Filimoni 1
1
1Ndime Paulu uli muntolongo ukaambo kakusebezela Kilisito Jeso, tuli antoomwi u Timoti mukwesu. Twakulembela mukwesu Filimoni uwe umufwunwa ulimwi musebezhi nokwesu, 2#Bako 4:17u mukwesu Afiya u Akipasi shikalumamba nokwesu mwa Kilisito antoomwi imbungano iswaangana muŋanda yako. 3Leza Taata u Jeso Kilisito Mwami wesu bamufwile luse u kumupa luumuno.
Makani a Lufwuno u Lushomo lwaka Filimoni
4Ndamulumba Leza wangu ciindi coonse niinkutelaika mu kukomba kwangu, 5nkaambo nditeelele ati ulashoma Mwami Jeso ulimwi ulifwini bantu baleza boonse. 6Ndalomba ati ulyaabe mukwaabanya lushomo lwako, kwaamba ukashizhibishe shibotu shoonse nshitukwete mu lukamantano u Kilisito. 7Lufwuno lwako mukwesu lwampa lutangalo ulimwi lwanzumya zumya cini cini kaambo weebukulusha myonzo ya bantu baleza.
Paulu Walombela Onesimasi
8Nikuba bobo ndikwete insana sha kukulailila nshuuyelele kucita mwa Kilisito. 9Pele ukaambo kalufwuno, ndakulomba ume ndi Paulu nikuba kuti ndacembala, ulimwi ucaninzho ndyaanjilwe ukaambo kakusebezela Kilisito Jeso. 10#Bako 4:9Ubobo ndakulomba kuzhiminina Onesimasi wezo wakaba mwanangu mwa Kilisito ciindi indaakuli muntolongo. 11Ku ciindi cakaita kaina mulimo kwako, pele ninzho ulakonzha kutuyohwa uswe toonse tobile. 12Inzho nguwezo ndamupilusha kwako ukoya ndatumya monzo wangu woonse. 13Ndaakuzanda ati a kucishite kono kwaamba anjohwe mulimo mu busena bwako ciindi nincili muntolongo ukaambo ka kukambauka Makani Mabotu. 14Nikuba bobo nshizanda kukushinicizha kwaamba unjohwe, pele ndazanda ati ulihuminine umukamwini.
15Ambweni ncimwakaandaanina u Onesimasi kwa ciindi cishoonto, kwaamba apiluka mukakale antoomwi shikwense. 16Inzho atabi ukoya muzhice bulyo, pele mucite ukoya munyoko nakufwunwa mulukamantano u Kilisito. Ume ndimufwini aze ulyeelele kumufwunisha nkaambo muntu noko ulimwi mushomi noko. 17Na ulinzhi ati ume ndi musebezhi noko, umutambule ukoya mbuukonzha kuntambula ame. 18Na kuli cibiyabi ncaakakucitila, nicikaba cikwelete, wezo mulandu noobe wangu. 19Ume ndimwini ndi Paulu ndalemba luŋwalu lolu iitashi lyangu kwaamba ati ndakakuliya mali. Utaluba ati inzho ndikwete cikwelete kwako, pele cikwelete cako kwangu cilabaala nkaambo mbumi bwako boonse. 20Ee mukwesu, ndalomba unjohwe ukaambo ka Mwami. Nkalika monzo ukoya munyoko mwa Kilisito. 21Nkaambo ndikwizhi mbuubele, nshizuluzha mukulemba kwangu, ndizhi kwaamba ulakacicita ncindakulomba ukwiitilizha. 22Cimwi cintu nciŋamba ncakuti umambile busena bwakoona, kaambo ndashoma ati kwiita mu kukomba kwenu, Leza ulakandeta koko.
Kwaanzha kwa Mamanino
23 #
Bako 1:7; 4:12 Epafulasi ngutwaanjilwe aze muntolongo ukaambo ka kukambauka Makani Mabotu aka Kilisito Jeso, wamwaanzha. 24#Inc 12:12, 25; 13:13; 15:37-39; Bako 4:10; Inc 19:29; 27:2; Bako 4:10; Bako 4:14; 2 Tim 4:10; Bako 4:14; 2 Tim 4:11U Maako musebezhima, kubicilizha uba Alisityakosi u Dimasi u Luka abo bamwaanzha. 25Inzho luse lwa Mwami Jeso Kilisito alube amwe noonse.
Currently Selected:
Filimoni 1: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.