Johani 18
18
Jeso Waabwa u Kukwatwa
(Matayo 26:47-56; Maako 14:43-50; Luka 22:47-53)
1Naakamana kwaamba aza makani, Jeso wakaya u ba shiciiya bakwe mwitala lya kakonka ka Kidiloni. Koko kubusena kakuli muunda wa masamu a Oliva, koko Jeso u ba shiciiya bakwe bakenjila mu muunda wezo. 2Inzho aze Judasi shikumwaaba kabwizhi bobo busena nkaambo shiindi shinji shinji Jeso nkwaakufwini kubunganina u ba shiciiya bakwe. 3Inzho Judasi wakashika kubusena bobo iinkamu ya bashikalumamba ubakando ba ŋanda ya Leza, bakatumwa ku bapaizhi bakando u ba Falisi, bakeza balikwete malambe, u mizenge u shilwisho. 4Inzho Jeso mbwaakaakucizhi cakaakweelele kumucitikila, wakaya kubabuzha ati, “Anu nguni ngumukapula?” 5Bakaingula ati, “Tulazanda Jeso waku Nanzaleta.” Wakabaambila ati, “Ndime.” Aze Judasi wezo wakamwaaba kazhimine abo. 6Jeso nakabaambila ati, “Ndime” bakasesuluka bamane bawa anshi. 7Jeso wakababuzha lwabili ati, “Anu nguni ngumukapula?” Bakaingula ulimwi ati, “Ngu Jeso waku Nanzaleta.”
8Jeso wakabaambila ati, “Ndamushimwina kale ati ‘Ndime.’ Inzho naa ndime mukapula Amubaleke baba mbutulyaabo baye.” 9Koku kakuli kuzuzucizha Malembe aamba ati, “Kwiina naaba womwi wa babo mbuwakampa ngundakasowekelwa.”
10Inzho Saimoni Pita mbwaakaakukwete iceba, wakalikusha munkomo wakosola kutwi kwa cilyo kwa muzhice wa mupaizhi mukando. Wezo muzhice izhina lyakwe kali Malikasi. 11#Mat 26:39; Mk 14:36; Lk 22:42Jeso wakamwaambila Pita ati, “Libweezhe iceba lyako munkomo yalyo, sa ulatelaika ati nsheelele kunwina munkapu yezhi yamapenzhi njaampa Taata?”
Jeso Wabetekwa kwa Anasi
12Ubobo bashikalumamba u mukando wabo ulimwi ubasebezhi baba Juda bakamukwata Jeso u kumwaanga. 13Bakataanguna kumutola kwa Anasi mukwe wakwe Kayafa wakaakuli ngu mupaizhi mukando mu mwaka wezo. 14#Joh 11:49, 50Kayafa inguwe wakabaambila ba Juda ati cilyeelele kwaamba womwi muntu afwile buleya.
Saimoni Pita Wamutama Jeso
(Matayo 26:69-70; Maako 14:66-68; Luka 22:55-57)
15Inzho Saimoni Pita u shiciiya umwi bakamucilila Jeso. Wezo shiciiya umwi wakenjila antoomwi u Jeso mulubanza lwa ŋanda ya mupaizhi mukando nkaambo kabazhibene aze. 16Pele Saimoni Pita wakashaala ansengwe ulizhimine kufwaafwi ku mulyango. Inzho shiciiya wezo umwi wakaakuzhibilwe ku mukando wa bapaizhi wakapiluka ansengwe, wamwaambila mukaintu wakaakulinda amulyango amane wakamunjizha Pita mukati. 17Mukaintu wakaakuli amulyango wakabuzha Pita ati, “Sa uwe tuli umwi wa bashiciiya ba muntu wezu?”
Pita wakamwiingula ati, “Pe pe.”
18Inzho bazhice ubasebezhi ba ŋanda ya Leza bakakunka mulilo kwaamba bazote kaambo kakuli impeyo. Aze Pita kazhimine abo kumulilo ulazota.
Jeso Wabuzhiwa kwa Anasi
(Matayo 26:59-66; Maako 14:55-64; Luka 22:66-71)
19Inzho mupaizhi mukando wakabuzha Jeso shabashiciiya bakwe ulimwi injiisho shakwe. 20Jeso wakamwiingula ati, “Ndakaakuyiisha bantu baanshi kaanzambwene, ulimwi coonse ciindi ndakaakuyiisha mu shikombelo shaba Juda u muŋanda ya Leza, momo bantu boonse mubabungana. Kwiina ncindakaseseka mu kuyiisha kwangu. 21No kaambonzhi ncimumbuzhizha? Amubabuzhe bantu bakanteelela kaambo balizhi shindakaakwaamba.”
22Jeso nakaamba bobo, umwi wa balindizhi wakaakuzhimine afwaafwi wakamuuma lukumbazhi Jeso lwamenso wamubuzha ati, “Sa mbumwiingula mupaizhi mukando bobo?” 23Jeso wakamwaambila ati, “Na ndabisha, nshimwina cibiyabi ncindaamba. Pele aakuli ndaamba ciluleme, no ncinzhi nciwangumina?”
24Inzho Anasi wakamutuma Jeso kwa Kayafa mupaizhi mukando, Jeso wakaya mwaange.
Saimoni Pita Wamutama Jeso Ulimwi
(Matayo 26:71-75; Maako 14:69-72; Luka 22:58-62)
25Saimoni Pita kazhimine kumulilo ulazota, bakamubuzha ati, “Sa uwe tuli umwi wa bashiciiya ba muntu wezu?” Pele Saimoni wakakaka waamba ati, “Pe pe nshili!” 26Umwi muzhice wa mupaizhi mukando, musazhiina u muntu ngwakakosola kutwi Pita, wakamubuzha ati “Sa uwe indiwe ndabona ku muunda kolya bwasunu muli antoomwi umuntu welya?” 27Ulimwi Pita wakakaka. Ngoonaawo mukombwe wakalila.
Jeso Wabetekwa kwa Pilato
(Matayo 27:1, 2, 11-14; Maako 15:1-5; Luka 23:1-5)
28Kuhwa kwa Kayafa, Jeso bakamutola ku cibetekelo. Kacili ciindi ca cifwumo fwumo, balukando kando baba Juda bayina nibakenjila mwibetekelo nkaambo kabatiya kwaamba ati balasofwaala banjila. Nkaambo kabazanda kulya Ipobwe lya Kwiitilila. 29Ngoonaawo Pilato wakahwa ansengwe wababuzha ati, “No mulandunzhi ngumumupa muntu wezu?” 30Bakamwiingula ati, “Muntu wezu nataakuli shishibi, nitwaatamuleta kwako.” 31Pilato wakabaambila ati, “Noomutole mukamubeteke nubeni kwiingaina u milawo yenu.” Ba Juda bakaingula ati, “Tatuhumizhiwa kukosola mulandu walufwu lwa muntu.” 32#Joh 3:14; 12:32Sheshi shakacitika kwaamba mazwi ngakaamba Jeso a lufwu lwakwe mbwakaafwa azuzucizhiwe. 33Pilato wakanjila ulimwi mwibetekelo, weta Jeso amane wakamubuzha ati, “Sa uli Mwami waba Juda?” 34Jeso wakamwiingula ati, “Sa ulaamba makani aza kuhwa ku monzo wako, na kuli bakushimwina makani angu?” 35Pilato wakaamba ati, “Sa ume ndi mu Juda?” Bashicishinoko u bapaizhi mbubakwaaba kwangu, No wacitaanzhi? 36Jeso wakamwiingula ati, “Bwami bwangu tabuli bwa anshi ano. Kuti bwami bwangu nibwakuli bwa anshi, batwanga bangu nibalwa kwaamba intabwa kubakando baba Juda. Pele Ume bwami bwangu tabuli bwa anshi ano pe.” 37Ngoonaawo Pilato wakaamba ati, “Eena anu uli mwami?” Jeso wakamwiingula ati, “Waamba kabotu kwaamba ati, ndi mwami. Incico ncindakazhalilwa, ulimwi ncindakezhila, kwaamba ati nkape bumboni bwa lushinizho, ubobo kufwumbwa muntu uuzhi lushinizho ulanteelela.” 38Pilato wakabuzha ati, “No lushinizho caambaanzhi?”
Jeso Wakosolelwa Kufwa
(Matayo 27:15-31; Maako 15:6-20; Luka 23:13-25)
Nakamana kwaamba bobo, wakahwa ansengwe ulimwi kuya kushimwina bakando baba Juda ati “Wezu muntu wiina mulandu. 39Pele mulikwete kanshiya nshiya kakumwangululila mwaange omwi ciindi ce Pobwe lya Kwiitilila. Sa mulazanda ati mwaangululile Mwami waba Juda?” 40Bantu bakapozomoka ati, “Pe pe! Twaangululile Balabasi, kutali muntu wezu pe!” Inzho wezo Balabasi kali mutewu.
Currently Selected:
Johani 18: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.