Johani 10
10
Cikozhano ca Mweembezhi
1Jeso wakaamba ati, “Cini cini ndamwaambila ati, kufwumbwa wezo uutanjilili ku mulyango wa caanda ca mbelele, pele ulaliza u kunjila munzhila iimwi, wezo mutewu ulimwi mufwumpi. 2Wezo unjilila ku mulyango ngu mweembezhi wambelele. 3Mulindizhi waamulyango ulamuyalulila, imbelele shilaliteelela izwi lyakwe. Ulashoompolola mazhina ukushisololela kuya ansengwe. 4Amana kushikusha ulashisololela, asho shilamucilila nkaambo imbelele shililizhi izwi lyakwe. 5Mweenzu tashimucilila, shilamutiya, nkaambo tasheezhi mazwi a beenzu.”
6Jeso wakabaambila cikozhano ceci pele bayina ukaciteelela ncicaamba.
Jeso Mweembezhi Mubotu
7Inzho ulimwi Jeso wakaamba ati, “Cini cini ndime mulyango wambelele. 8Boonse bakantaangunina kushika mbafwumpi ulimwi mbatewu, pele imbelele shiina nishakabateelela. 9Ndime mulyango kufwumbwa uunjila kwiita mwangu ulafwutulwa. Ulaakunjila ukuhwa ansengwe amana ulaakuyana macelelo. 10Mutewu ulezhila bulyo kwiba, u kuyaya ukuzonauna, pele ume ndakezhila kwaamba bantu mbape bumi, abo bumi buzulile.
11“Ndi mweembezhi mubotu. Mweembezhi mubotu ulilibambile kwaabila imbelele bumi bwakwe. 12Musebezhi uhola mali, uutali ngumukamwini imbelele, abona umpe weza kuluma imbelele, ulalukanka washishiya imbelele, ubobo umpe ulashiluma shamana shimwi shilamwaala. 13Ulalukanka nkaambo musebezhi bulyo. Wiina makani iimbelele. 14#Mat 11:27; Lk 10:22Ume ndi mweembezhi mubotu. Ndishizhi imbelele shangu asho shilinzhi. 15Imbelele shangu asho shilinzhi umbona Taata mbweenzhi, ame ndimwizhi Taata. Ulimwi ndilibambile kupa imbelele bumi bwangu. 16Ndikwete ushimwi imbelele shitali mu caanda ceci. Asho ndakashileta, shilakaliteelela izwi lyangu, ubobo bulakaba butanga bomwi, umweembezhi womwi.
17“Taata ulimfwini nkaambo ndaaba bumi bwangu, kwaamba ulimwi nkabutambule. 18Kwiina muntu uukaananga bumi bwangu pe, pele ndakabwaaba ndimwini. Ndikwete insana shakubwaaba ukubutambula ndimwini. Aza ngu malailile ngundakapewa kwa Taata.”
19Kwakaba kwaandaana akati kaba Juda ulimwi ukaambo kamazwi aza. 20Bunji bwabo bakaamba ati, “Wezu muntu ulinjililwe moza mubiyabi, wasondoka. Ngwaanzhi ngumuteelela?” 21Pele bamwi bakaamba ati, “Muntu uunjililwe moza mubiyabi takonzha kwaamba bolya. Sa moza mubiyabi ulakonzha kubonya muntu moofwu?”
Ba Juda Bamukaka Jeso
22Inzho cakashika ciindi ce pobwe lya kusalazha iŋanda ya Leza ku Jelusalemu, muciindi camweto. 23Jeso wakaakweendeenda muŋanda ya Leza, mu busena bwaakutewa ati Iluze lyaka Solomoni. 24Bakando baba Juda bakamubunganina ukumubuzha ati, “Anu ulakalizubulula liliye antangalala kwaamba tutazuluzha linji mu myonzo? Tushimwine naa ndiwe Kilisito?” 25Jeso wakaingula ati, “Ndakamushimwina kale, pele tamushomi. Yezhi milimo njincita mwizhina lya Taata njiipa bumboni. 26Pele umwe tamushomi kaambo tamuli imbelele shangu. 27Imbelele shangu shilaliteelela izwi lyangu ame ndishizhi, asho shilancilila. 28Ume ndashipa bumi butamana. Tashikafwi, ulimwi kwiina muntu uukonzha kunanga pe. 29Nkaambo Taata ncaakampa ncikando kubaala shoonse, ubobo kwiina uukonzha kucikusha mwitashi lyakwe. 30Ume u Taata tuli muntu womwi.”
31Ba Juda bakabweza mabwe kwaamba bamuume. 32Jeso wakabaambila ati, “Ndakamutondezha milimo mibotu minji-minji iihwa kwa Taata. No nguuliye akati ka milimo mibotu yezhi ngumuzanda kungumina mabwe?” 33#Bale 24:16Ba Juda bakamwiingula ati, “Tatukuumini milimo mibotu pe, pele kaambo kakuti ulasampaula Leza. Uwe uli muntu bulyo, wamana ulalibika kuba ukoya Leza.”
34 #
Inte 82:6
Jeso wakabaingula ati, “Sa takulembelwe mu mulawo wenu ati Leza wakaamba ati, ‘Ndaamba ati muli baleza’? 35Na Leza wakabeta ati mbuba leza babo bantu bakaakukananinwa mazwi akwe. Malembe alishinizhe lyoonse. 36Sa mulakonzha kumwaamba wezo Taata ngwakasalazha ukumutuma anshi ati ulasampaula Leza, ukaambo kakuti ndaamba ati Leza ngu Taata? 37Naa nshiciti milimo njaazanda Taata kwaamba njicite, mutanshomi. 38Pele kuti naa ndeecita, nimutanshomi ume yalo bulyo milimo nimweeshoma kwaamba mukonzhe kuzhiba u kuteelelesha, ati Taata uli mulyuume, ame ndili mwa Taata.”
39Ulimwi bakasoleka kumukwata, pele wakabapuzhumuka.
40 #
Joh 1:28
Inzho Jeso wakapiluka ulimwi umutala wa lweenje lwa Joodani, kubusena koko Johani nkwaakaakupapatiza lutaanzhi, amane wakakala koko nkukona. 41Ubobo bantu banji-banji bakeza kwakwe, bakaamba ati, “Johani wiina naakacita citondezho ca nsana, pele shoonse nshaakaamba sha muntu wezu nshini-shini.” 42Koko bantu banji-banji bakamushoma Jeso.
Currently Selected:
Johani 10: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.