Yuhanna 12
12
Mariyama rufi uurdi dow kosɗe Yeesu
(Matta 26:6-13; Markus 14:3-9)
1Lutti balɗe joweego haa juulde Paska waɗa. Yeesu yehi Baytaniya, wuro Laazarus mo Yeesu ummitinno diga maayde. 2Ɓe mbaɗani mo nyaamduuji haa ton. Marta ɗonno hokka ɓe nyaamdu, Laazarus ɗonno caka nyaamdanɓe bee Yeesu. 3Nden Mariyama hoo'i uurdi nardi laaɓndi caɗndi masin baakin reeta liitir, rufi ndi dow kosɗe Yeesu, nden o yiggi ɗe bee gaasa hoore maako. Suudu fuu heewi uureeŋga uurdi maajum#Lk 7:37-38.. 4Yahuuda Iskariyot, gooto nder pukara'en Yeesu, zammbotooɗo mo wi'i: 5“Koni ɓe coorraay uurdi ndi'i baakin ceede cardi teemeɗɗe tati ngam ɓe ndokka talaka'en?” 6O wi'i ɗum naa ngam o enɗi talaka'en, ammaa ngam o gujjo. Kaŋko woni jogoowo booro ceede, o ɗon wujja ceede ɗe ɓe kalfini mo. 7Ammaa Yeesu wi'i: “Acce debbo oo, o aarti waɗugo ɗum ngam nyalaade uweeki am. 8Talaka'en ngondan bee mooɗon foroy, ammaa min mi wondataa bee mooɗon foroy#TT 15:11..”
Dabare mbarugo Laazarus
9Yahuudu'en ɗuuɗɓe nani Yeesu ɗon haa Baytaniya. Ɓe njehi ton, naa ngam daliila Yeesu tan, ammaa ngam laarugo Laazarus mo Yeesu ummitinno diga maayde boo. 10Mawɓe liman'en mbaɗi anniya mbarugo Laazarus boo, 11ngam daliila maako, Yahuudu'en ɗuuɗɓe acci ɓe, nuɗɗini Yeesu.
Yeesu nasti Urusaliima
(Matta 21:1-11; Markus 11:1-11; Luka 19:28-40)
12Jaŋngo man, mooɓre yimɓe warɓe ngam juulde Paska go nani Yeesu ɗon wara haa Urusaliima. 13Ɓe koo'i lice dibinooje, ɓe njehi fottoygo bee maako, ɓe ɗon ngooka bee sawtu: “Hosanna! Barka laatano laamiiɗo Isra'iila, garanɗo bee innde Jawmiraawo#Jab 118:26.!” 14Yeesu tawi wamnde molde, wa'i nde, bana ko winnda nder Deftere:
15“Taa hultor, an berniwol Siyona!
Ndaa, laamiiɗo maaɗa ɗon wara,
o ɗon wa'i wamnde molde#Zek 9:9..”
16Saa'i man pukara'en maako paamaay ɗum tawon. Ammaa nde Yeesu teddinaama, ɓe ciftori, ɗum binndaaɗum dow maako nder Deftere, kanjum ɓe ngaɗani mo ɗum.
17Saa'i Yeesu ewni Laazarus, wurtinno mo yenaande, ummitinno mo diga maayde, yimɓe ɗuuɗɓe ɗonno ton. Kamɓe ɓe tokki seedaago. 18Ngam maajum mooɓre ɗuuɗnde wari fottugo bee Yeesu, ngam ɓe nani haala kaayeefiwol ngol o waɗno. 19Nden Farisa'en mbi'mbi'tiri hakkunde muuɗum'en: “Ndaa, ko en mbaɗi fuu nafaay koo ɗume, ngam duniyaaru fuu ɗon tokko mo.”
Yunaniŋke'en woɗɓe ɗaɓɓiti Yeesu
20Yunaniŋke'en#12:20 Yunaniŋke'en malla Girek'en. woɗɓe ɗonno caka warɓe haa Urusaliima ngam sujidango Allah saa'i juulde. 21Ɓe ngari haa Filip mo wuro muuɗum Baytisayda nder lesdi Galiili, ɓe mbi'i mo: “Moodibbo, min ngiɗi laarugo Yeesu.” 22Filip yehi yecci ɗum Andire, nden ɓe ɗiɗo fuu ɓe njehi, ɓe ngecci ɗum Yeesu. 23Yeesu jaabi ɓe: “Saa'i waɗi jonta, haa Ɓii-neɗɗo heɓa tedduŋgal. 24Gooŋga mi wi'ata on: To wabbere alkamaari uwaaka nder lesdi, to nde waataay, nde jooɗoto feere maare. Ammaa to nde waati, nde riman gabbe ɗuuɗɗe. 25Koo moy yiɗi yoŋki muuɗum, majjinan ki. Ammaa koo moy wanyi yoŋki muuɗum nder duniyaaru ndu'u, aynan ki haa foroy#Mat 10:39; 16:25; Mk 8:35; Lk 9:24; 17:33.. 26Sey kuuwanoowo yam fuu tokko yam, ngam haa o wona haa ngonmi. Koo moy laatake kuuwanoowo yam, Baabiraawo am teddinan mo.”
Yeesu wolwi haala maayde muuɗum
27Yeesu wi'i: “Jonta ɓernde am sakli. Ɗume mbi'anmi? Mi wi'a Baabiraawo hisnammi torra saa'iire nde'e na? Ammaa fakat mi wari ngam mi torro nder saa'iire nde'e. 28Baabiraawo, teddin innde ma.” Nden sawtu iwi diga asama, wi'i: “Mi teddini nde, mi teddinan nde fahin.”
29Yimɓe wonɓe ton nani sawtu maajum, ɓe mbi'i: “Ɗum riggaaŋgo.” Woɗɓe mbi'i: “Malaa'ikaajo wolwani mo.” 30Ammaa Yeesu wi'i ɓe: “Sawtu oo waraay ngam am, ammaa ɗum wari ngam mooɗon. 31Jonta woni saa'iire kiita duniyaaru ndu'u. Jonta laamiiɗo duniyaaru ndu wudinaama haa yaasi. 32Min, to mi ɓaŋgtaama diga lesdi, mi fooɗan yimɓe fuu haa am.” 33Bee bolle ɗe'e o tinndini irin maayde nde o tammi maayugo. 34Yimɓe mbi'i mo: “Min nani nder tawreeta no Almasiihu duumoto. Kadi noy a wi'rata: Haani Ɓii-neɗɗo ɓaŋgte? Moy woni Ɓii-neɗɗo man#Jab 110:4; Esa 9:6; Ez 37:25; Dan 7:14.?” 35Yeesu jaabi ɓe: “Annoora ɗon wondi bee mooɗon wakkati seɗɗa tawon. Ngance saa'i on ngoodi annoora, ngam taa nyiɓre juha on, ngam jahanɗo nder nyiɓre anndaa haa o yahata. 36Nde annoora ɗon wondi bee mooɗon, nuɗɗine annoora, ngam haa on laato ɓiɓɓe annoora.”
Ɓaawo Yeesu wolwi bolle ɗe'e, o dilli, o suuɗi ɓe.
Yahuudu'en nuɗɗinaay Yeesu
37Koo nde Yeesu waɗi kaayeefiiji ɗuuɗɗi yeeso maɓɓe, ɓe nuɗɗinaay mo, 38ngam haa annabaaku ngu Esaaya waɗi hiɓɓa, o wi'no:
“Jawmiraawo, moy nuɗɗini ko min mbolwi?
Haa moy Jawmiraawo waŋgini baawɗe muuɗum#Esa 53:1.?”
39Ɓe mbaawaay nuɗɗingo, ngam Esaaya wi'i fahin:
40“Allah wumni ɓe,
saatini ɓerɗe maɓɓe,
ngam taa ɓe ngi'a bee gite maɓɓe,
taa ɓerɗe maɓɓe paama,
taa ɓe lorto,
mi yamɗitina ɓe#Esa 6:10..”
41Esaaya wi'i non ngam o yi'i tedduŋgal Yeesu, o wolwi dow maako.
42Koo nder mawɓe Yahuudu'en boo, ɗuuɗɓe nuɗɗini Yeesu. Ammaa ɓe mbaŋginaay ɗum, ngam daliila Farisa'en, ngam taa ɓe ngurtina ɓe suudu dewal Yahuudu'en. 43Ngam ɓe ɓuri yiɗugo yerduye yimɓe dow yerduye Allah.
Wolde Yeesu hiitoto
44Yeesu hooli bee sawtu, wi'i: “Koo moy nuɗɗini yam, naa min tan o nuɗɗini, ammaa o nuɗɗini nelɗo yam. 45Koo moy yi'i yam, yi'i nelɗo yam. 46Min, mi annoora, mi wari nder duniyaaru, ngam taa nuɗɗinɗo yam fuu jooɗo nder nyiɓre. 47To goɗɗo nani bolle am, ɗowtanaaki ɗe, naa min hiitoto mo, ngam mi waraay hiitaago duniyaaru, ammaa ngam hisnugo ndu. 48Koo moy sali yam, jaɓaay bolle am, o kiiteteeɗo. Bolle ɗe mi wolwi, kanje kiitoto mo nyalaade darŋgal. 49Ngam mi wolwaay bee ngiɗa am, ammaa Baabiraawo nelɗo yam, kaŋko umri yam ko mi wolwata, ko mi anndinta yimɓe. 50Mi anndi umroore maako, ɗum ngeendam nduumiiɗam. Walaa ko mi wolwata, sey ko Baabiraawo umri yam wolwugo.”
Currently Selected:
Yuhanna 12: FB
Highlight
Share
Copy
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.