1 Hteˇsaˍlawˇniˆ li‸ 1
1
Awˬ chawˇ hui hta‸ dawˇ nawˇ ve hkawˇ
1Pawˇlu‸, Siˍlaˍnuˆ leh Tiˆmoˉseˍ hui lehˬ, Awˬ pa Gʼuiˬsha leh Jawˇmawˇ Yeˍsuˆ Hkri‸ awˬ hkʼaw lo chehˇ ve Hteˇsaˍlawˇniˆ Hkri‸ yaˇ awˬ moˍ hta‸ li‸ chi teˇ kʼoˆ bvuh‸ laˇ ve yoˬ.
Awˬ bon awˬ shinˉ leh dawˇ sha gaˇ sha tuˬ nawˬ hui geh cawˬ piˇ-oˆ.
Yawˇ hui shu awˬ pon henˇ kuiˬ jawˬ kuiˬ hpeh‸ ve
2Nawˬ hui hkʼa peu-eˬ awˬ pon ngaˬ hui hkʼaˬ htaˆ ka‸ Gʼuiˬsha hta‸ chiˇ mvuh leh, ngaˬ hui bon lawˬ ve teˇ yanˇ nawˬ hui hta‸ dawˇ nawˇ chehˇ ve yoˬ. 3Nawˬ hui yonˍ ve hta‸ pa taw kanˉ te ve maˇ kʼoˆ, ha‸ pehnˇ ve hta‸ pa taw kanˉ hkeu‸ ve hta‸ te ve maˇ kʼoˆ, ngaˬ hui ve Jawˇmawˇ Yeˍsuˆ Hkri‸ hta‸ dawˇ law ve pa taw nyi ma yeˬ ve maˇ kʼoˆ, ngaˬ hui ve Awˬ pa Gʼuiˬsha mehˆ gʼuˇ suhˍ, chi teˇ hpaˍ hta‸ ngaˬ hui hkʼaˬ htaˆ ka‸ dawˇ nawˇ chehˇ ve yoˬ. 4Gʼuiˬsha ha‸ ve awˬ viˉ awˬ nyi teˇ hpaˍ-oˬ, Gʼuiˬsha nawˬ hui hta‸ leuˆ yuˬ taˍ ve yoˬ teh‸ ngaˬ hui shiˍ ve yoˬ. 5Awˬ lawn kʼo, ngaˬ hui maˍ ve ha lehˬ ve bon hkawˇ lehˬ, tawˇ hkawˇ ceh hpeh‸ leh nawˬ hui geh gaˬ la ve maˇ heˆ. Kanˇ paˆ awˬ hkʼaw lo maˇ kʼoˆ, da‸ ve kehˬ ve Awˬ ha hpu awˬ hkʼaw lo maˇ kʼoˆ, yonˍ yeˬ jaˇ ve nyi ma awˬ hkʼaw lo maˇ kʼoˆ, nawˬ hui geh gaˬ la ve yoˬ. Ngaˬ hui nawˬ hui geh chehˇ ve teˇ yanˇ, nawˬ hui awˬ pon awˬ bon cawˬ tuˬ ngaˬ hui hkʼaˬ hkʼe ve chaw hpeh‸ ve hta‸ nawˬ hui shiˍ ve yoˬ. 6Nawˬ hui lehˬ, ngaˬ hui hta‸ ka‸ Jawˇ mawˇ Yeˍsuˆ hta‸ ka‸ henˇ yuˬ leh te chehˇ ve yoˬ. Awˬ lawn kʼo, bon hkawˇ hta‸ pa taw nawˬ hui gʼa tu‸ gʼa hkanˍ jaˇ ve htawˇ, da‸ ve kehˬ ve Awˬ ha hpu pe‸ laˇ ve ha lehˬ ve teˇ ceuˬ awˬ hkʼaw lo bon hkawˇ hta‸ nawˬ hui ha‸ yuˬ ve yoˬ. 7Chi hta‸ pa taw nawˬ hui lehˬ, Maˍkeˍdawˇniˆ mvuhˇmiˬ leh Aˍhkaˍyaˆ mvuhˇmiˬ awˬ hkʼaw lo chehˇ ve yonˍ ve chaw hkʼa peu-eˬ awˬ pon henˇ kuiˬ jawˬ kuiˬ hpeh‸ la ve yoˬ. 8Awˬ lawn kʼo, nawˬ hui hta‸ pa taw Jawˇmawˇ Yeˍsuˆ ve tawˇ hkawˇ lehˬ, Maˍkeˍdawˇniˆ mvuhˇmiˬ leh Aˍhkaˍyaˆ mvuhˇmiˬ awˬ hkʼaw lo bvuhˬ kʼai ve ceh tiˉ maˇ heˆ. Nawˬ hui Gʼuiˬsha hta‸ yonˍ ve awˬ lawn teˇ kaˬ le le lo bvuhˬ kʼai ve pa taw, oˇ ve awˬ lawn ngaˬ hui te‸ chiˉ kʼoˆ tuˬ maˇ loˍ. 9Awˬ lawn kʼo, nawˬ hui lehˬ ngaˬ hui hta‸ ha lehˬ ha kʼa ha‸ yuˬ laˇ ve awˬ lawn shu kʼoˆ da‸ chehˇ ve yoˬ. Chi hkʼoˆ ka‸, te‸ chehˇ ve leh awˬ tehˬ awˬ na ve Gʼuiˬsha awˬ pon kanˉ hta‸ nawˬ hui te hpeh‸ tuˬ, shaˉ ho‸ teˇ hpaˍ hta‸ nawˬ hui baˬ taˉ leh Gʼuiˬsha geh kʼaw‸ hpfuhˆ kʼaw‸ la ve awˬ lawn hta‸ htawˇ, shu kʼoˆ da‸ chehˇ ve yoˬ. 10Suh kuiˬ lo Gʼuiˬsha kʼaw‸ te‸ tu la piˇ ve yawˇ ve Yaˇ hpu mvuhˇ naw ma lo ya‸ la tuˬ ve hta‸ nawˬ hui law chehˇ ve awˬ lawn htawˇ, shu kʼoˆ da‸ chehˇ ve yoˬ. Yaˇ hpu oˇ ve lehˬ, gaˬ la tuˬ ve nyi ma zuhˆ ve teˇ ceuˬ awˬ hkʼaw lo ngaˬ hui hta‸ ponˬ laˇ shehˍ hpaˇ Yeˍsuˆ hpeh‸ ve yoˬ.
Currently Selected:
1 Hteˇsaˍlawˇniˆ li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.