1 Makabe 12
12
Alkawal hakkunde Roma e Separta
1Nde Yonatan faami ko ɗon salo ɗon yahana mo, o suɓi wakiili'en, o neli ɓe haa Roma. Nelal maɓɓe ɗum tabitingo e hesɗitingo alkawal bee Roma'en. 2Ngam daliila maajum, o neli bataakeeji haa Separta e gure goɗɗe.
3Wakiili'en go ndilli haa Roma e ɓe ngiidoyi bee dawrooɓe Roma mawɓe. Ɓe mbi'i ɓe: “Limanjo mawɗo bi'eteeɗo Yonatan e jama'aare Yahuudu'en neli min ngam min kesɗitina alkawal ngal on kaɓɓidi bee maɓɓe.” 4Dawrooɓe go ndokki ɓe bataakeeji ngomna'en lesɗe ɗe ɓe caaloto fuu ngam ɓe ayna ɓe dow laawol kuucuki maɓɓe.
5Ndaa ko winnda nder bataakewol ngol Yonatan winndani Separta'en: 6“Limanjo mawɗo bi'eteeɗo Yonatan, dawrooɓe ndotti'en jama'aare, liman'en e Yahuudu'en fuu koofni deerɗum'en Separta'en. 7Neeɓi masin, mawɗo liman'en amin Oniyas, heɓno bataakewol laamiiɗo mon Areyos. O wi'no nder bataakewol man, on koociri min bana deerɗiraaɓe mon: Ko winnda nder bataakewol ngo'ol ɗon holla ɗum. 8Oniyas jaɓɓi nelaaɗo mon bee daraja, o jaŋngi ko winndi nder bataakewol man: Ɗum dari dow alkawal e soobaaku. 9Defte ceniiɗe ɗe min mari, kanje ngoni seeɓoore tiinaare amin, min ndoolataa ko'e amin haɓɓugo irin alkawe ɗe'e. 10Ammaa, min ɗon ngelo bee bataakewol ngo'ol, min kesɗitina alkawal deerɗiraagu e soobaaku men ngal min kaɓɓuno. Fakat min ngiɗaa min ngarta bana jananɓe haa mon, ngam duuɓi ɗuuɗɗi caali diga on nelani min nelaaɗo mon. 11Gal wakeere amin, min accaay siftorgo on to min ɗon lii'ana Allah kirseteeɗi malla to min ɗon toro mo yaake juulɗe amin. Ɗum foti e ɗum wooɗi siftorgo deerɗiraaɓe mum. 12Min ɗon ceyoro boo daliila nannanti mon. 13Minin kam, min ngiidi bee ɓillaaje e konuuji ɗuuɗɗi, ngam laamiiɓe heeddiɗɗiraaɓe amin kippi min. 14Min cali ɓillugo on malla ɓillugo wallooɓe e soobiraaɓe amin haa ɓe mballa min nder konuuji ɗi'i. 15Min ɗon tammori Allah bee walliinde mum: kaŋko senndiri min bee konne'en amin e o toski ɓe boo.
16Jonta kam, min cuɓi Numeniyus ɓii Antiyokus e Antipater ɓii Yason, min neli ɓe haa Roma'en ngam ɓe kesɗitina alkawal e soobaaku ngal min kaɓɓuno bee maɓɓe. 17Min umri boo wakiili'en amin njotto on ngam ɓe koofna on e ɓe ndokkita on bataakewol amin ƴamanŋgol on hesɗitingo soobiraaku men. 18Nden, on ceynan min boo, to on njaabake min dow haala ka'a.”
19Ndaa bataakewol neldanaaŋgol Oniyas ɓooyma: 20“Areyos, laamiiɗo Separta'en hoofni limanjo mawɗo bi'eteeɗo Oniyas. 21Min tawi bataakewol binndaaŋgol dow joonde Separta'en e Yahuudu'en, kollitaaŋgol ɓe deerɗiraaɓe. Le'i ɗi'i iwi haa Ibrahiima. 22Jonta kam, nde min paami nii ɗum wa'i, ɗum seynan min to on ndokki min habaruuji dow joonde mon jonta. 23Minin kam, min ɗon taaski haa min mbi'a: Ndaare dabbaaji amin e jawle amin bana to ɗum mooɗon, minin boo min ndaaran ɗum mooɗon bana ɗum amin. Min ɗon umra nelaaɓe amin ɓe maatina on nufayeeje amin.”
Yonatan farti sooje'en Demetiriyus
24Nde Yonatan nani habaru mawɓe ardiiɓe sooje'en Demetiriyus lorti hongo mo bee sooje'en ɗuuɗɓe ko ɓuri naane, 25o wurti Urusaliima ngam o fotta bee maɓɓe haa lesdi Hamat. O yiɗi haɗgo ɓe nastugo lesdi maako. 26O neli horooɓe nder saŋngeere maɓɓe. Ɓe ngarti, ɓe mbi'i mo: Konne'en ɗon taasko hippaago ɓe jemma. 27Diga mutki naaŋge, Yonatan umri sooje'en maako taa ɓe ɗaano, ɓe taaskano haɓre jemma man fuu e ɓe kuuwtinira balmi maɓɓe ngam haɓtaago. O jo'ini aynooɓe haa taarde saŋngeere maɓɓe fuu. 28Nde konne'en keɓi habaru no Yonatan e sooje'en mum ɗon taaskani haɓre, ɓe kultori, nde kultoreeŋgol man saati, ɓe kuɓɓi yiite nder saŋngeere maɓɓe e ɓe ndoggi. 29Yonatan e sooje'en mum paamaay ɗum, sey nde fajiri waɗi, ɓe paami ko waɗi, ngam ɓe ɗonno ngi'a yiite ɗonno huɓɓa nder saŋngeere konne'en maɓɓe. 30Yonatan tokki dogguɓe go, ammaa o jokkaaki ɓe ngam ɓe taƴti maayo Eleter.
31Nden Yonatan hippoyi lenyol Arab'en wi'eteeɓe Zabade'en. O jaali ɓe, o jaɓti jawle maɓɓe. 32Nden o ummi haa saŋngeere maako, o dilli haa Damas, o waanci lesdi maajum fuu. 33Simon, gal wakeere mum boo, ardini konu nder lesdi fuu haa o yotti Askalon e cuuɗi cemmbiɗɗi keedduɗi. Diga ton o dilli Jaffa, o jooɗi nder berniwol ngo'ol. 34O nanino boo yimɓe berniwol man ngiɗno hokkugo babal cemmbiɗŋgal nga'al haa sooje'en Demetiriyus. O jo'ini yimɓe aynooɓe haa babal ngal.
Yonatan semmbiɗini Urusaliima
35Nde Yonatan warti haa Urusaliima, o mooɓti hawtirde nde ndotti'en jama'aare. O anniyi bee maɓɓe nyiɓgo cuuɗi cemmbiɗɗi haa Yahudiya, 36ɓaŋgtugo mahi Urusaliima e darnugo mahol maŋngol hakkunde suudu semmbiɗndu bee berniwol ngam senndugo ɗum. O yiɗno sooje'en Demetiriyus njooɗo feere maɓɓe nder suudu semmbiɗndu, taa ɓe keɓa soodgo koo soorrugo koo ɗume. 37Yimɓe berniwol puɗɗi kuuɗe wo'itingo Urusaliima. Sey ɓe mbo'itina wakeere mahol gibbuŋgol gal wakeere yayre fuunaaŋge e hesɗitingo fattude wi'eteende Kafenata. 38Simon, gal wakeere mum, ɗon nyiɓto berniwol Adida haa lesdi leesndi. O semmbiɗini ngol, o semmbiɗini pareeje maago bee takkugo jamɗe.
Tirifon naŋngi Yonatan
39Tirifon tefi haa o laamo dow Siriya maŋngo e haa ɓe meeta mo bana laamiiɗo bee naŋngugo Antiyokus njoweegoojo. 40Ammaa o ɗon hula taa Yonatan haɗa anniya maako e o hona mo. O tefi dabare naŋngugo mo ngam o mbara mo, non o dilliri haa Bayti-Se'an. 41Yonatan dilli fotti bee maako bee yimɓe ujine cappanɗe nayo waawɓe konu. Kaŋko boo o yotti Bayti-Se'an. 42Nde Tirifon yi'i Yonatan wari bee sooje'en ɗuuɗɓe, o huuwtiniri semmbe ngam naŋngugo. 43O jaɓɓi mo bee daraja e o hokki mo caahuuji. O yottini mo haa sooba'en maako fuu, o umri ɓe boo bana o umri sooje'en maako, ɓe ɗowtano Yonatan bana to ɗum kaŋko. 44Nden o ƴami Yonatan: “Ko waɗi comnuɗa sooje'en ma fuu alhaali walaa boo konu hakkunde men? 45Wi' sooje'en ma ɓe kuuca, suɓ seɗɗa caka maɓɓe ɓe ɗofte e war bee am haa Potolemayis. Mi hokkete berniwol man e cuuɗi cemmbiɗɗi goɗɗi, bee mooɓe luttuɗe e bee akaawu'en wonɓe ton fuu. Daliila man waddi yam haa ɗo, ɓaawoɗon mi huucan.”
46Yonatan jaɓi haala Tirifon, o waɗi bana o wi'i mo, o lorni sooje'en maako, ɓe kuuci Yahudiya. 47O luttidi bee sooje'en ujine tato. Ɓaawoɗon, o ɗali sooje'en ujine ɗiɗo haa Galiili, ujineere tan ɗofti mo. 48Ammaa nde o nasti haa Potolemayis, yimɓe berniwol maɓɓi dammuɗe maagol. Ɓe naŋngi Yonatan e ɓe mbari nastuɓe bee maako fuu. 49Dow ɗon Tirifon neli mooɓe sooje'en yahooɓe bee kosɗe e wa'iiɓe pucci haa Galiili e nder yayre mawnde haa ɓe mbardoya sooje'en Yonatan. 50Yimɓe ɓe'e paami no limanjo mawɗo naŋngaama e mbaraama hawtaade bee ɗoftuɓe mo. Bee man fuu, ɓe cuusɗindiri caka maɓɓe, ɓe nyiɓɓini caffuuji maɓɓe, ɓe tiiti ɓe, ɓe ɗon ndeena konu. 51Nde taasnuɓe ngi'i ɓe kaɓan haa yotto maayde maɓɓe, ɓe cafti, ɓe lorti. 52Sooje'en Yahuudu'en fuu ngarti jam haa Yahudiya. Ɓe mboyi Yonatan e yimɓe mum, ɓe ɗonno nder mettamɓeram ɗuuɗɗam. Isra'iila fuu ɗonno nder suno maŋngo. 53Nden yimɓe heefeerɓe heedduɓe bee maɓɓe fuu tefi no ɓe cenndira bee maɓɓe. Ɓe ɗonno mbi'a: “Yahuudu'en ngalaa ardiiɗo, ɓe ngalaa boo balloowo. Kippooɗen ɓe, mbarden ɓe, taa goɗɗo meeta siftorgo ɓe.”
Currently Selected:
1 Makabe 12: FBDC
Highlight
Copy
Compare
Share
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.