2 MACCABEO 15
15
An Maraot na Plano ni Nicanor
1Naaraman ni Nicanor na yaon sa rehiyon nin Samaria si Judas saka an saiyang mga tawohan. Kaya nagplano siya na salakayon sinda sa aldaw nin Sabbath tanganing ligtas siya sa anoman na pag-alaman. 2An mga Judio na pinirit na mag-iba sa saiyang hukbo, nakimaherak saiya na dai maggibo kan maraot saka maringis na bagay na idto kundi galangan an aldaw na inomaw saka pinabanal nin orog sa gabos na aldaw kan Dios na nakakahiling kan gabos. 3Si Nicanor na pinakahababang klase nin linalang sa daga, naghapot sainda kun igwa nin pinakadakulang pamayo sa langit na nagboot sainda na omawon an Sabbath. 4Nagsimbag an mga Judio, “Igwa, an Kagurangnan na buhay, na namamahala sa langit, iyo an nagboot samo na omawon an Sabbath.”
5Alagad nagsimbag si Nicanor, “Ako an pamayo sa daga, asin nagboboot ako saindo na kuahon nindo an saindong mga armas saka gibohon nindo an ipinagboboot kan hade.” Alagad mayo nin nangyari sa maraot niyang plano.
Inandam ni Judas an Saiyang Hukbo para sa Gera
6Sa kapaabaw-abawan ni Nicanor naghambog siya na patitindogon niya an sarong monumento bilang pag-omaw sa magigin kapangganahan niya laban ki Judas asin sa mga tawohan kaini. 7Alagad bilog an pagsarig ni Judas na tatabangan siya kan Kagurangnan. 8Kaya sinadol niya an saiyang mga tawohan na dai matakot sa mga kaiwal, kundi giromdomon an tabang na itinao sainda nin Kagurangnan kan nakaaging mga panahon, asin manarig na itatao giraray sainda ngunyan kan Makakamhan an kapangganahan. 9Pinakosog niya an saindang boot sa paagi nin pagbasa sainda hale sa Katogonan asin sa Mga Propeta patin pagpagiromdom sainda kan mga kapangganahan na nakamit ninda sa gera. 10Kan andam na sa pakigera an saiyang mga tawohan, itinao niya sainda an saiyang pagboot, siring man an pagiromdom na dai magtiwala sa mga pagano huli ta sinda dai nagkukuyog sa mga tipan. 11Tinawan niya nin armas an saiyang mga tawohan bakong sa paagi nin pagsadol sainda na manarig sa mga kalasag saka mga garod, kundi sa paagi nin pagtao sainda nin mga tataramon na nagpakosog kan saindang boot. Pinakosog niyang orog an saindang boot kan isaysay niya sainda an saiyang pangatorogan na sarong klase nin bisyon na pwede nindang pagsarigan.
12Tinaraman niya sinda na nahiling niya sa sarong bisyon si Onias, an dating Halangkaw na Padi saka sarong tawong dakula saka makangangalas, mapakumbaba, maboot, matibay magtaram, asin poon pa sa pagkaaki tinukdoan na kun paano mamuhay kan tamang gawe. Nakaitaas an mga kamot ni Onias mantang namimibi para sa bilog na nasyon kan mga Judio. 13Dangan nahiling man ni Judas an sarong tawo na maputi na an buhok, asin nasa lalawogon niya an dakulang dignidad patin awtoridad. 14Nagsabi si Onias: “Iyo ini si Jeremias an propeta nin Dios na namomoot sa kapwa niya Judio saka nagdodolot nin dakul na pamibi para sato patin para sa Jerusalem, an banal na syudad.”
15Inunat ni Jeremias an too niyang kamot saka itinao ki Judas an sarong espadang bulawan. Mantang itinatao niya an espada, nagsabi siya: 16“Kuahon mo an banal na espadang ini, na regalo nin Dios. Gamiton mo ini sa paglaglag kan saimong mga kaiwal.”
17Kuminusog an boot kan lambang saro huli kan marahay na mga tataramon ni Judas, kaya maski an mga hoben na lalaki nadagkang makilaban. Huli ta nasa pag-alaman an saindang syudad, relihiyon asin Templo, nagdesider an mga Judio na dai na magsayang nin oras, kundi maisog nang sumalakay saka aramon an saindang palad sa paagi nin mano-manong pakilaban. 18Nangongorog an saindang pagmakulog sa sagrado nindang Templo; ikaduwa sana sa saindang boot an manongod sa kamugtakan kan sadiri nindang pamilya saka mga kadugo. 19An mga tawong nawalat sa Jerusalem gabos naghadit manongod sa magigin kataposan kan gera sa kahiwasan.
An Pagkadaog saka Pagkagadan ni Nicanor
20An lambang saro naghahalat na maaraman an manggagana sa gera. Naghaharani na an mga hukbo kan kaiwal, kaiba an saindang mga elepante na ibinugtak ninda sa mahahalagang lugar saka an saindang mga nakakabayong soldados na nakalinya sa mag-ibong na parte ninda. 21Tinanaw ni Judas Maccabeo an dakulang hukbo kan mga kaiwal, an manlaen-laen nindang armas, patin an mababangis nindang elepante. Dangan initaas niya an saiyang mga kamot saka namibi sa Kagurangnan na naggigibo nin mga ngangalasan. Aram niya na an kapangganahan itinatao kan Kagurangnan sa mga tawong maninigo kaiyan bakong sa mga tawo na igwa nin makosog na hukbo. 22Nagsabi si Judas: “O Kagurangnan, kan panahon ni Hadeng Ezekias nin Juda, sinugo mo an saimong anghel, asin ginadan niya an syento otsenta y singko mil sa mga tawohan ni Hadeng Senakerib. 23Magsugo ka giraray ngunyan, O Kagurangnan nin kalangitan, nin marahay na anghel tanganing magtakig saka magkubogkubog sa takot an mga kaiwal. 24Huli kan dakula mong kapangyarihan, mapuho logod an mga paralanghad na iyan na nagdadangadang sa pagsalakay sa pinili mong banwaan.” Tinapos niya an saiyang pamibi sa mga tataramon na iyan.
25Sa tanog kan mga trompeta saka mga awit na panggera, nagpadagos sa pagharani si Nicanor asin an saiyang hukbo, 26alagad nakigera sainda si Judas patin an mga tawohan kaini na nag-aapod sa Dios para tabangan sinda. 27Ginamit ninda an saindang mga kamot sa pakilaban mantang sa puso namimibi sinda sa Dios, kaya nakagadan sinda nin treynta y singko mil na mga kaiwal. Dakula nin marahay an saindang pasalamat sa tabang na inako ninda hale sa Dios. 28Kan natapos na an gera dangan papuli na sinda na nagseselebrar kan kapangganahan ninda, nahiling ninda an bangkay ni Nicanor na nakasulot pa kan saiyang gubing na panggera. 29Dangan sa makosog na kinurahaw inomaw ninda an Kagurangnan sa sadiri nindang lengwahe.
30Nagboot si Judas, an lalaking sa hawak asin kalag danay na nagsurog kan kapwa niya Judio magpoon kan hoben pa siya, na putolon an payo saka toong kamot ni Nicanor tanganing darahon sa Jerusalem. 31Pag-abot sa syudad, tinipon ni Judas an gabos na Israelita, nagbugtak nin mga padi sa atubangan kan altar, dangan ipinaapod an mga tawohan na nasa bantayan. 32Ipinahiling niya sainda an payo kan maraot na tawong si Nicanor saka an kamot kaini na mapaabaw-abaw na initaas laban sa sagradong Templo kan Makakamhan na Dios. 33An dila kan bakong diosnon na si Nicanor pinutol ni Judas na nanunugang dikit-dikit na ipapakakan idto sa mga gamgam saka ibibitay sa atubangan kan Templo an payo ni Nicanor, bilang katibayan kan ginibo niyang kalolongan. 34An lambang saro duman nagtingkalag sa langit saka nag-omaw sa Kagurangnan, na nagpahiling kan saiyang kapangyarihan patin nag-ingat kan Templo tanganing dai ini madigtaan. 35Binitay ni Judas an payo ni Nicanor sa kudal kan bantayan, bilang malinaw na katibayan sa lambang saro kan tabang na itinao nin Kagurangnan. 36Nagkasararo sinda na an aldaw na ini dai nanggad ninda lilingawan, kundi seselebraron ninda taon-taon sa bisperas kan Aldaw ni Mardokeo,#36 ALDAW NI MARDOKEO: An Pyesta nin Purim (hilingon an Est. 9:17-22). na iyo an ikatreseng aldaw kan ikadoseng bulan, na inapod na bulan nin Adar sa lengwaheng Arameo.
Kataposan na mga Tataramon
37Nagtapos sa siring na paagi an buhay ni Nicanor. Magpoon kaidto nagdanay sa kamot kan mga Judio an syudad nin Jerusalem. Kaya digdi ko tataposon an sakong istorya. 38Kun marahay an pakasurat ko kaiyan saka madaling masabotan, naoogma ako; kun maraot an pakasurat saka mayo nin buhay, ginibo ko na an gabos kong makakaya. 39Naaaraman ta na bakong marahay na mag-inom kan purong arak o tubig sana, alagad managom saka makawiwiling inomon an pinaghalong arak saka tubig. Siring man, an sarong istorya na marahay an pakasurat minatao nin kaogmahan sa nagbabasa kaiyan. Digdi ko tinatapos an istoryang ini.
Currently Selected:
2 MACCABEO 15: BPV
Highlight
Share
Copy
Want to have your highlights saved across all your devices? Sign up or sign in
Philippine Bible Society, New Testament © 1981, Bible © 1992