui ve Awˬ pa Gʼuiˬsha leh Jawˇmawˇ Yeˍsuˆ Hkri‸ ve awˬ bon awˬ shinˉ leh dawˇ sha gaˇ sha tuˬ nawˬ hui geh cawˬ piˇ-oˆ.
Yeˍsuˆ hta‸ pa taw awˬ bon gʼa ve awˬ lawn
3Ngaˬ hui Jawˇmawˇ Yeˍsuˆ Hkri‸ ve Awˬ pa Gʼuiˬsha hta‸ chiˇ mvuh-o. Yawˇ lehˬ, co ha hpawˇ awˬ pon mvuhˇ naw ma hta‸ caˉ da‸ ve awˬ bon teˇ ceuˬ le le, Hkri‸ hta‸ cuˇ leh ngaˬ hui hta‸ na‸ laˇ peuˬ. 4Miˬguiˬ maˇ te hpanˍ sheˍ htaˇ ka‸, Gʼuiˬsha lehˬ ngaˬ hui hta‸ ha‸ leh, Hkri‸ awˬ hkʼaw lo ngaˬ hui hta‸ leuˆ yuˬ taˍ peuˬ. Ngaˬ hui lehˬ, yawˇ mehˆ gʼuˇ suhˍ da‸ kehˬ ve chaw leh, ya‸ kuiˬ maˇ cawˬ ve chaw gʼa hpeh‸ tuˬ, yawˇ ngaˬ hui hta‸ leuˆ yuˬ taˍ ve yoˬ.
5Yeˍsuˆ Hkri‸ hta‸ pa taw ngaˬ hui Gʼuiˬsha ve awˬ yaˇ hpeh‸ la tuˬ, awˉ lawˉ htaˇ ka‸ yawˇ ngaˬ hui hta‸ fuiˍ teh taˍ peuˬ. Chi hkʼe te tuˬ, Gʼuiˬsha yawˇ nyi ma cawˇ ve yoˬ. 6Yawˇ ve awˬ bon hta‸ chiˇ mvuh tuˬ, Gʼuiˬsha ha‸ jaˇ ve yawˇ ve Yaˇ hpu awˬ hkʼaw lo, awˬ me‸ awˬ hponˇ cawˬ ve yawˇ ve awˬ bon ngaˬ hui hta‸ yawˇ pe‸ laˇ taˍ ve yoˬ. 7Yaˇ hpu ve awˬ suhˍ hta‸ pa taw, yawˇ awˬ hkʼaw lo ngaˬ hui htaiˍ hkʼaw‸ ve hta‸ gʼa peuˬ. Yeˍsuˆ yawˇ ve awˬ bon uiˍ jaˇ maˇ jaˇ ve hta‸ pa taw, ngaˬ hui ve ya‸ kuiˬ jiˆ kuiˬ teˇ hpaˍ hta‸ yawˇ hpehˇ hkʼa laˇ ve yoˬ.
8Cuˇ yiˍ maˍ yiˍ leh shiˍ puiˉ ve awˬ hkʼaw lo ceh tiˉ, Gʼuiˬsha ve awˬ bon ngaˬ hui hta‸ shaˬ te shaˬ maˇ la tuˬ yawˇ te laˇ ve yoˬ. 9Awˬ lawn kʼo, ponˬ laˬ htaˇ Gʼuiˬsha ve a loˍ lehˬ faˉ taˍ ve ka‸, chi beu‸ ngaˬ hui hta‸ Gʼuiˬsha yawˇ hpeu‸ maˍ laˇ peuˬ. Yeˍsuˆ hta‸ cuˇ leh chi hkʼe te tuˬ yawˇ nyi ma cawˇ ve yoˬ. 10Hkʼaˬ hkʼe le teh‸ kʼoˆ kʼo, awˬ yanˇ biˇ la ve teˇ yanˇ, mvuhˇ naw ma hkʼoˆ cawˬ ve awˬ ceuˬ hkʼa peu-eˬ maˇ kʼoˆ, miˬguiˬ hkʼoˆ cawˬ ve awˬ ceuˬ hkʼa peu-eˬ maˇ kʼoˆ, Hkri‸ awˬ hkʼaw lo Gʼuiˬsha tcuhˉ da‸ caˉ da‸ piˇ leh, yawˇ hta‸ uˉ peunˍ tcuh tuˬ yoˬ.
11Yeˍsuˆ hta‸ pa taw, ngaˬ hui htawˇ awˬ shinˉ caˇ shehˍ hpaˇ hpeh‸ la peuˬ. Yawˇ a loˍ cawˇ ve hkʼe hkʼa peu-eˬ hta‸ te ve yoˬ. Gʼuiˬsha lehˬ, yawˇ dawˇ taˍ ve hkʼe, awˉ lawˉ htaˇ ka‸ ngaˬ hui hta‸ fuiˍ teh taˍ peuˬ. 12Hkri‸ hta‸ awˉ lawˉ dawˇ law taˍ ve ngaˬ hui teˇ hpaˍ lehˬ, yawˇ ve awˬ me‸ awˬ hponˇ hta‸ chiˇ mvuh tuˬ ve awˬ pon, yawˇ ngaˬ hui hta‸ fuiˍ teh taˍ peuˬ.
13Nawˬ hui htawˇ, nawˬ hui gʼa ponˬ ve awˬ lawn ha lehˬ ve bon hkawˇ teh‸ kʼoˆ ve, hteˇ ve cawˇ ve tawˇ hkawˇ hta‸ gʼa kaˇ peuˬ leh, Yeˍsuˆ hta‸ yonˍ peuˬ hkʼaw‸ nawˉ, peu laˇ tuˬ yoˬ teh‸ kʼoˆ taˍ ve da‸ ve kehˬ ve Awˬ ha hpu hta‸ cuˇ leh, Gʼuiˬsha nawˬ hui hta‸ maiˉ taˍ peuˬ. 14Gʼuiˬsha ve awˬ shinˉ hta‸ ngaˬ hui hkʼa biˇ gʼa caˇ tuˬ ve hta‸ shiˍ tuˬ, chi beu‸ ka‸ yawˇ ve Awˬ ha hpu ngaˬ hui hta‸ pe‸ laˇ taˍ peuˬ. Chi lehˬ, yawˇ ve awˬ me‸ awˬ hponˇ hta‸ ngaˬ hui chiˇ mvuh tuˬ ve awˬ pon yoˬ.
Yawˇ hui dawˇ shiˍ dawˇ pawnˍ tuˬ bon lawˬ ve
15Nawˬ hui Jawˇmawˇ Yeˍsuˆ hta‸ yonˍ leh, Hkri‸ yaˇ hui hkʼa peu-eˬ hta‸ ha‸ ve awˬ lawn ngaˬ gʼa kaˇ peuˬ. 16Hkʼe te leh, nawˬ hui hta‸ pa taw ngaˬ Gʼuiˬsha hta‸ hkʼaˬ htaˆ ka‸ chiˇ mvuh leh, nawˬ hui awˬ pon bon lawˬ chehˇ ve yoˬ. 17Ngaˬ bon lawˬ htaˇ, awˬ me‸ awˬ hponˇ uiˍ ve Awˬ pa hpeh‸ ve, ngaˬ hui ve Jawˇmawˇ Yeˍsuˆ Hkri‸ ve Gʼuiˬsha lehˬ, yawˇ ve awˬ lawn hta‸ nawˬ hui shiˍ tuˬ, dawˇ shiˍ puiˉ ve nyi ma leh hpeu‸ maˍ ve teˇ hpaˍ hta‸ shiˍ puiˉ ve nyi ma yawˇ nawˬ hui hta‸ piˇ tuˬ ngaˬ lawˬ ve yoˬ. 18Yawˇ nawˬ hui hta‸ kuˬ yuˬ ve hta‸ pa taw, dawˇ law tuˬ hkʼaˬ hkʼe cawˬ ve maˇ kʼoˆ, Hkri‸ yaˇ hui gʼa tuˬ ve awˬ shinˉ hkʼaˬ ma uiˍ jaˇ maˇ jaˇ ve leh hkʼaˬ ma awˬ me‸ awˬ hponˇ cawˬ ve maˇ kʼoˆ, nawˬ hui ve nyi ma awˬ hkʼaw lo hkʼa tawˍ lehˆ dawˇ mawˬ hpeh‸ tuˬ ngaˬ bon lawˬ chehˇ ve yoˬ. 19Chi hkʼoˆ ka‸, ngaˬ hui hkʼa yonˍ ve chaw teˇ hpaˍ awˬ pon, kʼoˆ maˇ peuˬ htaˇ hkʼa gaˬ yawˇ ve kanˇ paˆ hkʼaˬ ma uiˍ jaˇ ve hta‸ nawˬ hui shiˍ tuˬ ve ka‸, ngaˬ bon lawˬ ve yoˬ. Chi hta‸ Gʼuiˬsha te htaˇ, kanˇ paˆ uiˍ jaˇ hehnˇ jaˇ ve awˬ hkʼaw lo yawˇ te ve yoˬ. 20Kanˇ paˆ oˇ ve lehˬ, Hkri‸ hta‸ suh kuiˬ lo kʼaw‸ te‸ tu la piˇ leh, mvuhˇ naw ma hkʼoˆ Gʼuiˬsha yawˇ ve la‸ sha paˉ lo yawˇ hta‸ mui tcuh taˍ ve yoˬ. 21Yawˇ lehˬ, uˉ peunˍ shehˍ hpaˇ hkʼa peu-eˬ, kanˇ paˆ uiˍ shehˍ hpaˇ hkʼa peu-eˬ, awˬ gʼaˇ uiˍ shehˍ hpaˇ hkʼa peu-eˬ, jawˇmawˇ hkʼa peu-eˬ leh, awˬ meh hkʼa cawˬ taˍ ve hkʼa peu-eˬ, chi teˇ ca‸ na‸ maˇ kʼoˆ, awˬ hkʼaw‸ nawˉ teˇ ca‸ na‸ maˇ kʼoˆ, chi hkʼa peu-eˬ awˬ hkʼoˆ hta‸ yawˇ uiˍ jaˇ mvuh jaˇ ve yoˬ. 22Awˬ ceuˬ hkʼa peu-eˬ hta‸ yawˇ awˬ hawˉ lo Gʼuiˬsha teh taˍ leh, Hkri‸ yaˇ awˬ moˍ hta‸ hkʼa caˉ da‸ ve hkʼa peu-eˬ awˬ hkʼoˆ yawˇ hta‸ oˉ kʼoˍ hpeh‸ piˇ lawˬ ve yoˬ. 23Hkri‸ yaˇ awˬ moˍ lehˬ, Yeˍsuˆ ve awˬ to yoˬ. Hkʼa peu-eˬ awˬ hkʼaw lo yawˇ biˇ ve hkʼe, hkʼa peu-eˬ kʼaw‸ biˇ la tuˬ yawˇ te chehˇ ve yoˬ.
Currently Selected:
Eˇfeˇsu‸ li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.