Johani 16
16
Bana Kilisito Balakapenzhewa
1Ndamushimwina aza oonse kwaamba mutaleka kushoma. 2Balakamutanda mu shikombelo shaba Juda. Ulimwi cilakashika ciindi lelyo bantu nibakaamuyaya, bakaakuzunga ati balacita mulimo mubotu kwa Leza. 3Balakashicita bobo nkaambo tabamwizhi Taata ame tabenzhi. 4Pele ndamushimwina aza kwaamba cakashika ciindi cakucita sheshi shintu, mukazhibaluke ati ndakaakumushimwinine kale.
“Ndiina ukamushimwina sheshi shintu ku makancilo nkaambo ndakaakuli amwe.”
Mulimo wa Moza Usalala
5Pele inzho ndapiluka kuli wezo wakantuma, pele kwiina uumbuzha nkwinja. 6Inzho bolya mundamushimwina, mwakwata mapenzhi mu myonzo. 7Pele nikuba bobo ndamushimwina meni meni, ncibotu kulyuumwe kwaamba nje. Nkaambo kuti nshiciti bobo, Muyohwi takazhiza kwenu pe. Pele kuti ndaya ndakamutumina Muyohwi. 8Inzho akashika ulakabazula baanshi kwaamba balikwete mulandu ku makani a cibi, ukumakani a bululami ukumakani a lubeta. 9Balikwete cibi nkaambo kakuti tabanshomi. 10Ku makani abululami balikwete mulandu nkaambo kakuti ndabweela kwa Taata, ubobo tabacimboni linji pe. 11Ku makani a lubeta, balikwete mulandu nkaambo muleli wanshi ano wabetekwa kale.
12“Ndikwete mazwi manji manji aakumwaambila pele tamukonzha kwaateelelesha ninzho. 13Pele akashika Moza walushinizho, ulakamusololela u makani meni meni oonse. Nkaambo takaamba shakwe mwini, pele ulakapandulula shesho shoonse nshaakateelela kwa Taata, ubobo ulakamushimwina shintu shiciza. 14Ulakandetela bulemu nkaambo ulakatola nshiŋamba ukumupandululila. 15Shoonse shaka Taata shangu. Nciceco ncindaambila ati, ulakashitola nshiŋamba ukumupandululila.”
Kuusa u Kubotelwa
16“Kwaita ciindi cishoonto tamukamboni, ulimwi kwaita ciindi cishoonto mulakambona.”
17Inzho bamwi ba shiciiya bakakanka kubuzhanya mulwabo ati, “Anu makaninzhi aza ngaamba ati, ‘Kwaita ciindi cishoonto tamukamboni, pele ulimwi kwaita ciindi cishoonto mulakambona,’ ‘Nkaambo ndaya kwa Taata?’” 18Bakaamba ati, “Anu kwaita ciindi cishoonto cilaambaanzhi? Tatucizhi ceco ncaamba!”
19Jeso wakazhiba ati balazanda kumubuzha, ubobo wakababuzha ati, “Sa mulabuzhanya celya ncindaamba ati, ‘Kwaita ciindi cishoonto tamukamboni, ulimwi kwaita ciindi cishoonto mulakambona?’ 20Cini cini ndamushimwina ati, mulakalila u koomoka, pele baanshi balakasekelela. Mulakalyeetezha, pele kuusa kwenu kulakasanduka kuba lutangalo. 21Ciindi mukaintu naali mu mishika yakutumbuka ulalyeetezha cini cini u monzo nkaambo ciindi cakupenga cashika. Pele amana kutumbuka ulaaluba mapenzhi, ukaambo kakubotelwa ati mwana watumbukwa ano anshi. 22Umbona bobo mbucibele kulyuume, inzho mulyuusile pele ndakeza kumubona ulimwi, myonzo yenu ilakezula lutangalo lwiina ukaamunanga linji.
23“Kubuzuba bobo kwiina ncimukaabuzha. Ulimwi ndamushimwina ati, Taata ulakamupa kufwumbwa ncimukaalomba mwizhina lyangu. 24Kushikila uceno ciindi tamunalombele cintu mwizhina lyangu. Amulombe, mulatambula kwaamba mutangale cini cini.”
Jeso Weekoma Inshi
25“Lyoonse ndamwambila mushikozhano kumushimwina sheshi shintu. Pele ciindi cilakashika nintakaamwaambila linji mushikozhano, pele ndakamupandululila shoonse shintu shaka Taata. 26Mu buzuba bobo mulakamulomba Taata mwizhina lyangu. Nshaamba ati ndakamukombela kwa Taata, 27nkaambo Taata ulimufwini. Nciceco amwe ncimwakamfwunina u kushoma ati ndakahwa kwa Taata. 28Ume ndakahwa kwa Taata kwiza ano anshi, ulimwi inzho ndeshiya inshi ndaya kwa Taata.”
29Ba shiciiya bakwe bakaamba ati, “Ee cini cini ninzho waamba cakaanzambwene, twaambila mutushimpi! 30Inzho twazhiba ati ulishizhi shoonse shintu, ubobo kwiina ukakubuzha cintu, inzho ukaambo ka makani aza twashoma kwaamba wakahwa kwa Leza.”
31Jeso wakabaingula ati, “Sa ninzho mwashoma? 32Ciindi cilashika, pele cashika kale cakuti mumwaale kuya mwenu mwenu, mukanshiye ice. Pele nikuboobo nshikaakuli ice nkaambo Taata uli ame. 33Ndamushimwina makani aza kwaamba muyane luumuno muukunshoma. Ano anshi umwe muli u mapenzhi makando, pele nikuba bobo ndabuzunda bubiyabi bwa anshi.”
Currently Selected:
Johani 16: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.