1 Makabe 4
4
Yahuuda heɓi jaalorgal haa Emmawus
1Gorgiyas hooci yimɓe ujine njowo e wa'ooɓe pucci ujineere. Mooɓre nde'e wurti bee jemma 2ngam hippugo Yahuudu'en bee juhuki e jaalaago ɓe. Yimɓe wonɓe haa Urusaliima ɗon ardi ɓe. 3Yahuuda heɓi habaru man, dilli bee sooje'en maako suusɓe, o yiɗi jaalaago sooje'en laamiiɗo haa Emmawus 4wakkati Gorgiyas e mooɓre mum ɗon ndaayi bee saŋngeere. 5Gal wakeere maako boo, Gorgiyas bee yimɓe mum, njotti saŋngeere Yahuuda bee jemma, ɓe tawaay koo goɗɗo. Ɓe tammi Yahuudu'en ndoggi yeeso maɓɓe, nden ɓe mbi'i ɓe taasna ɓe nder hooseere.
6Nde fajira weeti, Yahuuda waŋgi nder yayre bee yimɓe ujine tato. Ammaa ɓe ngalaa culke e kaafaaje ɗe ɓe ngiɗi. 7Ɓe eewi mooɓre sooje'en heefeerɓe ɗon ɓorni culke, pucci ɗon taari ɓe, ɓe mboowi waɗgo konu. 8Yahuuda wi'i yimɓe mum: “Taa kule ɗuuɗeeŋga sooje'en e taa kultore to ɓe ukkanake en. 9Ciftore noy kaakiraaɓe men kisna haa maayo Maaliya yaake Firawna e sooje'en mum ɗon tokki ɓe. 10Jonta kam toroɗen Allah o hokka en jaalorgal, o siftora alkawal ngal o haɓɓi bee kaakiraaɓe men, o ɗiggina hannde boo sooje'en wonɓe yeeso meeɗen. 11Ummaatooje heefeerɓe fuu paaman woodi dimɗinoowo e kisnoowo Isra'iila.” 12Nde konne'en eewi Yahuudu'en ɗon ngara dow maɓɓe, 13ɓe ngurti diga saŋngeere maɓɓe haa ɓe kaɓa bee maɓɓe. Yimɓe Yahuuda puufi algayta 14e ɓe kippi ɓe. Heefeerɓe partaama, ɓe ndoggi gal yayre. 15Sakitiiɓe fuu mbaraama. Yahuudu'en taasni konne'en haa Gezer, haa nder yayre Idume, haa Asdod e Jamniya. Ɓe mbari baakin ujine tato.
16Nde Yahuuda wartoyi bee sooje'en mum, 17o wi'i yimɓe maako: “Taa cuunen ndahalaagu, ndikka tokkitinen konu. 18Gorgiyas e mooɓre mum ɗon nder hooseere kommbi men. Taaskite booɗɗum dow konne'en men e kone ɓe. Ɓaawo man, on poti mooɓtugo ndahalaagu bee hoolɗinaare.” 19Yahuuda timminaay wolde mum, ɓe ndaari ko yeɓre sooje'en aynanɓe waɗata dow hooseere. 20Ɓe paami sooje'en maɓɓe partaama e saŋngeere maɓɓe ɗonno wula: Cuurka ndilluka dow holli ɗum laaɓɗum. 21Bee laargo ɗum, ɓe kultori jamum. Nde ɓe ndaari haa yayre sooje'en Yahuuda ɗon taaskitani haɓre, 22ɓe ndoggi ɓe fuu haa lesdi Filisti'en. 23Yahuuda lorti nder saŋngeere konne'en ngam ɓoftugo jawle. Yahuudu'en kooci kaŋŋeeri ɗuuɗndi, ceede, limce bee riskuuji goɗɗi. 24Ɓe kuuci ɓe ɗon ngetta Jawmiraawo. Ɓe ɗonno ngima: “O booɗɗo e yiide maako timmataa.” 25Ɗum laati nyannde dimɗineeki ngam Isra'iila.
26Sooje'en jananɓe doggunooɓe njehi maatini Lisiyas ko waɗi fuu. 27Nde o nani habaru man, o sakli, jokke maako mbaati. Fakat, konu bee Isra'iila'en yahaay bana o yiɗno e ragare konu man yahdaay bee ko laamiiɗo umrino.
Yahuuda heɓi jaalorgal haa Bayti-Sur
28Marɗo balɗe, Lisiyas mooɓti sooje'en maako suɓaaɓe ujine cappanɗe njoweego e wa'ooɓe pucci ujine njowo ngam haɓgo bee Yahuudu'en.
29Ɓe ndilli haa Idume, ɓe caŋngini haa Bayti-Sur. Yahuuda yehi fotti bee maɓɓe bee yimɓe ujine sappo.
30Nde o yi'i sooje'en heefeerɓe semmbiɗɓe, o waɗi tornde nde'e: “A yettaama kisnoowo Isra'iila! An, bee juŋngo jagganiiɗo ma Daawuda yewno hippannde Goliyat. An hokki sooje'en Filisti'en haa juŋngo Yonatan ɓii Sawulu e haa jagganiiɗo pamaro jogotooɗo balmi maako.
31Jaal bana nii sooje'en konne'en laamu Isra'iila, jama'aare maaɗa. Semtin ɓe, toskin ɓe, koo ngam ɓe ɗon mari sooje'en e pucci ɗuuɗɗi.
32Hebbin ɓe kulol, yew hoolaare nde ɓe koolori semmbe maɓɓe. Waɗ ɓe ndiwna to ɓe numi ɓe jaalotooɓe.
33Waɗ ɓe maaya bee kaafaaje yiɗɓe ma haa annduɓe innde ma, maŋgta ma bee gime maŋgtooje.”
34Mooɓe sooje'en ɗiɗi go tiitotiri nder haɓre, Yahuudu'en mbari ko dillani sooje'en Lisiyas ujine njowo.
35Lisiyas laati ceedoowo dow jaaleeki mooɓre maako, o annditi cuusal sooje'en Yahuuda, taaskaniiɓe yeeɗgo e maaygo. Sey o lorti haa Antakiya, o yoɓi sooje'en jananɓe ngam o yaha o hippa lesdi Yahudiya fahin bee sooje'en ɓurɓe naane.
Cenki Haykaliiru
36Nden Yahuuda e deerɗum'en mbi'i: “Nde konne'en men fuu njaalaama, ndillen Urusaliima haa cenen haykaliiru haa wartana Allah fahin.”
37Sooje'en fuu mooɓti, mba'i hooseere Siyona.
38Ɓe ndaari walaa koo goɗɗo nder haykaliiru, hirsirde soɓaama e dammuɗe ngulaama. Leɗɗe pamare ɗon puɗa haa daldal maaru bana nder ladde malla dow kooseeje, cuuɗi maaru fuu mbonni.
39Nden ɓe ceeki limce maɓɓe, ɓe mboyi ɗuuɗɗum e ɓe ndufi ndoondi dow ko'e maɓɓe.
40Ɓe turi haa geese maɓɓe meemi lesdi e nde algayta fuufi, ɓe kolli Allah bojji maɓɓe.
41Ɓaawoɗon, Yahuuda umri sooje'en woɗɓe kippo aynooɓe mahi taariiɗi berniwol yaake o ɗon suklani sengo haykaliiru.
42O suɓti liman'en ɓe ngalaa feloore e tokkiiɓe Tawreeta Muusa.
43Ɓe ceni haykaliiru e ɓe njahri kaa'e coɓɗe haa babal coɓŋgal.
44Ɓe ɗon ƴamƴamtira noy ɓe ngaɗata bee hirsirde soɓnde nde heefeerɓe coɓni.
45Ɓe keɓi sawari ɓe pusa nde, ngam taa coɓɗum waylito semtina ɓe. Ɓe campiti nde
46e ɓe kooci kaa'e maare, ɓe njo'ini haa babal kaanduŋgal dow townde haykaliiru. Kaa'e man njooɗo ton hiddeko annabiijo garanɗo wi'a ko ɓe ngaɗata bee maaje.
47Ɓe kooci kaa'e ɗe cehaaka bana no Tawreeta wi'i, ɓe ngaɗi hirsirde hesre nanndunde bee hiinde.
48Ɓe mbo'itini haykaliiru, ɓe pawni nder maaru, ɓe ceni daldal maaru.
49Ɓe tappi kuuje kuuwtinirɗe ceniiɗe e ɓe njo'ini nder haykaliiru pittirlaaji, hirsirde uurle e taabal tamseeje lii'anaaɗe Allah.
50Ɓe nguli tame uurɗe dow hirsirde. Ɓe kuɓɓi pittirlaaji dow jo'inirɗe maaji ngam ɗi njayna haykaliiru.
51Ɓe njo'ini tamseeje dow taabal, ɓe pooɗi laabule e ɓe timmini kuuɗe ɗe ɓe puɗɗino.
52Nyannde noogas e jowaɓre nder lewru joweenayaɓru, waato lewru Kislew nder hitaande 148, Yahuudu'en ummi fajira cub,
53bana no Tawreeta Muusa umri, ɓe lii'i kirseteeɗi maɓɓe dow hirsirde hesre nde ɓe nyiɓi.
54Deydey wakkati heefeerɓe coɓni hirsirde, nden man hirsirde hesre senaama bee gime, geegeeji, gommbe e bawɗi.
55Yimɓe jama'aare fuu turi haa geese maɓɓe meemi lesdi ngam sujidaago. Ɓe ngetti Allah dokkuɗo ɓe jaalorgal.
56Ɓe ceyi deydey balɗe joweetati dow sengo hirsirde hesre. Hoolaaɓe lii'i kirseteeɗi, kirseteeɗi ɗi kawtal Allah bee yimɓe e ɗi yettoore bee seyo maŋngo.
57Ɓe pawni dammugal haykaliiru bee meetaleeji kaŋŋeeri e ndarganaahon, ɓe mbo'itini nastirɗe e cuuɗi, ɓe ngaati pareeje boo.
58Seyo maŋngo saŋkiti nder jama'aare, ngam ɓe itti cemtuɗum ɗum heefeerɓe ukkani ɓe.
59Yahuuda, deerɗum'en e kawtal Isra'iila fuu kaɓɓi anniya waɗgo juulde maajum nder seyo maŋngo hitaande fuu, haa wakkati man, diga nyalde noogas e jowi lewru Kislew, juulde nde'e duuran deydey balɗe joweetati.
60Ɓe nyiɓi haa wakkati man kommbi hooseere Siyona, mahi towɗi e aynorɗi dow mahol, ngam haɗgo heefeerɓe wargo soɓna babe man fahin.
61Yahuuda jo'ini yeɓre sooje'en ngam aynugo haykaliiru. O nyiɓi mahi towɗi haa wuro Bayti-Sur ngam jama'aare Isra'iila wona nder hoolɗinaare to Idume'en tiitake ɓe.
Currently Selected:
1 Makabe 4: FBDC
Highlight
Copy
Compare
Share
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.