1 Makabe 9
9
Maayde Yahuuda
1Nde Demetiriyus nani Nikanor maayi e sooje'en maako njaalaama, o taaskiti nelgo nde ɗiɗaɓre Bakides e Alkime haa Yahudiya, ɓe ardo mooɓre maako nyaaɗnde. 2Ɓe kooci laawol Galiili, ɓe caŋngini yeeso Mesalot kommbi Arbeel. Ɓe nyaami wuro man e ɓe mbari yimɓe ɗuuɗɗe. 3Nder hitaande 152 nder lewru aranndu, ɓe njo'ini saŋngeere maɓɓe yeeso Urusaliima. 4Ɓaawoɗon ɓe ndilli diga ton haa Beret bee sooje'en ujine noogas e wa'ooɓe pucci ujine ɗiɗo. 5Yahuuda, gal wakeere mum, saŋngini haa Elasa bee sooje'en muuɗum waawɓe haɓre ujine tati. 6Nde sooje'en Yahuuda ngi'i mooɓe sooje'en konne'en maɓɓe ɗuuɗɗe jamum, ɓe kultori e ɗuuɗɓe caka maɓɓe ndoggi saŋngeere: Sey teemeɗɗe njoweetato lutti. 7Yahuuda nde laari sooje'en muuɗum ɗon tampa wakkati haɓre fuɗɗata, ɓernde maako ta'i ngam o walaa wakkati mooɓtugo sooje'en maako. 8O sakli, o wi'i haa luttuɓe: “Tiitooɗen konne'en meeɗen, kippooɗen ɓe to en mbaawan.” 9Sooje'en maako njaɓaay haala ka'a, ɓe mbi'i mo: “Ɗum waɗataako, en pamɗi. Jonta kam sey kisnen yoŋkiiji men tan. Ɓaawoɗon, en lorto bee deerɗiraaɓe men haɓtaago.” 10Yahuuda jaabi ɓe: “En ndogga haɓre na? Aa'a, min kam mi waɗataa huunde bana nii! To wakkati maayde men waɗi, maayen en worɗuɓe ngam daliila deerɗiraaɓe meeɗen. Taa mbilen neɗɗaaku men.”
11Mooɓe konne'en ngurti saŋngeere mum'en, ɓe tiiti Yahuudu'en. Wa'iiɓe pucci sennditi geɓe ɗiɗi, sooje'en jogiiɓe piɗirɗum e ɓahi ɗon ardi yeeso, haa caffuuji arani ɗi waawɓe haɓre. 12Bakides ɗon ardi sooje'en wuttudu nyaamru. Sooje'en bee kosɗe ɗon ngaɗi geɓe ɗiɗi, ɓe ɗon njaha bee fuufugo algayta. Sooje'en Yahuuda boo puufi algayta. 13Lesdi dimmbi ngam jahargal sooje'en geɓe ɗiɗi go, nden haɓre ummi, nde fuɗɗi fajira e nde neeɓi haa jemma. 14Yahuuda faami Bakides e sooje'en maɓɓe nyaaɗɓe ɗon ndardi wuttudu nyaamru. Nden sooje'en maako waawɓe kawtani mo, 15ɓe kippoyi wuttudu nyaamru man ndu sooje'en Siriya, ɓe parti ɓe, taasni ɓe haa kooseehon Azara. 16Nde mooɓe ɗe juŋngo nano paami wuttudu nyaamru kam jaalaama, ɗe kippoyi Yahuuda e sooje'en mum gal ɓaawo. 17Haɓre wuli, yimɓe ɗuuɗɗe maayi gal geɓe ɗiɗi fuu.
18Yahuuda boo mbaraama e luttuɗum sooje'en maako boo ndoggi. 19Yonatan e Simon kooci ɓanndu deerɗiraawo muuɗum'en Yahuuda e ɓe uwi mo haa yenaande saare maɓɓe haa Moodin. 20Isra'iila'en fuu mboyi mo, ɓe mboyi ɗuuɗɗum e ɓe ngaɗi maayiti nyalɗe ɗuuɗɗe. Ɓe ɗon mbi'a: 21“Noy ka waari, gorɗuɗo, cuusɗo, kisnuɗo Isra'iila maayata?”
22Luttuɗum kuuɗe Yahuuda, kaɓe maako, jaalorɗe maako e neɗɗakuuji ɗi o heɓi ɗuuɗɗi en mbaawataa winndididgo ɗum.
Yonatan hoosi pellel deerɗum Yahuuda
23Ɓaawo maayde Yahuuda, yedduɓe Allah mbaŋgi koo toy fuu nder Isra'iila, yimɓe halluɓe keɓi semmbe. 24Yaake man weelo caatuŋgo waɗno, ɗuuɗɓe nder jama'aare kawtani ɓe. 25Nden Bakides suɓi heefeerɓe, o ardini ɓe nder gure lesdi maako. 26Yimɓe man puɗɗi tefgo e ɓillugo sooba'en Yahuuda fuu: Ɓe naŋnga ɓe, ɓe njahra ɓe haa Bakides, kanyum boo ɗon waato ɓe e ɗon toska ɓe. 27Isra'iila'en meeɗaay anndugo ɓillaare tullunde nde'e diga zamanu annabiijo walaano caka maɓɓe.
28Nden sooba'en Yahuuda fuu mooɓti, ɓe mbi'i Yonatan: 29“Diga maayde deerɗa Yahuuda, walaa goɗɗo bana maako baawanɗo yahrugo en haɓgo bee konne'en men, Bakides e wanyɓe ummaatoore men. 30An min cuɓi haa kooca pellel maako. Laatoɗa ardiiɗo amin e ɗowoowo amin haa konu.” 31Nden Yonatan jaɓi ardaago, o hooci laamu ɓaawo deerɗiiko Yahuuda.
Yonatan waati maayde deerɗum Yuhanna
32Nde Bakides heɓi habaru man, o haɓdi haa o mbara Yonatan. 33Ammaa nde Yonatan e yimɓe mum e deerɗum Simon nani haala man, ɓe cuuɗoyi haa nder harde hamaadaare Teko'a. Ɓe caŋngini kommbi mbeela njamndi Asfar. 34Nyannde siwtorde feere, Bakides faami haa ɓe ngoni, o ta'i maayo Urdun bee sooje'en maako fuu. 35Yonatan neli deerɗum Yuhanna, cuklaniiɗo ɓen ɓe kaɓataa, ƴamgo sooba'en maɓɓe Nabate'en to ɓe poti sigaago haa maɓɓe doŋle maɓɓe ɗuuɗɗe. 36Ammaa dow laawol, Jambirite'en yimɓe Medeba, kippi Yuhanna, naŋngi mo, ndillidi bee doŋle fuu. 37Neeɓi seɗɗa, Yonatan e deerɗum Simon keɓi habaru no Jambirite'en go ɗon taaskano waɗgo teegal maŋngal. Munyaaɗo ɓii ardiiɗo mawɗo haa Kanaana ummoto diga Nabata bee ɗoftooɓe ɗuuɗɓe. 38Ɓe ngejjitaay no Jambirite'en mbarno deerɗiraawo maɓɓe Yuhanna. Ɓe mba'i, ɓe cuuɗi nder loogo hooseere ngam rengo ɓe. 39Wakkati ɓe ɗon taaski rengo ɓe, ɓe eewi yimɓe bee doŋle ɗuuɗɗe, ɓaŋɗo, sooba'en mum e deerɗum'en ɗon ngara fottugo bee yeɓre ndeya bee fiyooɓe bawɗi e yimooɓe. Ɓe ɗon bee balmi boo. 40Yonatan e yimɓe mum ngurti haa ɓe cuuɗi, ɓe kippi ɓe, ɓe puɗɗi mbargo ɓe. Ɗuuɗɓe mbaraama e luttuɓe boo ndoggi haa hooseere. Yahuudu'en koociti doŋle maɓɓe fuu. 41Nii non ɓaŋgal laati maayiti e gimi wammbaaɓe laati bojji. 42Ɓaawo waataago deerɗiraawo maɓɓe Yuhanna, Yonatan e Simon cuuɗoyi haa yayre wonnde dow pomoole maayo Urdun.
Haɓre haa daande maayo Urdun
43Bakides faami haa ɓe ngoni. Nyannde siwtorde, o dilli haa daande maayo Urdun bee mooɓe ɗuuɗɗe. 44Yonatan wi'i yimɓe mum: “Umme! Konen ngam kisnen yoŋkiiji men! Ko saalino kam fuu, en meeɗaay nastugo nder ɓillaare bana nde hannde. 45Konne'en ɗon tiiti en gal yeeso e maayo Urdun boo ɗon ɓaawo men. Ko taari en fuu ɗum yayre e guuɓe. Walaa gal ndoggiren fuu. 46Tore Jawmiraawo haa keɓen, ndaɗen konne'en men.”
47Konu fuɗɗi. Yonatan ɓaŋgti juŋngo haa faɗɗa Bakides, ammaa o luuti fiyannde man bee lortaago ɓaawo ɓaawo. 48Nden Yonatan e yimɓe mum ndiwi, njolli nder maayo Urdun, ɓe ngini haa ɓe njotti fomoonde gaɗaare. Konne'en paasiti ta'ugo maayo ngam tokkaago ɓe. 49Nyalde man yimɓe Bakides baakin ujineere kalki.
Bakides haa Yahudiya e waade Alkime
50Bakides lorti tawon haa Urusaliima, o semmbiɗini gure Yahudiya bee taarnugo ɗe bee mahi towɗi marɗi pareeje bee paaɓi. Ɗum Yeriko, Emmawus, Bayti-Horon, Betel, Timna, Faraton e Tefon. 51O jo'ini sooje'en ngam ɓillugo Yahuudu'en. 52O semmbiɗini mahi taariiɗi Bayti-Sur e Gezer, non boo mahi suudu Urusaliima semmbiɗndu. O jo'ini mooɓe sooje'en nyaamdu sigordu. 53O naŋngi ɓiɓɓe laamiiɓe lesdi man, o maɓɓi ɓe haa pelle man.
54Nder lewru ɗiɗaɓru nder hitaande 153, Alkime umri ɓe pusa mahol taariiŋgol haykaliiru ngam wilgo kuugal annabi'en. Ɓe puɗɗi fusgo. 55Nden Alkime heɓi piyal, kuugal fuu dari. O laati o boosɗo, o waawataa maɓɓititgo hunnduko maako, o waawataa wolwugo malla o tinndina anniyaaji maako ragareeji. 56Neeɓaay sam, o maayi nder torra naawka. 57Nde Bakides heɓi habar Alkime maayi, o lorti les laamiiɗo Demetiriyus. Yahudiya heɓi foofti deydey duuɓi ɗiɗi.
Bakides dilli, ɓaawo ɓe njaali ɗum
58Nden Yahuudu'en yedduɓe Allah mooɓti, mbi'mbi'tiri: “Yonatan e yimɓe mum ɗon njooɗi nder jam jonta, walaa ko hulnata ɓe boo. Mbi'en Bakides wara, o waawan naŋngugo ɓe jemmaare woore.” 59Ɓe ndilli haa ɓe ngeewta dabare man bee Bakides. 60Kaŋko o naŋngi laawol bee sooje'en ɗuuɗɓe. O neldi bee sirri bataakewol haa yimɓe maako wonɓe haa Yahudiya, o ɗon ƴama ɓe ɓe naŋnga Yonatan e yimɓe mum. Ammaa dabare maɓɓe fiistaama ngam Yonatan heɓi habaru man. 61Kanyum boo, bee yimɓe maako, o naŋngi nder waɗɓe dabare man yimɓe cappanɗe njowo wonɓe nder lesdi maako, ɓe mbari ɓe. 62Ɓaawoɗon, Yonatan, Simon e yimɓe muuɗum'en cuuɗoyi nder wuro ngo walaa koo goɗɗo, wi'eteeŋgo Bayti-Basi. Ɓe nyiɓti babal laatinooŋgal winnde e ɓe cemmbiɗini ngal bee mahi towɗi. 63Nde Bakides heɓi habaru man, o mooɓti sooje'en maako fuu, o ewni yiɗɓe mo haa Yahudiya ngara kawtana mo. 64O dilli haa Bayti-Basi ngam o hippo ngo, o honi babal man balɗe ɗuuɗɗe bee kuuje pusruɗe mahi. 65Nden Yonatan ɗali deerɗum Simon nder wuro man e bee yimɓe seɗɗa, o wurti o dilli ladde. 66O jaaloyi Odomera bee lenyol mum e asŋgol Fasiron nder saŋngeere mum. Ɓe fuu ɓe njaɓi haɓdugo bee Yonatan e yimɓe mum. Ɓe ndillidi ɓe fuu, ɓe kippoyi Bakides. 67Simon bee yimɓe mum ngurti nder Bayti-Basi, ɓe nguli kuuje pusruɗe mahi, 68ɓe nasti haɓre bee Bakides. Ɓe parti mo ngam dabare maako wuuraay. 69O ɓerni dow Yahuudu'en yedduɓe Allah sarwuɓe mo o yaha Yahudiya, o mbari ɗuuɗɓe maɓɓe. Ɓaawo man o hoosi anniya lortaago lesdi maako.
70Nde Yonatan nani habaru man, o neli dow maako nelaaɓe ngam waɗgo sarɗiiji sulhu e lortingo naŋngaaɓe. 71Bakides jaɓi sarɗiiji Yonatan, o hunani mo o ɗalan mo nder jam haa fodde ngeendam maako. 72O hokkiti mo naŋngaaɓe ɓe o naŋngi diga Yahudiya e o lorti haa lesdi maako. O lortaaki haa lesdi Isra'iila sam. 73Nii non konu timmiri haa lesdi Isra'iila. Yonatan jooɗoyi haa Mikmas. O warti ardiiɗo jama'aare e o nattini nder Isra'iila yimɓe yedduɓe Allah.
Currently Selected:
1 Makabe 9: FBDC
Highlight
Copy
Compare
Share
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.