FILIPI 1
1
FILIPIYAADƐ Ɗɛɛrwol yɔ Pol bi̧i̧s Yeesufɔkya wɔ a Filipi FILIPI 1
1Mii Pol , hi Timɔte, wii bi̧i̧ ɗɛɛrwol yɛrɛ. Wi gi Yeesu Kristu woosyaadɛ ɔ̧ɔ̧nɛ. Wii gi yaasig Bɛt doodɔ, Yeesu Kristu ɗɔbsigya wɔ hi gi a Filipi sɛw, hi Bɛt wooszulyaya̧ hi woosɗaakyaya̧ wɔ. 2An Baa wɛ Bɛto hi Waar wɛ Yeesu Kristu hi gaanɛ gɛmsili hi boolumi!
3An bili mi gin mɔkugo, mi gi baanik Bɛt mi a nɛ zulɛ. 4Nɛɛ sɛw, mi gisin waak Bɛt zɔ̧ki hi hato a mi zɔ̧k du sɛw, 5anyɔ nɛ ta̧a̧ Dɔgl Rɔb bɔ woosɔ, nɛ ɗaasim dɔglɔ dɔko a ɔ̧tyɔ baar gedu gi tuur nɛɛko. 6Mi mɛɛ rɔbtɔnɔ a Bɛt yɔ yɛɛl woos rɔb bɔrɔ a nɛ kpoos du gi gbor wooki gi tuur gi da̧a̧ a Yeesu Kristu wɛɛzigɔ bɔ gedu.
7Gid mi mɔkig anbɔ a mi kpoos du a nɛ zulha sɛw, riiri, mi gin wa̧a̧k mi kpoos du ro ya̧a̧nɛ. Bɛt gɛmsilɔ gi hi miya, an ɓɔryɔ hɛw, yɔ mi gi a luknɔ du, zaabe an yɔ mi gin nɛ zul mi aakil du an mi ka̧d Dɔgl Rɔb bɔ mi wɛɛ mi zuns dood a gi rɔbo hi Bɛt Mɔkilɔ tɛŋkɔ. Nɛɛ sɛw nɛ ɔks hi mii a Bɛt gɛmsilɔ bɔ gaam gedu.
8Bɛt mɛɛ a mi dɔk rɔbo anyɔ mi ta̧a̧ a ha̧a̧m gbɔɔltɔnɔ a nɛɛge sɛw, nɛ ha̧a̧sim an mɛmɛ, anyɔ Yeesu Kristu ha̧a̧tigɔ gi mi kpoos du. 9Zɔ̧kyɔ mi ɛrk a Bɛt ge gɛ: a mi ɛr Bɛto an ha̧a̧tig nɛ gi tɔɔ gi re doosɛ, doosɛ, nɛ kɛm hin bɛttɔnɔ nɛ wɛɛ nɛ mɛɛ dɔgl yɛ̧ɛ̧ki, 10an nɛ her hinyɔ rii gi daarɔ, anbɔ, nɛ gáa a Bɛt muutdu, nɛ taa ginik a̧a̧bi a ɔ̧tyɔ Kristu gɔ gi zaa gi gbaa dɔgl gedu. 11Waabil nɛ gi ɛmb hi woos riitɛ wɔ Yeesu Kristu gi wook hi nɛya hi tɔɔ du gbɔɔltɔnɔ an hi ɗɔbsin Bɛto hi baaninge.
12Nɛɛ yɛ̧ɛ̧dɛ mi wɛ, ha̧a̧m an nɛ mɛɛ bɛttɔnɔ an kosgumn yɔ zɛ̧mi ā̧a̧n Dɔgl Rɔb bɔ gɛ, ɗaa an gi rek doosɛ! 13Ya̧a̧nɛ waar gbɔɔl luk-ookya wɔ hi dood wɔ hi gi dihɛ sɛw hi mɛɛ ɓɔryɔ a mi gi luknɔyayɔ a Kristu dɔŋgo, 14wa̧a̧k mi bɔ a luknɔ du gaa yɛ̧ɛ̧dɛ kit wɔ tɛŋk a kpoos du an hi ɗɔbs Waar Yeesu gi daarɔ hi dɔg Bɛtdɔglɔ hi kpoosya̧ ɓaasigi, hoobhā̧ā̧hi hinza gɛ.
15Hi rɔb ɔnɛ dood zaadɛ hi dɔksig dood zaadɛ Kristu dɔglɔ an hi gɔ ka̧a̧s a mi zulha, zaabe anyɔ ha̧a̧hi hinfaltingo. Wɛɛ zaadɛ be, hi dɔk Kristu dɔglɔ hi kpoosya̧ rɔbo. 16Wɔrɔ hi gɔk hin anbɔ anyɔ ha̧a̧hi a Kristu muulɛ. Hi mɛɛ a Bɛt gaam Dɔglɔ Rɔb bɔ naan du an mi raas dood a Bɛt dɔglɔ gi rɔbo. 17Yɛrɛ dood wɔrɔ hi dɔk Kristu dɔglɔ hi mɔkil ka̧a̧syayɔ, hi dɔ́g hi kpoos gaat gɛ. Hi tɛk an hi tɔɔs ya̧a̧rhant mi a luknɔ du.
18Hin anbɔ labɔ sēem gɛ. An hi dɔg Kristu dɔglɔ an nɔ, an hi dɔk hi mɔkil ha̧a̧lɛ, zaabe hi dɔk hi kpoos rɔbo, Kristu dɔglɔ dɔɔgiy ɔnɛ, mi dag hat gedu. Hɔɔ, yɛrɛ mi wɛɛ mi waas hat daki. 19Ya̧a̧nɛ mi mɛɛ a hin wɔrɔ lab sɛw ya̧a̧rhant mi gɔ gi da̧a̧ sɛw mi zɛm tuusig mi luknɔ du a Bɛtzɔ̧k nɛ bɔ gedu hi ɗaak yɔ Yeesu Kristu Mɔkilɔ bɔ ɗaasim gedu.
20Yɔ anbɔ, kpoos mi ta̧a̧ hinyɔ mi gbaa mɔkil mi hage: a seem taam wa̧a̧k nɛ zaŋ; kin mi za̧a̧ ya, kin mi wɔɔr ya, hinza gɛ. Hin gbɔɔl yɔ daarɔ, gɛ an waak yɔ mi waak muul yɛrɛ duge, mi ɗɔbs Kristu hi kpoos ɓaasigi an ɓɔryɔ zaabe ɔ̧t nuŋg sɛw. 21Ya̧a̧nɛ, minɛ, an mi za̧a̧ko, mi za̧a̧sig Kristu giya, wɛɛ wɔrk yɔ gɔ mi wɔrɔ gisim hingbɔɔlɛ a Kristu yɔ gi za̧a̧tig mi gi dɔŋgo. 22Yɛrɛ gid mi waak za̧a̧tili mi ɗɛɛ an mi wɛɛ mi woowoos rɔb ɓɛ, nɛ mí mɛ̄ɛ̄ hinyɔ gɔ mi her gbun ma gɛ.
23Minɛ mɔkil mi gɛ̧ɛ̧y lɛl eerɛ, ha̧a̧mi an mi ɔɔ waabil yɛrɛ mi rekɔ mi waa hi Kristu, gii bɛr gi daarlɛl gbɔɔltɔnɔ. 24Nɛ yɛrɛ hinyɔ bɛr gi daarɔ a nɛ zulɛ, ɔmi waa kete (an mi gaan tɛŋk a ɗɔbsig du). 25Hɔɔ giibɔ, ya̧a̧nɛ mi mɛɛ bɛttɔnɔ a mí ɗɔɔtɔ mi waa hi nɛɛ sɛw an mi ɗaasinɛ nɛ re doosɛ doosɛ, nɛ dag hato a ɗɔbsig nɛ bɔ gedu. 26Yɔ anbɔ gɔ mi wɛɛ mi wɛɛz a nɛɛge, nɛ dagn gbɔnɔ an nɛ gɔns zul nɛ gbɔlums hi rɔb a mi dɔŋgo a ɔksil nɛ bɔ gedu hi Yeesu Kristu.
27Hin gbunu: ɛmbil nɛ yɛgi bɛr gi riitin hi Kristu Dɔglɔ Rɔb bɔ. Zaabe an mi dag gbɔnɔ mi zaa mi seenɛ, zaabe mi dāg zaak a nɛɛge gɛ, mi kɛm ɔnɛ a hi dɔgl nɛ booko a nɛ waak hi kɔmbil nɛ gbunu hi mɔkil nɛ gbunu, nɛ kɛɛsig Dɔgl Rɔb bɔ ɗɔbsugɔ hi tɛŋko hi kpoos gbunu nɛ gig ka̧dugo. 28Bɔnɛ ɔɔ lɔlhɛ̧ɛ̧niknɛya wɔ hi ha̧a̧sin hoob fɛŋ mɔɔti. Ya̧a̧nɛ hin bɔ lab Bɛt gii gihi zuunik a hi doo wagsigyaadɛyɔ, wɛɛ nɛɛbe nɛ dak za̧a̧tigyɔ.
29Bɛt yɔ gaan gɛmsil an nɛ ɗɔbs Kristu, ɗɔbsig nɛ bɔ gii kpɔd gɛ, gaan gbɔnɔ an nɛ yɔ̧ya̧a̧r a gi dɔŋg be. 30Ya̧a̧nɛ, yɛrɛ ɓɔryɔ nɛ gi ɔksig hi mii a gabs du. Gabs gbuna bɔ gii anyɔ nɛ da nɛ gbɛnim ɛmbiko, yɛrɛ nɛ kɛŋk dɔglɔ gii ma a mi waak ɛmbik gedu te.
Currently Selected:
FILIPI 1: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.