1 Makabe 13
13
Simon roni laamu Yonatan
1Simon heɓi habaru Tirifon mooɓti mooɓe sooje'en ɗuuɗɓe ngam o yaha haa Yahudiya, o nattina lesdi man. 2Nde o faami jama'aare ɗon diwna ngam kultoreeŋgol, o dilli Urusaliima, o mooɓti Yahuudu'en. 3O haɓdi de'itingo ɓe, o wi'i ɓe: “Onon fuu on anndi, min e deerɗam'en fuu e lenyol amin fuu, min kaɓani hisnugo Tawreeta e haykaliiru men. On anndi konuuji e boneeji ɗi min ngiidi. 4Ngam hisnugo Isra'iila, deerɗam'en fuu maayi. Jonta, mi lutti feere am. 5Mi numaay hisnugo yoŋki am wakkati masiibo, yoŋki am ɓurataa ki deerɗam'en saman. 6Ammaa mi haɓan ngam hisnugo jama'aare am, haykaliiru men, rewɓe mon, ɓikkoy mon, ngam nder nganyŋgu maɓɓe dow men, heefeerɓe kawti ngam mbargo en.”
7Boliiɗe Simon ɗe'e cuusɗini yimɓe. 8Yahuudu'en njaabi mo bee semmbe: “An woni ardiiɗo amin haa babal deerɗa'en Yahuuda e Yonatan. 9Arda min haa haɓre, min tokkoto ko mbi'ɗa.” 10Nden Simon mooɓti yimɓe haanduɓe haɓgo, o yaawi lamsugo mahi Urusaliima, o semmbiɗini mahi taarɗi berniwol man. 11O neli Yonatan ɓii Absalom haa Jaffa bee mooɓre sooje'en ɗuuɗɓe. Yonatan farti yimɓe wuro man e o waɗi weerde haa ton.
Tirifon jumji Simon e o mbari Yonatan
12Tirifon ummi diga Potolemayis bee mooɓe ɗuuɗɗe ngam o hippoyo Yahudiya. O yahdi bee Yonatan, deerɗiraawo Simon mo o naŋngi. 13Simon waɗi saŋngeere mum haa Adida, nde tiitotiri bee yayre. 14Tirifon nani Simon hooci laamu ɓaawo deerɗum Yonatan e o ɗon taaskano konu bee maako. O neli nelaaɓe dow Simon ɓe mbi'a mo nii: 15“Deerɗiraawo ma Yonatan ɗonno nela ceede haa ndesaari laamu daliila kuugal limanku maako. Ammaa nde o waɗaay ɗum, mi jo'ini mo haa am bana daŋngayjo. 16Mi yooftan mo to a neldi yam kilo cardi ujine ɗiɗi e teemeɗɗe joweeɗiɗi, mi jogi boo ɓiyiiko'en ɗiɗo ngam haɗgo mo tuurtugo dow amin to min njoofi mo.”
17Simon faami ɓe ngiɗi jumjugo mo, ammaa o neli ɓe ngaddana mo ceede e ɓikkoy ngam o ɗon hula taa yimɓe tuurtana mo 18e ɓe mbi'a: “Yonatan maayi ngam Simon waawaay hokkugo Tirifon ceede e ɓikkoy.” 19O hokki ɓikkoy e kilo cardi 2.700, ammaa Tirifon jumji mo, sali yoofgo Yonatan.
20Ɓaawoɗon, Tirifon ummini jahaaŋgal ngam hippaago lesdi e nattingo ndi. Kaŋko e sooje'en maako fuu, ɓe mbiddi, ɓe caali gal laawol jahranŋgol haa berniwol bi'eteeŋgol Adora. Ammaa Simon, bee sooje'en mum ɗon kippo mo gal o yiɗi saalaago fuu. 21Nder wakkati man, yimɓe wonɓe nder taarde cuuɗi Urusaliima cemmbiɗɗi neli nelaaɓe haa Tirifon. Ɓe toro mo o wara bee ko yaawi, o hawtana ɓe gal laawol harde e o nelda ɓe ko ɓe nyaama. 22Tirifon taaskitini wa'ooɓe pucci maako fuu ngam jahaaŋgal man, ammaa jemmaare man waabiliire bee mallimallooje toɓi, haɗi mo tokkaago ton. O tokkiri gal lesdi Galaad. 23Nde o yotti kommbi Baskama, o mbari Yonatan e ɓe uwi mo haa ton. 24Nden Tirifon lorti lesdi mum.
25Simon neli yimɓe koocoya ɓanndu deerɗum Yonatan, o uwi mo haa Moodin haa wuro kaakiraaɓe maako. 26Isra'iila'en fuu mboyi bee bojji naawɗi, ɓe njooɗi maayiti Yonatan balɗe ɗuuɗɗe. 27Simon nyiɓi yenaande baaba muuɗum e deerɗum'en ngam haa ɗum laare diga daayiiɗum. Nyiɓaalo yenaande man yeeso e ɓaawo fuu, huuwraama bee hayre ɗiggunde. 28Simon nyiɓi boo genaale misraaje joweeɗiɗi keeddiɗɗirɗe, ngam baaba maako, daada maako e deerɗiiko'en nayo. 29O taarni genaale misraaje bee towɗe. O jaagni daŋraŋge man bee balmi sooje'en fuu ngam ɓe ciftora kuuɗe Makabe'en ndey fuu. Ɓe cuurɗini kommbi balmi go koommbooje ngam haa yiilotooɓe nder maaje ngi'a ɗe. 30Yenaande nde Simon nyiɓi haa Moodin, haa hannde fuu nde ɗon.
Demetiriyus ɗiɗaɓo tabitini alkawal bee Yahuudu'en
31Wakkati man Tirifon ɗon huuwra bee faasikaare bee laamiiɗo pamaro Antiyokus, o safti o mbari mo. 32O hooci babal maako, o meeti meetaleewol laamu Siriya maŋngo, o waɗi bononnda ɗuuɗŋga nder lesdi.
33Simon, gal wakeere mum, nyiɓti cuuɗi Yahudiya cemmbiɗɗi, o taarni ɗi bee cuuɗi aynorɗi towɗi e mahi mawɗi, o semmbiɗini pareeje marɗe jamɗe. O sigi ton nyaamduuji. 34O suɓi wakiili'en, o neli ɓe ɓe ƴama laamiiɗo Demetiriyus ɗiɗaɓo o rimɗina Yahudiya yoɓgo garaama ngam walaa ko Tirifon waɗi sey luuwgo lesdi. 35Demetiriyus neldi mo jaawaabu ko yahdata bee ƴamol ngo'ol. Bataakewol ngo'ol winndaama bee boliiɗe ɗe'e: 36“Laamiiɗo Demetiriyus hoofni Simon, limanjo mawɗo e soobaajo laamiiɓe, ndotti'en jama'aare e ummaatoore Yahuudu'en. 37Min keɓi hufneere kaŋŋeeri e lisal gelleehi ɗum nelduɗon min caahu, min ɗon taaski waɗgo alkawal salaaman timmuŋgal bee mooɗon, min mbinndanan huuwooɓe ngomna njaafo on garaama. 38Ko min ndokki on fuu, tabiti. Cuuɗi cemmbiɗɗi ɗi nyiɓɗon boo, ɗi laatano on. 39Min njaafi boofi e aybeeji ko ngaɗɗon haa hannde. On ndimɗi e yoɓgo garaama laamiiɗo e dow garaama jaɓeteeka haa Urusaliima, yeeso ɗo on njoɓataa ka. 40To woodi caka mon yiɗɓe nastugo nder sooje'en aynooɓe laamiiɗo, ɓe njaɓɓaama! Jam tabita caka men.” 41Nder hitaande 170, Isra'iila fuu rimɗinaama diga baawɗe ummaatooje heefeerɓe. 42Yimɓe puɗɗi maandaago ɗereeji e alkawe bana nii: “Nder hitaande arannde nde Simon, limanjo mawɗo, mawɗo ardiiɗo sooje'en e ardiiɗo Yahuudu'en laami.”
Simon naŋngi Gezer e cuura cemmbiɗŋga taariiŋga Urusaliima
43Nder zamanu man, Simon hippi wuro Gezer. O jo'ini sooje'en haa taarde berniwol man fuu, o nyiɓi suudu aynirdu ndu ɓe cottinta e o yerɓi ndu haa les mahi wuro. O hippi aynirdu wooru e o hooci ndu. 44Wonɓe dow aynirdu man ndiwi, caŋkiti nder berniwol, ɗum waɗi kultoreeŋgol maŋngol. 45Yimɓe wuro mba'i dow mahi bee rewɓe e ɓikkoy, ɓe ɗonno ceeka limce maɓɓe, ɓe ɗonno mbooka, ɓe ɗonno toro Simon yaafo ɓe. 46Ɓe ɗonno mbi'a mo: “Taa waata halleende nde min ngaɗi, yurmin min!” 47Simon de'iti, o darni haɓre. Ammaa o farti ɓe diga berniwol, o itti labbi gonɗi calaaje maɓɓe. Nde o waɗi non, o nasti bee sooje'en maako nder Gezer bee gime yettoore. 48O itti haa wuro ko soɓnata ngo pat, o jo'ini yimɓe tokkiiɓe Tawreeta Allah. O semmbiɗini mahi e o nyiɓi saare maako.
49Haa Urusaliima, yimɓe wonɓe nder suudu semmbiɗŋgu kaaɗaama wurtaago ngam soodgo malla soorrugo koo ɗume nder lesdi man. Weelo torri ɓe jamum, ɗuuɗɓe nder maɓɓe maayi. 50Ɓe tori Simon waɗa sulhu bee maɓɓe, o jaɓani ɓe. O wurtini ɓe diga suudu semmbiɗndu go, o seni babal man. 51Yahuudu'en nasti ton bee gime maŋgtooje, nyalde noogas e tataɓre nder lewru ɗiɗaɓru nder hitaande 171. Ɓe ɗon njogi lice gelleehi, ɓe ɗon ngima maŋgtooje bee moolooji e bawɗi: Konneejo mawɗo jaalaama e fartaama diga lesdi Isra'iila. 52Simon umri hitaande fuu, nyalde man laato juulde. O semmbiɗini towndiire nde haykaliiru, gal wakeere suudu semmbiɗndu. kaŋko fuu o weeri ton bee sooje'en maako. 53Nde ɓiyiiko Yuhanna laati suka, Simon ardini mo mooɓe sooje'en maako fuu. Yuhanna jooɗoyi haa Gezer.
Currently Selected:
1 Makabe 13: FBDC
Highlight
Copy
Compare
Share
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.