YouVersion Logo
Search Icon

Incito 1

1
1 # Lk 1:1-4 Teyofilasi, mwibuka lyangu lya kutaanguna ndakakulembela makani aka Jeso u shintu nshaakacita shoonse u kuyiisha kuhwa ku makancilo, 2mpaka kushicila ciindi naakatolwa kwizeulu. Pele katana kutolwa kwizeulu, wakapa malailile kwiita mu Moza Usalala ku batumwa bakwe mbaakasala. 3Amane kufwa u kubuka, wakalitondezha nkubabele munzhila shishiyene shiyene. Wakalibonya ukubandika abo makani a bwami bwa Leza kwa mazuba ali makumi one. 4#Lk 24:49Ulimwi nibakaakubungene antoomwi, wakabapa mulawo wakuti, “Mutamuhwi mu Jelusalemu, pele mulindile cipo ceco Taata ncaakamushomezha, ncindakamwaambila kale. 5#Mat 3:11; Mk 1:8; Lk 3:16; Joh 1:33Nkaambo Johani wakapapatiza u meenzhi, pele umwe mulakapapatizwa u Moza Usalala kwakaita mazuba mashoonto bulyo.”
Jeso waya Kwizeulu
6Inzho batumwa nibakaakubungene atoomwi u Jeso, bakamubuzha ati, “Mwami, sa ninzho ukalababweezhezha bwami ba Izilaili?”
7Jeso wakabaambila ati, “Tacili cenu cakuzhiba shiindi nishikaacitika nkaambo shili munsana sha Taata. 8#Mat 28:19; Mk 16:15; Lk 24:47, 48Pele Moza Usalala akeza ali umwe mulakatambula insana, mulaaba bakamboni bangu mu Jelusalemu umu Judiya moonse, ulimwi umu Samaliya, ukumamanino anshi.” 9#Mk 16:19; Lk 24:50, 51Amane kwaamba bobo, wakatolwa kwizeulu boonse balimulanjilile. Ngoonaawo ikumbi lyakabashinkila bakaleka kumubona. 10Inzho kabacilanjile mwizeulu, ndilyona kwakeza balombwana bobile bakaakusamine shisani shituba, beza kuzhima afwaafwi. 11Balombwana babo bakaambila ba shiciiya ati, “Umwe nubantu bamu Galilaya, ncinzhi ncimuzhimine awa ukulyaalala mwizeulu? Wezu Jeso watolwa mwizeulu, ulakeza ulimwi munzhila njiyona njimwamubona ulaya kwizeulu.”
Wakalya Izhina lya Judasi
12Inzho batumwa bakabweela ku Jelusalemu kuhwa ku lupili lwa masamu a Oliva. Mushinzo wakuhwa ku Jelusalemu kuya koko kooli mufwaafwi cini cini.#1:12 Mushinzo wakuhwa ku Jelusalemu kuya koko kooli mufwaafwi cini cini:Wezu kooli mushinzo wakaakuhumunyiwa kweenda mubuzuba bwa Sabata, uleelezhiwa kuba cisela ca maile yomwi. 13#Mat 10:2-4; Mk 3:16-19; Lk 6:14-16Bakenjila mu Jelusalemu, bakaya kuŋanda koko nkubakaakukala. Batumwa baba kabali ba, Pita u Johani, u Jemusi, u Andulu, u Filipo, u Tomasi, u Batolomeyo, u Matayo, u Jemusi mwanakwe Alufayasi, u Saimoni mulondo, u Judasi mwanakwe Jemusi uunji. 14Baba boonse kabalyaabile kukomba ca monzo womwi, antoomwi u Maliya baina Jeso, u banina Jeso u bakaintu bamwi.
15Nikwakaita mazuba mashoonto kwakaba muswaangano wa babo ba bunina mwa Jeso, boonse antoomwi kabatandila kumwaanda u makumi obile. Inzho Pita wakazhimuka 16waamba ati, “Bakwesu, kasheelele kucitika shesho shakaambwa mu maŋwalu shizeeme ku makani aka Judasi. Moza Usalala wakaamba kwiita mwa Devidi, ushaawezo wakasololela babo bakamukwata Jeso. 17Judasi kali umwi wesu, aze kasalilwe kwaamba asebeze antoomwi aswe.” 18#Mat 27:3-8Mali ngakayana Judasi kumulimo wakwe wa cibi ngwaakacita, wakaula muunda. Momo mwaakawila kusolozha mutwi anshi, waanduka efwu, shoonse shamwifwu lyakwe shakahwa shawila anshi. 19Bantu boonse bakala mu Jelusalemu bakaateelele makani aza. Ubobo mucaambo cabo bakaulika muunda wezu ati “Akelidama,” cipandulula ati, “Muunda wabulowa.”
20 # Inte 69:25; Inte 109:8 Inzho Pita wakaamba ati, Cililembelwe mwibuka lya ntembauzho ati,
“Iŋanda yakwe alikabe itongo.
Kutabi muntu ukala mo pe!”
Ulimwi kulilembelwe ati,
“Muntu uunji akabweze busena bwamulimo wakwe!
21 # Mat 3:16; Mk 1:9; Lk 3:21; Mk 16:19; Lk 24:51 “Ubobo atusale muntu unji, akati kababo mbutwaakuli abo ciindi Mwami Jeso naakaakuli aswe. 22Kukancila ciindi Johani naakakambauka makani a lupapatizo kuya kushika kubuzuba nitwakaandaana u Jeso nakatolwa kwizeulu. Nkaambo ulyeelele kupa bumboni antoomwi aswe bwakuti Jeso wakabuka ku bafwu.” 23Ubobo bakanoma mazhina abantu bobile, ba Jozefu waakutewa ati Basabasi ulimwi kaakutewa ati Jasitasi, u Matiyasi. 24Inzho bakakomba ati, “Mwami ulizhi myonzo ya bantu boonse, tutondezhe na nguni abantu baba bobile nguwasala 25kwaamba abweze wezu mulimo wa butumwa mu busena mbwakashiya Judasi ciindi naakaya kubusena bumweelele.” 26Bamane kukomba bakawaala cisolo, inzho wakasalwa ngu Matiyasi. Ubobo wakazunjilwa abatumwa bali ikumi uutwesha womwi.

Currently Selected:

Incito 1: ILL

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy