1 Timoti 1
1
1Ndime Paulu, mutumwa waka Kilisito Jeso kwiita mu kuzanda kwa Leza Mufwutuli wesu u Jeso Kilisito uli mbubulanjizhi bwesu. 2#Inc 16:1Ndalembela Timoti mwanangusha mu lushomo, Leza Taata u Kilisito Mwami wesu akupe luse u lweenzo u luumuno.
Kucenjezha shaba Maayi Babeshi
3Umbona mbundakakushimwina indakaakuya ku Masedoniya, kushite mu Efesusi kwaamba ubaleshe babo bantu bayiisha injiisho shabubeshi. 4Baambile bataakusowa ciindi cabo kubandika twaano twakutamikizhanya u kwaamba mazhalane a tashimpa, sheshi tacisumpula mulimo wa Leza shilaleta bulyo mizeezo ya bubeshi, kubaala injiisho sha Leza shiletwa u lushomo. 5Muzeezo wamalailile aza ngwa kubusha busha lufwuno luhwa mu monzo usalala u mizeezo mibobu u lushomo lwini lwini. 6Bamwi bantu bakazhimina bakaleka kucilila inzhila shalushomo, bapamine misalo yabulimbushi. 7Balazanda kuba ba maayi ba Mulawo wa Leza, pele tabacizhi ncibaamba, ulimwi tabashiteeleli shintu nshibapandulula.
8Tulizhi ati mulawo mubotu kuti muntu woosebezha bweelele. 9Ceci cilaamba ati tulyeelele kuzhibaluka ati mulawo toopangilwa baluleme, ngwa babo basotoka milawo u bayazhi u babo ba shishibi batezhi Leza umbumi bwabo. Ngwa babo batakombi, bayaya ma ushabo uma nokwabo, bayazhi, 10ba shimamambe, ba shikoona u balombwana nokwabo, batewu ba bantu, babeshi u babo bapa bumboni bwa bubeshi naa babo bacita kufwumbwa cintu cikazhanya injiisho shabushomi bwini bwini. 11Yezhi injiisho ya Makani Mabotu njindakapewa kuhwa kwa Leza mulemu ulimwi ulyeelele kutembaulwa.
Luse lwa Mwami Leza
12Ndamulumba Kilisito Jeso Mwami wesu wakampa insana ukunsala kwaamba musebezele mulimo nkaambo wakambona kushomeka. 13#Inc 8:3; 9:4, 5Nikuba ati limwi ndakaakumusampaula u kumupenzha u kutuka bantu ba Leza, ulimwi ndakaakuli shicisapi. Pele Leza wakamfwila luse nkaambo ndakaakuli muntu wiina ncezhi utashomi. 14Inzho Mwami wesu wakamfwila luse lunji lunji ukumpa lushomo u lufwuno, shalo shiyanwa mulukamantamo u Kilisito Jeso. 15Kaambo keni keni keelele kutambulwa u kushomwa nkukaka; Kilisito Jeso wakeza anshi kwiza kunununa ba shishibi, inzho ume ndime imbabaala kubisha, 16pele ceci ncicakapa kwaamba Leza amfwile luse, kwaamba Kilisito Jeso ansebezhe kuba citondezho cikando ca bu shicamba ku ba shishibi bati bakamushome, kwaamba abo bakatambule bumi butamana. 17Inzho ku Mwami wa shikwense, utafwi, utabonwa, Leza womwi nana, akube insana u bulemu shikwense u shikwense. Ameni.
18Inzho mwanangu Timoti ndakupa malailile aza umbona mbwaakashinshimwa kale kale kukwatilizha uwe, kwaamba naa waacilila, ulakonzha kulwa inkondo imbotu. 19Ukwatishe lushomo u mizeezo iluleme. Bamwi bantu bayina nibakacilila mizeezo yabo iluleme ubobo lushomo lwabo lwakaloba. 20Ali baba kakuli Himeneyusi u Alekizanda, balo babo mbundakasubula indakabaaba kwa Shaatani, ceci cilabayiisha kuleka kusampaula Leza.
Currently Selected:
1 Timoti 1: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.