Bakolose 1
1
1Ume ndi Paulu wakasalwa u Leza kwaamba mbe mutumwa wa Kilisito Jesu u mukwesu Timoti, 2Twamulembela nu bantu ba Leza mu Kolose, bakwesu mu lukamantano u Kilisito, akube luse u luumuno luhwa kwa Leza Tatesu.
Kukomba kwa Kulumba
3Lyoonse nitumukombela tulapa kulumba kwa Leza ushi Mwami wesu Jeso Kilisito, 4nkaambo twakaluteelela lushomo lwenu mwa Kilisito Jeso umbumufwini bantu boonse ba Leza. 5Lushomo lwenu u lufwuno shili zhimine abulanjizhi mbumubambililwe kwizeulu. Ciindi nimwakateelela Makani Mabotu a lushinizho. 6Makani Mabotu akeza kwenu ulimwi alaya bweezha micelo u kuya buteelelwa inshi yoonse, ubobo aciya bweezha kuhwa ku buzuba mbumwakateelela u kuzhiba luse lwa Leza. 7#Bako 4:12; Fili 1:23Mwakaayiya aza makani a luse lwa Leza kwa Epafulasi musebezhi nokwesu walo uli ngu musebezhi mushomeshi ulimwi mufwunwa wa Kilisito utuzhiminina. 8Wakatushimwina alufwuno ndumwakayana ku Moza wa Leza.
9Ukaambo kaaza makani tulamukombela lyoonse kuhwa nitwakamuteelela mbumupona. Tulapumpa kwa Leza kwaamba amupe luzhibo luzwile lwa luzando lwakwe u busongo u kuteelela kuhwa ku Moza Usalala. 10Tulakomba kwaamba mupone bumi mbwaazanda Mwami, bumubotela munzhila shoonse. Mulyeelele kucita milimo yoonse mibotu kwaamba mukomene mu luzhibo lwa Leza. 11Amuzume kunsana nshimupewa kuhwa ku bulemu bwa Leza, ulimwi amulibambile kuba ba shicamba cilemu, mutaciti cinuku mu shintu shoonse, pele calutangalo. 12Noomulumbe Leza Taata walo wakamupa kwaamba ati muyane ceelelo cakukona lukono lwa bantu ba Leza mu bwami bwa mumuni. 13Nkaambo wakatupatulula munsana shamushinzhe ukutuleta mu bwami bwa Mwanakwe nakufwunwa. 14#Baefe 1:7Kwiita mwakwe tulayana lufwutuko u kulecelelwa shibi.
Jeso Ulabaala ali Shoonse
15Kilisito ncinkozha ca Leza utabonwa. Ngu Mwana wa kuzhala mutaanzhi, mukando ku shilenje shoonse. 16Nkaambo kwiita mwakwe, Leza wakalenga shoonse shintu shili anshi u kwizeulu, u shibonwa u shitabonwa, bwami u bulelo, bami u baleli u beendelezhi. Leza wakalenga shoonse shintu kwiita mwakwe, ulimwi ngwaakalengela. 17Kilisito kaliko kale kashitana kuba shoonse shintu, mwakwe shoonse shintu shakayana masena ayelele. 18#Baefe 1:22, 23Kilisito ngu mutwi wa mubili, wezo mubili ncikombelo, ngu makancilo. Ngu mwanakwe mutaanzhi wakabushiwa ku bafwu kwaamba ayane busena butaanzhi ku shintu shoonse. 19Cakamubotela Leza kwaamba bu Leza bwakwe boonse bube mwa Kilisito. 20#Baefe 2:16Kwiita u Mwanakwe Leza wakayanzana u shintu shoonse mbushibelele nishiba sha anshi na sha mwizeulu, ciindi naakaleta luumuno kwiita mubulowa bwa Mwanakwe aciciinkano, ubobo wakashiyanzanya kwakwe shoonse shintu shili anshi u kwizeulu.
21Kale kale mwakaakusakene kwa Leza ulimwi mwakaakuli ba shinkondonina u Leza ukaambo ka shintu shibiyabi nshimwakaakucita u kutelaika. 22Pele inzho ukaambo kalufwu lwa mubili wa Mwanakwe, mwaba balongwaakwe Leza kwaamba amulete kwakwe mu bululami busalala, ulimwi bwiina kampenda. 23Mulyeelele kukwatisha cini cini ku lushomo, cakutazungaana mu bulanjizhi bwenu mbumwaka shomezhewa bwa Makani Mabotu ngumwakateelela, azo a kakambaukwa ku shilenje shoonse sha anshi ano. Kaka nkukaambo ume ndi Paulu ncindakabela mutwanga wa Makani Mabotu.
Paulu Wasebezela Imbungano
24Inzho ndibotelelwe ku makani akumupenjela mu mubili wangu, nkaambo kwiita mu kumupengela koku, ndaazulizha mapenzhi aka Kilisito acisheele kuzhiminina mubili wakwe wa cikombelo. 25Leza wakancita butwanga ku cikombelo cakwe, ndakapewa mulimo wa kumusebezela. Ndikwete mulimo wa kwaamba izwi lya Leza lizhibwe buzulile, 26ali ngumasesece ngaakaseseka Leza kumazhalane oonse a kale kale. Inzho Leza waazubulula ku bantu bakwe. 27Leza wakasala kubazubulwila bantu bakunze, maseseke mabotu a bulemu ku bantu boonse. Maseseke ngakuti Kilisito uli mwako, calo caamba bulanjizhi bwa bulemu. 28Ubobo tulakambauka Kilisito ku bantu boonse. Kwiita mu busongo mbutwakapewa tulacenjezha u kuyiisha bantu boonse kwaamba balondoce mu lukamantano u Kilisito. 29Ndasebeza cakulipenzha, kwiita mu nsana inkando nshaapa Kilisito nshinkwete ulimwi shisebeza muli ume.
Currently Selected:
Bakolose 1: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.