Sirac 32
32
1Kun ika an napili na mamahala sa sarong bangkete, dai ka magpalangkaw; magin arog ka sana sa saimong mga kaibahan. Hilingon mo an pangangaipo kan mga bisita bago ka magtukaw. 2Kun matapos mo na an saimong katongdan, dangan ka magtukaw saka mag-ogma sa kaibahan kan mga bisita. Gagalangan ka ninda huli sa marahay mong gibo.
3Kun ika an pinakagurang sa gabos na bisita, pwede kang magtaram; deretso mo iyan. Alagad dapat aram mo an saimong itinataram asin dai mo naoolang an tugtog. 4Kun panahon na nin kaogmahan, ontokon mo na an pakipag-olay; bako iyan an tamang panahon na magpahiling ka kan saimong naaaraman. 5An tugtog sa sarong bangkete na may arak na ipinapainom nakakaagid sa sarong rubi na itinampok sa bulawan. 6Marahay na tugtog asin managom na arak—saro iyan na esmeralda na itinampok sa bulawan.
7Kun hoben ka pa, dai ka magtaram sagkod na kaipuhan, alagad dai magsobra sa duwang beses, asin kun hinapot ka sana. 8Ipahayag mo an boot mong sabihon sa dikit sanang mga tataramon. Ipahiling mong dakul kang naaaraman, alagad dai ka magin matinaram. 9Dai ka magpahiling na garo saro kang dakulang tawo sa kaibahan ninda asin dai ka magtaram kun igwa nin nagtataram. 10An dangog kan sarong tawong mapakumbaba naeenot sa saiya, siring na naeenot an kikilat sa daguldol.
11Maghale ka sa bangkete sa tamang panahon asin dai ka magpahuri. Dai ka na mag-abala sa may pintoan; magpuli ka na. 12Sa sadiri mong harong pwede kang mag-ogma siring sa saimong kamawotan, alagad dai ka magkasala nin paghahambog. 13Dai mo man paglingawan na magpasalamat sa saimong Kaglalang huli sa pagtugot niyang mag-ogma ka huli sa dakul na marahay na bagay.
An Pagpaliwanag kan Katogonan
14Kun may pagkatakot ka sa Kagurangnan, aakoon mo an saiyang pagdisiplina. Bebendisyonan niya an mga tawong amay na nagbabangon tanganing mamibi. 15Adalan mo an saiyang Katogonan, asin manonodan mo iyan; alagad kun bakong tudok sa puso an pag-adal mo kaiyan, dai mo iyan manonodan. 16Kun may pagkatakot ka sa Kagurangnan, maaaraman mo kun arin an tama, asin mababantog ka huli sa mga tamang hatol. 17Hahaboan nin mga parakasala an pagsagwe, asin an Katogonan ipapaliwanag ninda sosog sa ikakarahay ninda.
18An mga tawong igwa nin pag-isip magpapahalaga sa lambang kaisipan, alagad hahaleon kan mga mapalangkaw an anoman na makakaolang sainda. 19Dai ka maggibo nin anoman sagkod na dai mo pa iyan inisip; kun may nagibo ka na, dai ka na magbasol. 20Dai ka maglakaw sa dalan na pano nin pag-alaman, asin dai mo paggibohon an parehong sala nin makaduwang beses.#32:20 Sa Hebreyo paggibohon…beses; sa Griyego dai mo pagdasmagan an kagapoan. 21Dai ka masyadong magsarig sa saimong sadiri, maski na garo pasil an saimong aagihan. 22Danay mong pagmaanan an saimong pinaglalakawan.#32:22 Sa Hebreyo pagmaanan an…pinaglalakawan; sa Griyego pag-atamanon an saimong kaakian. 23Magin maingat#32:23 Sa Hebreyo Magin maingat; sa Griyego Magkaigwa ka nin pagsarig sa saimo man sana. ka sa anoman na saimong ginigibo; pag-otob iyan sa mga pagboot nin Kagurangnan.
24An pagtubod sa Katogonan nangangahulogan nin pagsunod sa mga kabotan nin Kagurangnan.
Kun may pagsarig ka sa Kagurangnan, dai ka madadaog.
Currently Selected:
Sirac 32: MBBBIK92
Highlight
Share
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.