Laataanooji 12
12
Allah ewni Abraama
1Jawmiraawo wi'i Abraama: “Wurta lesdi maaɗa e lenyol maaɗa e saare baaba maaɗa. Yah haa lesdi ndi mi hollete#KN 7:2-3; Ibr 11:8.. 2Mi laatinte ummaatoore mawnde, mi barkiɗinte, mi mawninan innde maaɗa. A laatanto woɗɓe daliila barka. 3Mi barkiɗinan barkiɗinanɓe ma, mi naalan naalanɓe ma. Ngam daliila maaɗa asli duniyaaru fuu keɓan barka#Gal 3:8..”
4Abraama dilli, bana Jawmiraawo wi'no mo, Ludu yahdi bee maako. Abraama woodino duuɓi cappanɗe joweeɗiɗi e jowi (75), saa'i o wurto Haran. 5O hoo'i Saray, debbo maako e Ludu, ɓii deerɗiiko e mardi maɓɓe, non boo maccuɓe ɓe o soodi haa Haran fuu. Ɓe ngurti ngam ɓe njaha lesdi Kanaana. Ɓe njotti ton boo.
Abraama haa lesdi Kanaana e haa Misra
6Abraama saali lesdi maajum fuu haa yotti nokkuure wi'eteende Sikem, haa lekki makki bi'eteeki More woni. Wakkati maajum Kanaani'en ɗonno njooɗi nder lesdi ndi'i. 7Jawmiraawo waŋgani Abraama, wi'i mo: “Mi hokkan danygol maaɗa lesdi ndi'i.” Ton Abraama mahani Jawmiraawo mo waŋgani mo hirsirde#Laat 20:2; 26:7.. 8Nden o ummi diga ton, o yehi lesdi kooseeje, haa fuunaaŋge Baytila. Ton o darni laymaaru maako, hakkunde Baytila haa hiirnaaŋge e Ayu haa fuunaaŋge. Ton o mahani Jawmiraawo hirsirde feere, o ewni innde Jawmiraawo nder do'a. 9Nden o dilli, o tokki laawol maako yahugo Lesdi Fombina#12:9 Fombina malla hoore-huɗo. Ɗum Negef bee Ibraniŋkeere..
10Weelo waɗi nder lesdi. Abraama dilli haa Misra haa o faɓɓoya ton, ngam weelo#12:10 Weelo malla rafo. maajum saati. 11Nde o ɓadi nastugo Misra, o wi'i Saray, debbo maako: “Ndaa, mi anndi a debbo ŋarniiɗo. 12To Misra'en ngi'i ma, ɓe mbi'an: Oo, ɗum debbo maako. Ɓe mbaratam, an kam ɓe accete. 13Ngam maajum sey mbi'a ɓe a deerɗiraawo am, haa mi jooɗo jam e yoŋki am boo hisa ngam daliila maaɗa.” 14Nde Abraama yotti Misra, Misra'en ngi'i debbo oo, o ŋarniiɗo masin. 15Saraaki'en Firawna#12:15 Laamiiɓe Misra fuu ewnaama Firawna, waato laamiiɗo. ngi'i mo, mani mo yeeso Firawna, nden ɓe njahri mo nder saare maako. 16Firawna woonani Abraama daliila maako. O hokki Abraama dammooji e na'i e bamɗe e maccuɓe e horɓe e geelooɗi.
17Ammaa Jawmiraawo hiiti Firawna e saare maako bee masiibooji naawɗi ngam daliila Saray, debbo Abraama. 18Nden Firawna ewni Abraama, wi'i mo: “Ɗum ɗume mbaɗanɗa yam ɗo? Koni a anndinaay yam o debbo maaɗa? 19Koni mbi'ɗa o deerɗa, haa mi hoo'i mo ngam o laato debbo am? Jonta, ndaa debbo maaɗa, hoocu mo, dillu!” 20Firawna umri worɓe woɗɓe ɗofta mo, ɓe ɗofti mo kaŋko e debbo maako e ko o mari fuu.
Currently Selected:
Laataanooji 12: FB
Highlight
Share
Copy
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.