2 KƆRƐŊGTU 1
1
2 KƆRƐŊGTUYAADƐ Ɗɛɛrwol eesum yɔ Pol bi̧i̧s Yeesufɔkya wɔ a Kɔrɛŋgtu 2 KƆRƐŊGTU 1
1Mii Pol , Yeesu Kristu tɔmsɔya anyɔ ha̧a̧ Bɛto, mii bi̧i̧ ɗɛɛrwol yɛrɛ hi yɛ̧ɛ̧ wɛ Timɔte. Wi gi yaasig Yeesu fɔkya wɔ hi gi a Kɔrɛŋgtu, hi Bɛt doodɔ wɔ hi gi a Akaya hɛbt du sɛw. 2An Baa wɛ Bɛto hi Waar wɛ Yeesu Kristu hi gaanɛ gɛmsili hi boolumi! 3Bant gi a Bɛt yɔ gi Waar wɛ Yeesu Kristu Bɛtɔ hi Baatɔ ge, gi Baa wɛ ya̧a̧rmɛɛkya gbɔɔltɔnɔ, gi Bɛt doorɔɔkya faa. 4Giwɛ waak rɔɔk a zɛksil yɔ wɛ gi gedu sɛw, an wɛɛ be wɛ ɗɛɛ dood wɔ hi gi a zɛksil du sɛw rɔɔk hi doo rɔɔk yɔ wɛ dag hi zul wɛ a Bɛt ge be.
5Anyɔ Kristu ya̧a̧rhantɔ kitsiwi, gbunɔ gii wi dak tɛŋk gbɔɔltɔnɔ a Kristu ge be. 6Wi gi ya̧a̧ryɔ̧ko, wi yɔ̧k an Bɛt gi rɔɔnɛ, gi wɛɛ gi za̧a̧sinɛ; Bɛt gi rɔɔwi, rɔɔwi an nɛɛ nɛ dag tɛŋko, nɛ mɔmn ya̧a̧rhant nɛ bɔ an ya̧a̧r winɛ bɔ wi yɔ̧k be.
7Wi gbaas dɔgl nɛ kpoos wi sɛw a Bɛt ge, anyɔ wi mɛɛ a yɔ nɛ ɔks hi wii a ya̧a̧rhant wɔ gedu, gbunɔ gii, nɛ ɔks hi wii a rɔɔk yɔ Bɛt gɔ gi rɔɔwi gedu be. 8Yɛ̧ɛ̧dɛ mi wɛ, hā̧a̧w an zɛksil yɔ zɛ̧w a Àaziya dɔglɔ gi wagin gɛ, wi ha̧a̧ya̧a̧r ha̧a̧ltɔnɔ daar tɛŋk wi daarɔ, wi ha̧s nɛ mɔkil wi gii zaŋ a wi taa za̧a̧ko.
9Wi kɛm a wi kpoos du an dɔgl-gbaak bɔ matiw an wi wɔrɔ. Hin bɔ lab tursiw an bɔwi gbaas zul wi kpoos an wi za̧a̧s zul wi za̧a̧sɔ, gi an wi gbaa a Bɛt yɔ gi rɛmsig wɔrkɛ a wɔrk du ge. 10Bɛt gii za̧a̧siwi, gii gi wɛɛ gi za̧a̧siw a wɔrk zɛksil wɔrɔ lab gedu, gii yɔ wɛ gbaak mɔkil wɛ a ge a gi wɛɛ gi waawɛ za̧a̧sig ɓɛ. 11Nɛɛ hi zul nɛ hɛw gi an nɛ ɗaasiw hi Bɛtzɔ̧ki an dood kittɔnɔ hi baan Bɛt a wi zulɛ a gɛmsil yɔ gɔ gi gaaw gi gisihi ta̧a̧k zɔ̧kya̧ kit wɔ wi zulha gi dɔŋgo.
12Yɛrɛ hinyɔ gi gɔsig zul wi gbɔlumsɛ, gɛ mɔkil wi gisiw raak a ɛmbik yɔ wi ɛmb a waal du, rɔbɔ a nɛ gbaŋgi, wi ɛmb hi gaatigi hi mɔkil rɔbo, Bɛt gii gi wook hinɔ wi kpoos du. Wi ɛmb hi tɛŋk yɔ Bɛt gɛmsilɔ giw gaak giya, wí ɛ̄mb an hinyɔ doo gi gognik hinmɛɛkɔ dubt gɛ.
13Wi taasin hinza dɔɔm bi̧i̧ko, gɛ wi gisin bi̧i̧k hinyɔ nɛ ɗɛɛ zaŋgugo hi hinyɔ nɛ wɛɛ nɛ ɗɛɛ mɛɛko. Mi mɔk a nɛ wɛɛ nɛ mɛɛ hinɔ fɛfɛd, 14anyɔ nɛ mɛɛ bɛrkɔ za a wi gi gbɔlums nɛɛnɛ, an nɛɛ yɔ nɛ gi gbɔlums winɛ be a Waar wɛ Yeesu ɔ̧tɔ bɔ gɔ gi zaa gedu. 15Anyɔ mi mɛɛ hinɔ rɔbtɔnɔ ha̧a̧m nɛ an mi rek a nɛɛge kete an nɛ wɛɛ nɛ dag gɛmsil du dɔɔ eerɛ. 16Ha̧a̧m nɛ an mi daa a nɛɛge ɓɔr mi ɔɔ rek a Makeduniya, gɔ mi wɛɛ mi fu̧u̧z a Makeduniya mi wɛɛ mi daaz a nɛɛge an nɛ ɗaasimi hi hinyɔ gɔ mi ren a Yahuduya.
17Nɛ yɔ ha̧a̧m anbɔ, mɔkil mi gɛ̧ɛ̧y du eer ger ya? Nɛ see a gɔ mi mɔkig hinyɔ gɔ mi woo mi gɔk hinɔ an doo a waaldu ya? Mi gi di bed an mi ta̧a̧ a hɔɔ! mi wɛɛ mi ɔks ɛ̧ɛ̧-ɛ̧ gedu ya? Taa anbɔ. 18Hi rɔb hɛw anyɔ Bɛt gi doo rɔbo, dɔglyɔ wi da wi dɔksinɛ taa hɔɔ, zaabe ɛ̧-ɛ̧. 19Ya̧a̧nɛ Bɛt waawal Yeesu Kristu yɔ wi dɔksin dɔglɔ a nɛ teesdu hi Silas hi Timɔte, taa a hɔɔ, hi zaaɔ du a ɛ̧-ɛ̧; hɔɔ gii gi ɔ̧nɛ faa a ɔksig wɛ bɔ hi Kristu gedu.
20An hinyɔ Bɛt raa a bé woo gi kit nɛ ri ɓɛ, hi gisɛ a hɔɔ a Kristu, ya̧a̧nɛ, wɛ ta̧a̧k a Aanbɔ hi giya wɛ gaak Bɛt gbɔlumsɛ. 21Yɛrɛ Bɛt hi zulɔ gi heriw hi nɛya a za̧a̧tig yɔ ɔksɛ hi Kristu gedu, gi gbààwɛ lɛlɔ sɔm. 22Bɛt gɔ hinza a wɛ muul an hi mɛɛnɛ a wɛ gi dood ɔ̧nɛ, wɛɛ gaawɛ Mɔkilɔ a wɛ kpoos du an wɛ mɛɛn bɛttɔnɔ a wɛ za̧a̧.
23Mi loo Bɛt gii gi kol mi segɔya; mí ya̧a̧gɔ̧ɔ̧ko yɛgi gbɔmi. Mi mɔ̄k an mi za̧a̧sinza̧a̧s ro mí zāā a Kɔrɛŋgtu gɛ. 24Wi tɛ̄b an wi wɛɛ waar a hinyɔ gɔ nɛ ɗɔbs geha gɛ, wi gisin ɗaak an nɛ dag hato anyɔ nɛ erk rɔbtɔnɔ nɛ ɗɔbsig hi kpoos nɛ gbunu.
Currently Selected:
2 KƆRƐŊGTU 1: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.