1 Makabe 8
8
Maŋgtoore Roma'en
1Yahuuda nannooɗo habaru Roma'en. Ɓe ɗon mbi'a ɓe semmbiɗɓe, woonananɓe hawtanɓe bee maɓɓe, ɓe taaskiiɓe laataago soobiraaɓe ƴamɓe ɓe fuu. 2Ɓe limtani mo konuuji ɗi ɓe ngaɗi e no ɓe njaalori yimɓe Galatiya. Roma'en leesni ɓe, dooli ɓe yoɓango ɓe garaama naawŋga. 3Ɓe konino boo lesdi Ispaniya haa ɓe njaɓta gasarɗe kaŋŋeeri e cardi gonɗe ton. 4Bee dabare e tiiɗal, ɓe nyaami lesɗe man fuu koo ngam ɗe daayiiɗe bee Roma. Ɓe njaali laamiiɓe warɓe diga keerol duniyaaru ngam hippugo ɓe. Roma'en keɓi jaalorgal dow maɓɓe, ɓe ukkani ɓe masiibooji caatuɗi, luttuɓe boo ɗon njoɓana ɓe garaama hitaande fuu. 5Ɓe njaali e ɓe leesni laamiiɓe Makedoniya, Filippi e Persiya e tuurtaniiɓe ɓe. 6Ɓe ɗiggini Antiyokus Mawɗo, laamiiɗo Asiya, kippunooɗo ɓe bee nyiibi teemerre e noogas, bee pucci, bee mootaaji konu e mooɓre sooje'en semmbiɗnde. 7Ɓe naŋngi mo o geeto, ɓe ndooli mo kaŋko e ruutu maako, ɓe njoɓa garaama ɗuuɗka e ɓe ndokka ɓe naŋngaaɓe. 8Indiya, Mediya, Lidiya e gure goɗɗe booɗɗe nder laamu man, ɓe njaɓti ɗum haa Antiyokus ngam ɓe ndokka laamiiɗo Emen. 9Yunaniŋke'en ngaɗi anniya hongo ɓe ngam senndirgo bee maɓɓe. 10Nde Roma'en nani ɗum, ɓe neli mawɗo ardiiɓe sooje'en gooto ngam hongo ɓe. Ɗuuɗɓe nder Yunaniŋke'en mbaraama nder haɓre man, rewɓe maɓɓe e ɓikkoy maɓɓe naŋngaama. Roma'en luuwi jawle maɓɓe e marti wuro maɓɓe, ɓe pusi mahi, laatini ɓe bana maccuɓe bana no ɓe ngaɗata hannde boo. 11To ɓe kaɓti ɓe haa lesɗe goɗɗe, nder duuɗe, Roma'en nattina gure man e ɓe ngartira yimɓe gure man maccuɓe maɓɓe. 12Ammaa Roma'en ɗon njogi sooba'en muuɗum'en bee amaana non boo hooliiɓe ɓe. Ɓe leesni laamiiɓe lesɗe keedduɗe bee maɓɓe bana laamiiɓe lesɗe daayiiɗe boo. Nanɓe habaru maɓɓe fuu kuli ɓe. 13Ɓe ɗon laama ɓen ɓe ngiɗi laamaago, ɓe ɗon ɓorta ɓen ɓe ngiɗaa. Ɓe njottake haa kaakaadi maŋngu. 14Bee man fuu, walaa Romaajo gooto hifnoto hufnoore laamu malla ɓornoto limce laamu ngam haa heɓa daraja. 15Ɓe njo'ini kawtal ardiiɓe teemeɗɗe tati e noogas. Nyalaade fuu, suɓaaɓe kawta, carwootira dow saɗirmaaji jama'aare, ngam haa koo moy fuu weltinoro. 16Hitaande fuu, ɓe kalfina gooto caka maɓɓe ardaago Roma'en e o ardo laamu man fuu. Ɓe ɗowtano mo e walaa kaajanɗo mo malla ganyanɗo mo.
Alkawal Yahuudu'en bee Roma'en
17Yahuuda suɓi Epolem ɓii Yuhanna e taaniraawo Hakkos bee Yason ɓii Eli'azaaru, o neli ɓe haa Roma. O neli ngam haɓɓugo alkawal e waɗgo amaana bee Roma'en. 18Yahuuda tammono o hisnan Yahuudu'en wonɓe dow maral Yunaniŋke'en haa Siriya, ɓen haɓdanɓe wartirgo Isra'iila'en maccuɓe. 19Epolem e Yason ndilli Roma. Ɓaawo jahaaŋgal juutŋgal, ɓe njotti yeeso kawtal ardiiɓe Roma, ɓe mbolwani ɓe boliiɗe ɗe'e: 20“Yahuuda Makabe, deerɗum'en e jama'aare Yahuudu'en neli min haa mooɗon ngam min kaɓɓa alkawal jam. Min ngiɗi, bee laaɓɗum, min lime caka wonduɓe bee mooɗon e min laato min soobiraaɓe mon.”
21Ardiiɓe Roma njaɓi sarɗuwol man. 22Ndaa no bataakewol man winndira dow alluha njamndi mboɗeeri. Kanjum ɓe neldi haa Urusaliima ngam siftinora Yahuudu'en alkawal jam e salaaman:
23“Min ɗon ngelo Roma'en e jama'aare Yahuudu'en ceyo haa foroy haa lesdi non boo dow maayo. Ɓe laato hisnaaɓe dow konne'en maɓɓe e nder konu boo! 24Ammaa koo toy nder lesdi, to konu ummake dow Roma'en malla dow hawtananɓe ɓe, 25jama'aare Yahuudu'en haɓoyan bee ɓernde woore bee maɓɓe bana no ɗum haandi wakkati man. 26Roma'en ɗon ƴama Yahuudu'en taa ɓe ndokka malla ɓe coorra alkamaari, balmi, ceede malla koommbooje haa konne'en maɓɓe. Ɓe laato neɗɗinɓe alkawal maɓɓe, walaa ko ɓe tammoto ɓaawo man. 27To konu ummake dow Yahuudu'en boo, Roma'en nastan haɓre man bee ɓernde woore ngam jiŋngugo ɓe bana no ɗum haandi wakkati man. 28Roma'en iinani Yahuudu'en ɓe ndokkataa koo alkamaari, koo balmi, koo ceede malla koommbooje haa konne'en maɓɓe. Roma'en ɗon neɗɗini jogaago alkawal nga'al bee gooŋga.” 29Kanjum woni sarɗiiji binndaaɗi ɗi ɓe kaɓɓotiri bee Yahuudu'en. 30To nder garanɗum, ɓe ɗiɗo fuu ɓe narri haa ɓe ɓesda malla ɓe usta sarɗuwol dow ko winnda, ɓe poti ɓe ngaɗa ɗum, doole ɓe ngaɗa fodde ko ɓe ɓesdi malla ɓe usti. 31Min neli boo haa laamiiɗo Demetiriyus bataakewol dow aybeeji ɗi o waɗi Yahuudu'en: “Koni a ɓillata sooba'en amin e wallooɓe amin Yahuudu'en bee caatal? 32To ɓe meeti siŋkugo ma, min njiŋngan ɓe e min ngaɗan konu bee ma haa lesdi e nder ndiyam fuu.”
Currently Selected:
1 Makabe 8: FBDC
Highlight
Copy
Compare
Share
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.