YouVersion Logo
Search Icon

Yoˇhanˬ li‸ 20

20
Yeˍsuˆ kʼaw‸ te‸ tu la ve
1Suhˍ nyi awˬ hkʼaw lo awˉ lawˉ teˇ nyi, mvuhˇ maˇ htiˇ sheˍ htaˇ, Maˍriˆ Maˍgaˍdaˍlaˆ lehˬ teˇ na‸ tuˍ hpfuh lo kʼai leh, tuˍ hpfuh awˬ hkʼoˇ meuˇ lo tsuhˇ taˍ ve haˉ pui shiˍ hpfuhˆ baˬ taˍ ve hta‸ gʼa mawˬ ve yoˬ. 2Hkʼe te leh Siˉmonˍ Peˍtruˆ leh Yeˍsuˆ ha‸ ve awˬ kaˍ awˬ nu awˬ la‸ gʼawˇ teˇ gʼaˇ geh lo yawˇ gʼuiˇ laˬ leh kʼoˆ ve, Tuˍ hpfuh awˬ hkʼaw lo Jawˇmawˇ Yeˍsuˆ hta‸ shu yuˬ kʼai leh, yawˇ hta‸ hkʼaˬ lo ca teh taˍ leh naˍ ngaˬ hui maˇ shiˍ teh‸, yawˇ huiˉ maˬ hta‸ kʼoˆ piˇ ve yoˬ.
3Hkʼe te leh, Peˍtruˆ leh awˬ kaˍ awˬ nu awˬ la‸ gʼawˇ oˇ ve teˇ gʼaˇ tawˆ kʼai leh tuˍ hpfuh lo kʼai ve yoˬ. 4Yawˇ huiˉ maˬ teˇ geh gʼuiˇ kʼai ve teˇ yanˇ, awˬ la‸ gʼawˇ oˇ ve teˇ gʼaˇ lehˬ Peˍtruˆ a‸ kehˉ gʼuiˇ gehˬ leh, tuˍ hpfuh lo yawˇ awˉ lawˉ gaˬ ve yoˬ. 5Tuˍ hpfuh awˬ hkʼaw lo yawˇ kʼaw‸ kʼehˉ nyi htaˇ, hpa hpu oˇ kaˬ lo teh taˍ ve hta‸ gʼa mawˬ ve yoˬ, Ya‸ hkʼaˇ tuˍ hpfuh awˬ hkʼaw lo yawˇ maˇ lo‸-e. 6Yawˇ awˬ hkʼaˇ suh gʼuiˇ laˬ chehˇ ve Siˉmonˍ Peˍtruˆ gaˬ la leh, tuˍ hpfuh awˬ hkʼaw lo lo‸-e ve yoˬ. Lo‸-e ve teˇ yanˇ, hpa hpu teh taˍ laˇ ve hta‸ maˇ kʼoˆ, 7Oˉ kʼoˍ hta‸ beh ve hpaˉ ce‸ hta‸ maˇ kʼoˆ, yawˇ gʼa mawˬ ve yoˬ. Hpaˉ ce‸ oˇ ve hpa hpu geh teˇ geh maˇ teh taˍ leh, awˬ kaˍ awˬ nu teˇ kaˬ lo lo‸ teh taˍ ve yoˬ. 8Oˇ htaˇ, tuˍ hpfuh lo awˉ lawˉ gaˬ ve, awˬ kaˍ awˬ nu awˬ la‸ gʼawˇ oˇ ve teˇ gʼaˇ htawˇ lo‸-e leh gʼa mawˬ ve pa taw yonˍ ve yoˬ. 9Yeˍsuˆ suh kuiˬ lo gʼa kʼaw‸ te‸ tu la tuˬ yoˬ teh‸ Li‸ hpu hkʼaw kʼoˆ taˍ ve hta‸ yawˇ huiˉ maˬ maˇ shiˍ sheˍ.#Chi 16:10 10Oˇ htaˇ, awˬ la‸ gʼawˇ oˇ ve nyiˇ gʼaˇ lehˬ, aˉ hkʼaw lo kʼaw‸ kʼo‸-e ve yoˬ.
Yeˍsuˆ yawˇ awˬ to Maˍriˆ Maˍgaˍdaˍlaˆ hta‸ maw piˇ ve
11Maˍriˆ lehˬ, tuˍ hpfuh awˬ paˇ lo huˉ taˍ leh hawˬ chehˇ ve yoˬ. Yawˇ hawˬ chehˇ htaˇ, tuˍ hpfuh hkʼaw lo kʼaw‸ kʼehˉ nyi leh, 12hpuˉ-ehˍ ve veu‸ kʼaˇ veu‸ deh taˍ ve mvuhˇ naw ma tcuh yaˇ nyiˇ gʼaˇ hta‸ gʼa mawˬ ve yoˬ. Yawˇ huiˉ maˬ lehˬ, Yeˍsuˆ ve awˬ to teh taˍ kuiˬ oˉ kʼoˍ hpawˇ teˇ gʼaˇ, hkui sheh hpawˇ teˇ gʼaˇ mui taˍ ve yoˬ. 13Yawˇ huiˉ maˬ lehˬ, Yaˇ miˇ-oˬ, aˬ hto‸ ma te hawˬ chehˇ ve le teh‸, yawˇ hta‸ na nyi htaˇ yawˇ kʼaw‸ kʼoˆ ve,
Ngaˬ ve Awˬ jawˇmawˇ hta‸ shu yuˬ kʼai leh, hkʼaˬ lo ca teh taˍ leh naˍ ngaˬ maˇ shiˍ ve pa taw hawˬ chehˇ ve yoˬ teh‸, yawˇ huiˉ maˬ hta‸ kʼaw‸ kʼoˆ piˇ ve yoˬ.
14Yawˇ oˇ hkʼe kʼoˆ peuˬ leh awˬ hkʼaw‸ nawˉ hpawˇ hpfuhˆ nyi ve teˇ yanˇ, Yeˍsuˆ huˉ chehˇ ve hta‸ gʼa mawˬ ve yoˬ. Ya‸ hkʼaˇ, Yeˍsuˆ yoˬ teh‸ yawˇ maˇ shiˍ. 15Yeˍsuˆ kʼoˆ ve, Yaˇ miˇ-oˬ, aˬ hto‸ ma te hawˬ chehˇ ve le. Nawˬ a shu hta‸ ca ve le teh‸ yawˇ hta‸ na nyi ve yoˬ.
Maˍriˆ lehˬ, yawˇ hta‸ hko ha‸ shaˉ shehˍ hpaˇ hpeh‸ ve hehˉ teh‸ dawˇ leh kʼoˆ ve, Saˍ la‸-oˬ, nawˬ yawˇ hta‸ yuˬ kʼai ve kʼo, hkʼaˬ lo teh taˍ ve ngaˬ hta‸ a ciˉ hto laˇ-oˆ. Ngaˬ yawˇ hta‸ ca yuˬ tuˬ yoˬ teh‸ yawˇ hta‸ kʼoˆ piˇ ve yoˬ.
16Yeˍsuˆ lehˬ, Maˍriˆ-oˬ teh‸ yawˇ hta‸ kʼoˆ piˇ ve yoˬ.
Maˍriˆ hpfuhˆ nyi leh, Raˍbuˇniˆ-oˬ teh‸, Heˍbrehˇ hkawˇ yaw leh kʼoˆ piˇ ve yoˬ. (Raˍbuˇniˆ teh‸ kʼoˆ ve lehˬ saˍ la‸ teh‸ kʼoˆ ve yoˬ.)
17Yeˍsuˆ kʼoˆ ve, Ngaˬ hta‸ taˇ vawˆ taˍ. Awˬ lawn kʼo, Awˬ pa geh ngaˬ maˇ gʼa taˆ-e sheˍ. Ngaˬ ve awˬ viˉ awˬ nyi hui geh kʼai leh chi hkʼe kʼoˆ piˇ-oˆ. Ngaˬ ve Awˬ pa leh nawˬ hui ve Awˬ pa, ngaˬ ve Gʼuiˬsha leh nawˬ hui ve Gʼuiˬsha geh lo ngaˬ taˆ-e tuˬ yoˬ teh‸ Maˍriˆ hta‸ kʼoˆ piˇ ve yoˬ.
18Maˍriˆ Maˍgaˍdaˍlaˆ kʼai leh, Ngaˬ Jawˇmawˇ Yeˍsuˆ hta‸ gʼa mawˬ peuˬ teh‸, awˬ la‸ gʼawˇ hui hta‸ kʼoˆ piˇ ve yoˬ. Peuˬ leh, Yeˍsuˆ yawˇ hta‸ kʼoˆ laˇ ve awˬ lawn teˇ hpaˍ htawˇ, yawˇ yawˇ hui hta‸ hto piˇ ve yoˬ.
Yeˍsuˆ yawˇ awˬ to awˬ la‸ gʼawˇ hui hta‸ maw piˇ ve
19Suhˍ nyi awˬ hkʼaw lo awˉ lawˉ teˇ nyi Yeˍsuˆ kʼaw‸ te‸ tu la ve teˇ nyi mvuhˇ hpeu‸ htaˇ, awˬ la‸ gʼawˇ teˇ hpaˍ hpawnˬ da‸ chehˇ ve yoˬ. Yawˇ hui lehˬ, Yuˇda‸ chaw hui hta‸ kawˆ ve pa taw yehˬ miˉ teˇ hpaˍ hta‸ hoˆ taˍ ve yoˬ. Oˇ htaˇ Yeˍsuˆ laˬ leh yawˇ hui awˬ kʼaw ji huˉ taˍ leh, Nawˬ hui geh dawˇ sha tuˬ cawˬ piˇ-oˆ teh‸, yawˇ hui hta‸ kʼoˆ piˇ ve yoˬ. 20Yawˇ chi hkʼe kʼoˆ peuˬ hkʼaw‸ nawˉ, yawˇ ve la‸ sheh leh yawˇ ve nyi kuˇ hpawˇ yawˇ hui hta‸ maw piˇ ve yoˬ. Hkʼe te leh, awˬ la‸ gʼawˇ teˇ hpaˍ lehˬ, Jawˇmawˇ Yeˍsuˆ hta‸ gʼa mawˬ ve teˇ yanˇ, ha lehˬ jaˇ ve yoˬ. 21Yeˍsuˆ teˇ pawˆ kʼaw‸ kʼoˆ ve, Nawˬ hui geh dawˇ sha tuˬ cawˬ piˇ-oˆ. Awˬ pa ngaˬ hta‸ peu laˇ ve hkʼe, ngaˬ htawˇ nawˬ hui hta‸ peu kʼai ve yoˬ teh‸, yawˇ hui hta‸ kʼoˆ piˇ ve yoˬ. 22Yawˇ chi hkʼe kʼoˆ peuˬ hkʼaw‸ nawˉ, yawˇ hui awˬ hkʼoˆ hta‸ meuˆ peu leh kʼoˆ ve, Da‸ ve kehˬ ve Awˬ ha hpu hta‸ ha‸ yuˬ-o‸. 23A shu teˇ gʼaˇ ve venˇbaˆ hta‸ maˇ kʼoˆ, nawˬ hui hpehˇ hkʼa ve kʼo venˇbaˆ hpehˇ hkʼa ve hta‸ yawˇ gʼa tuˬ yoˬ. A shu teˇ gʼaˇ ve venˇbaˆ hta‸ maˇ kʼoˆ, nawˬ hui maˇ hpehˇ piˇ ve kʼo, yawˇ venˇbaˆ cawˬ taˍ tuˬ yoˬ teh‸ yawˇ hui hta‸ kʼoˆ piˇ ve yoˬ.
Htoˉma‸ maˇ yonˍ ve awˬ lawn
24Yeˍsuˆ yawˇ hui geh laˬ ve teˇ yanˇ, awˬ la‸ gʼawˇ teˇ chi nyiˇ gʼaˇ awˬ hkʼaw lo Yaˇ cehˬ kʼa teh‸ kʼoˆ ve Htoˉma‸ teˇ gʼaˇ lehˬ, yawˇ hui geh maˇ chehˇ ve yoˬ. 25Hkʼe te leh, awˬ kaˍ awˬ nu awˬ la‸ gʼawˇ teˇ hpaˍ lehˬ, Jawˇmawˇ Yeˍsuˆ hta‸ ngaˬ hui gʼa mawˬ peuˬ teh‸, yawˇ hta‸ kʼoˆ piˇ ve yoˬ.
Htoˉma‸ kʼaw‸ kʼoˆ ve, Yawˇ ve la‸ sheh awˬ hkʼaw lo sho cuˇ hta‸ keu ve awˬ haiˇ hta‸ ngaˬ maˇ gʼa mawˬ leh, awˬ haiˇ oˇ ve hta‸ ngaˬ ve la‸ naw maˇ gʼa htawˇ nyi ve awˬ hkʼoˆ, yawˇ ve nyi kuˇ hpawˇ ngaˬ ve la‸ sheh maˇ gʼa juˆ keu nyi ve kʼo, ngaˬ maˇ yonˍ teh‸, yawˇ hui hta‸ kʼoˆ piˇ ve yoˬ.
26Awˬ hkʼaw‸ nawˉ hiˉ nyi gaˬ htaˇ, Yeˍsuˆ ve awˬ la‸ gʼawˇ teˇ hpaˍ yehˬ awˬ hkʼaw lo teˇ pawˆ kʼaw‸ chehˇ taˍ leh, Htoˉma‸ htawˇ yawˇ hui geh teˇ geh chehˇ taˍ ve yoˬ. Yehˬ miˉ teˇ hpaˍ hoˆ taˍ ve htawˇ, Yeˍsuˆ laˬ leh yawˇ hui awˬ kʼaw ji huˉ taˍ leh, Nawˬ hui geh dawˇ sha tuˬ cawˬ piˇ-oˆ teh‸ kʼoˆ piˇ ve yoˬ. 27Oˇ htaˇ yawˇ Htoˉma‸ hta‸ kʼoˆ piˇ ve, Nawˬ ve la‸ naw choˬ kaˬ lo htawˇ nyi leh, ngaˬ ve la‸ taw kʼaw hta‸ nyi-o. Nawˬ ve la‸ sheh che leh, ngaˬ ve nyi kuˇ hpawˇ hta‸ juˇ keu nyi-o. Maˇ yonˍ ve taˇ cawˬ piˇ. Yonˍ ve teˇ ceuˬ cawˬ piˇ-oˆ teh‸ kʼoˆ piˇ ve yoˬ.
28Htoˉma‸ kʼaw‸ kʼoˆ ve, Nawˬ lehˬ ngaˬ ve Jawˇ mawˇ, ngaˬ ve Gʼuiˬsha hpeh‸ ve yoˬ teh‸ yawˇ hta‸ kʼoˆ piˇ ve yoˬ.
29Yeˍsuˆ kʼaw‸ kʼoˆ ve, Nawˬ lehˬ ngaˬ hta‸ mawˬ ve pa taw yonˍ ve law leˇ. Ngaˬ hta‸ maˇ mawˬ htawˇ yonˍ ve chaw hui lehˬ, awˬ bon uiˍ ve yoˬ teh‸ yawˇ hta‸ kʼoˆ piˇ ve yoˬ.
Aˬ hto‸ ma pa taw li‸ chi bvuh‸ ve awˬ lawn
30Yeˍsuˆ lehˬ awˬ la‸ gʼawˇ teˇ hpaˍ mehˆ gʼuˇ suhˍ te maˍ piˇ ve awˬ kaˍ awˬ nu awˬ heˆ teˇ hpaˍ li‸ chi awˬ hkʼaw lo maˇ bvuh‸ keu taˍ ve maˇ maˇ cawˬ sheˍ ve yoˬ. 31Yeˍsuˆ lehˬ, Gʼuiˬsha ve Yaˇ hpu Hkri‸ hpeh‸ ve yoˬ teh‸ nawˬ hui yonˍ tuˬ leh, yawˇ hta‸ yonˍ ve pa taw yawˇ ve awˬ meh awˬ hkʼaw lo nawˬ hui co ha gʼa te‸ tuˬ, awˬ lawn chi teˇ hpaˍ chi ma bvuh‸ taˍ ve yoˬ

Currently Selected:

Yoˇhanˬ li‸ 20: LHBE

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy