1 Makabe 6
6
Nyawu e waade laamiiɗo Antiyokus nayaɓo
1Wakkati laamiiɗo Antiyokus ɗon taƴta lesdi towndi, o heɓi habaru no woodi haa lesdi Persiya wuro wi'eteeŋgo Elimayis, nanaaŋgo daliila riskuuji e cardi e kaŋŋeeri maago. 2Haykaliiru maago marno jawle ɗuuɗɗe. Nder maaru, woodi sulkeeji kaŋŋeeri, ndarganaaje e balmi ɗum Zuulgarnayni ɓii Filip laamiiɗo Makedoniya aartuɗo laamaago dow Yunaniya ɗali. 3Antiyokus yehi haa Elimayis go, tefi nyaamgo ngo ngam o luuwa ngo, ammaa o heɓaay jaalorgal dow maago. Ngam yimɓe wuro man keɓi habaru anniyaaji laamiiɗo man. 4Ɓe kaɓti mo e ɓe njaali mo, o dilli o toskaaɗo masin, o lori Baabila.
5Nden man nelaaɗo maako diga Persiya haa maatina mo no mooɓre nde o neli haa Yahudiya jaalaama. 6Lisiyas yahduno bee mooɓre semmbiɗnde, ammaa Yahuudu'en parti ɓe, caŋkiti ɓe. Ɓaawo ɓe campiti mooɓre laamiiɗo, Yahuudu'en njaɓti balmi maɓɓe, kuuje konu e jawle, ɗum fuu ɗum ɓesdani ɓe semmbe. 7Ɓe nattini “kuuŋga nyidduŋga” nga laamiiɗo nyiɓi dow hirsirde seniinde haa Urusaliima, ɓe taari haykaliiru bee mahi towɗi bana ɓooyma e ɓe cemmbiɗini bana non boo Bayti-Sur, wuro nder gure laamiiɗo.
8Nde Antiyokus heɓi kubaruuji man, ɗi kayɗini mo, ɗi ɓilli mo haa o nyawi, o waali dow leeso. O suni ngam ɗum waɗaay bana no o yiɗiri ɗum waɗe. 9Mettamɓeramji goɗɗi mballini mo dow leeso ngo'o balɗe ɗuuɗɗe, o faami jonta kam saa'i maako waɗi. 10O ewni “sooba'en maako” fuu, o wi'i ɓe: “Mi heɓataa mi ɗaano, kultoreeŋgol ɓilli yam. 11Mi tefi haa mi faama ko waɗi mi ɗon nder sooynde tammunde ngam mi nder laamu am mi woonani yimɓe e ɓe ngiɗi yam boo. 12Ammaa mi siftori jonta kalluɗi ɗi mbaɗmi haa Urusaliima: Mi itti nder haykaliiru kuuje marɗe kaŋŋeeri e ceede, mi umri bilaa daliila ɓe mbara yimɓe wuro Yahudiya. 13Mi anndi kanjum woni daliila masiibooji ɗi keɓmi jonta, mi maayan bilaa tammunde nder lesdi njananndi.”
14Nden o ɓaditini Filip, gooto nder “sooba'en laamiiɗo”, o umri mo o suklano ngomna laamu wuro man fuu. 15O hokki mo meetaleewol laamu, alkibbaare laamu e halagaare takkugo dow ɗereeji. O wi'i mo o suklano ɓiyiiko Antiyokus e o hokka mo jaŋngirde wallannde mo haa o laamo. 16Laamiiɗo Antiyokus maayi nder hitaande 149 haa Persiya. 17Nde habaru maayde maako yotti haa Lisiyas, o darni Antiyokus pamaro mo o mawnini diga nderkaaku mum bana laamiiɗo. O inndani mo Epator.
Yahuuda taari cuuɗi Urusaliima cemmbiɗɗi
18Yaake man, konne'en wonɓe haa cuuɗi Urusaliima cemmbiɗɗi, kaɗi Yahuudu'en yiilaago kommbi haykaliiru, ɓe ɗonno tefa ɓillugo ɓe koo toy fuu e wallugo heefeerɓe. 19Yahuuda Makabe annini timmindirgo bee maɓɓe, o mooɓti jama'aare fuu ngam o hippo ɓe. 20Isra'iila'en mooɓti, ɓe taari mahol cemmbiɗŋgol ngol wuro man nder hitaande 150, ɓe nyiɓi jo'inirɗum piɗorɗum e ko yibbinta mahi. 21Ammaa konne'en hippaaɓe woɗɓe keɓi dabare wurtaago, ɓe ndoggi bee Yahuudu'en yedduɓe Allah, 22ɓe njehi haa laamiiɗo Antiyokus Epator, ɓe mbi'i mo: “Ndey taaskantooɗa torrugo konne'en men e mbaatantoɗa sooba'en men? 23Minin, min njaɓi huuwango baaba ma e ɗowtanaago kiitaaji e umrooje maako. 24Ngam maajum, yimɓe amin laati konne'en amin: Ko ɓuri ɓe mbari yimɓe ɓe tawi caka amin, ɓe njaɓti jawle amin. 25Naa min tan ɓe toonyi ammaa lesɗe keedduɗe bee amin fuu. 26Jonta boo, ɓe ɗon ngaɗa dabare hippaago mahi Urusaliima cemmbiɗɗi ngam ɓe njaɓta ngol e ɓe cemmbiɗini mahi haykaliiru e wuro Bayti-Sur. 27To a yaawaay haɓgo bee maɓɓe, ɓe ngaɗan ko tulli e a waawataa darnugo ɓe.”
Laamiiɗo Antiyokus njowaɓo nasti haɓre bee Yahuudu'en
28Nde laamiiɗo Antiyokus nani habaru maajum, o ɓerni. O mooɓti “sooba'en laamiiɗo” fuu, ardiiɓe sooje'en e wakiili'en wa'otooɓe pucci. 29O wuƴi sooje'en gal gure goɗɗe e gal duuɗe Yunaniŋke'en. 30Tuutawal maako ɗon mari sooje'en yahooɓe bee kosɗe ujine teemerre, ujine noogas bee pucci, nyiibi kaɓooji cappanɗe tati e ɗiɗi. 31Laamiiɗo e mooɓe mum taƴti caka Idume e ɓe kippi Bayti-Sur, haɓre man neeɓi balɗe seɗɗa. Ɓe nyiɓi jo'inirɗum piɗorɗum e ko yibbinta mahi, ammaa hippaaɓe keɓi laawol wurtaago, ɓe kuɓɓi yiite e ɓe kaɓi bee cuusal. 32Nden Yahuuda acci berniwol Urusaliima, o saŋngini bee yimɓe maako haa Bayti-Zakariya tiitotirɗum bee saŋngeere laamiiɗo. 33Jaŋngo maajum, fajiri cub, laamiiɗo yerɓi sooje'en mum bee jaawɗum dow laawol jahranŋgol haa Bayti-Zakariya, mooɓe maako ndarni caffuuji muuɗum'en, ɓe puufi algayta. 34Ɓe esti nyiibi haa haɓre bee hokkugo ɗi inaboojam njillaaɗam bee ndiyam ɓiɓɓe leɗɗe ɓennduɗe. 35Ɓe cennditi ɗi caka geɓe sooje'en yahooɓe bee kosɗe. Yimɓe ujineere ɓorniiɓe jamɗe e waɗɓe kifineeje jamɗe boɗeeje ɗon ndari les nyiiwa ngaye fuu. Fahin, yimɓe wa'otooɓe pucci teemeɗɗe njowo waawɓe pucci, ɗon ɗofta ndabbaawa fuu. 36Ɓe ɗon ndaro haa nyiiwa fuu daroto. To nga yehi, ɓe tokko nga e ɓe daayataako nga. 37Daŋki nannduki bee cuurel, ɗon haɓɓe bee callallu haa ɓaawo nyiiwa fuu ngam hisnugo sooje'en nayo wonɓe dow maaga ngam haɓgo e ɗowoowo nga.
38Laamiiɗo darni luttuɓe bee pucci haa babe feere feere gal sera sooje'en: Ɓe ɗon njaha ɓilla sooje'en Yahuuda, ɓe ɗon kisna mooɓe kosɗe. 39Nde njayawri naaŋge jalbiti dow ndarganaaje ɗe kaŋŋeeri e njamndi mboɗeeri, kooseeje njalbiti e ɗelki bana to yiite ulgi. 40Mooɓre laamiiɗo ɗon dari haa caffuuji konu, woɗɓe haa towɗum, woɗɓe haa yayre. Ɓe ɗon njaha bee hoolaare e nder darnuɗum. 41Haraka yimɓe ujineeje yahooɓe bee kosɗe e balmi lukkindiranɗi caka maaji ɗon hulna nananɓe ɗum fuu: Mooɓre konu nde'e nde ɗuuɗnde e semmbiɗnde. 42Yahuuda e mooɓe mum ndilli haɓoygo, nden ɓe mbari sooje'en laamiiɗo teemeɗɗe joweego. 43Eli'azaaru bi'eteeɗo Awaran laari nyiiwa ngoota. Ndarganaawal laamiiɗo faddi nga, nga ɓurdi goɗɗi mawnugo, o tammo laamiiɗo ɗonno wa'i nga. 44O annini hokkugo yoŋki maako ngam hisnugo jama'aare maako haa o heɓa innde duumiinde ɓaawo maayde maako. 45O sorki bee cuusal caka sooje'en bee kosɗe, o wersi haa o yotti nyiiwa, o mbari yimɓe gal nyaamo maako e gal nano maako, o farti konne'en gal bakkeeje ɗiɗi fuu. 46O sori les ndabbaawa go, o yuwi nga gal les haa nga waati. Nga do'i dow Eli'azaaru, kanyum boo maayi ton. 47Nde Yahuudu'en annditi semmbe sooje'en laamiiɗo e tiinaare yimɓe maako, ɓe lorti ɓaawo.
Antiyokus hippi hooseere Siyona
48Konne'en eggi saŋngeere laamiiɗo, ɓe mba'i Urusaliima ngam hongo Yahuudu'en. Laamiiɗo yiɗi hippugo Yahudiya e hooseere Siyona.
49O sulhindiri tawon bee Yahuudu'en wonɓe haa Bayti-Sur. Kamɓe ɓe ngurti berniwol mum'en ngam ɓe ngalaano nyaamdu he'anndu to kippol man neeɓan: Ɗum hitaande siwtorde nde ɓe ndemataa gese maɓɓe. 50Laamiiɗo hooci berniwol Bayti-Sur, o ɗali mooɓre ngam aynugo ngol. 51O taari haykaliiru balɗe ɗuuɗɗe, o jo'ini jo'inirɗum piɗirɗum e kuuje pusruɗe mahi, cakkinirɗum yiite, piɗirɗum kaa'e e kuuje piɗirɗe kuri e irin piɗirɗi fuu. 52Yahuudu'en hippaaɓe mbaɗi kamɓe boo jamɗe goɗɗe campitooje balmi konne'en, ɓe kaɓi e haɓre man neeɓi. 53Ammaa walaa nyaamdu nder cigorɗi haykaliiru ngam ɗum hitaande siwtorde e Yahuudu'en warɓe diga gure jananne nyaamdi nyaamduuji cigaaɗi fuu. 54Ngam daliila weelo ɓilluŋgo hippaaɓe, yimɓe seɗɗa tan njooɗi nder haykaliiru, woɗɓe caŋkiti, koo moy fuu haa saare mum.
Antiyokus njowaɓo hokkiti Yahuudu'en ndimu
55-56Wakkati maajum Lisiyas heɓi habaru no Filip warti Persiya e Mediya bee mooɓe ɗoftuɗe laamiiɗo. O nani boo o yiɗi ardanaago kuuɗe laamu. Ɗum Filip mo Antiyokus nayaɓo halfinno ɓiyum Antiyokus hiddeko o maaya ngam o hokka derkeejo oo jaŋngirde wallannde mo haa o laamo. 57Lisiyas ɗon taasko haa o dilla. O wi'i haa laamiiɗo pamaro, haa ardiiɓe sooje'en e haa sooje'en: “En ɗon tampa nde weeti fuu e gure men ɗon usto tum. Babal ngal taariiɗen ɗon saati e sey cuklanooɗen laamorde men boo. 58Accen hongo yimɓe ɓe'e: Sulhindiren bee maɓɓe e ummaatoore maɓɓe fuu. 59Ɗalen ɓe ɓe ngeeɗa bana no al'aadaaji maɓɓe ngiɗi bana ɓooyma. Ɓe tuurti, ɓe ngaɗi bononndaaji diga min mbili ɓe al'aadaaji maɓɓe.”
60Laamiiɗo e ardiiɓe fuu ngerdi sawari man. Lisiyas neli dow Yahuudu'en ngam ɓe culhindira e ɓe njaɓi boo. 61Ɓaawo laamiiɗo e ardiiɓe kuni neɗɗingo narral nga'al, Yahuudu'en ngurti nder suudu maɓɓe semmbiɗndu. 62Ammaa nde laamiiɗo yotti dow hooseere Siyona, o laari noy babal ngal semmbiɗinaaŋgal. O yewi alkawal ngal o huni e o umri ɓe campita mahi taariiɗi haykaliiru. 63Ɓaawoɗon, o yaawi huucugo Antakiya. O tawi Filip marti berniwol. O haɓi bee maako, o jaɓti Antakiya bee semmbe.
Currently Selected:
1 Makabe 6: FBDC
Highlight
Copy
Compare
Share
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.