1 TESALONIKI 1
1
1 TESALONIKYAADƐ Ɗɛɛrwol biitir yɔ Pol bi̧i̧s Yeesufɔkya wɔ a Tesaloniki 1 TESALONIKI 1
1Mii Pol hi Silas hi Timɔte, wi bi̧i̧ ɗɛɛrwol yɛrɛ. Wi yaasig Yeesu fɔkya Tesalonikiyaadɛ ɔksilya̧ yɔ ɔks gbunu hi Baa wɛ Bɛto hi Waar Yeesu Kristu. An Bɛt gi gaanɛ gɛmsili hi boolumi!
2Wi waak Bɛt baanik a nɛ zulha sɛw. Wi waa wi gin mɔkig a wi Bɛt zɔ̧k du. 3Hinyɔ wi mɔk wi mɛɛk a Baa wɛ Bɛt muutdu, gɛ ɗɔbsig nɛ woos bɔ, hi hat nɛ woos bɔ, hi hinmɔŋk yɔ fu̧u̧z a kpoos nɛ gbaak bɔ a Waar wɛ Yeesu Kristu ge.
4Wi mɛɛ, yɛ̧ɛ̧dɛ wi wɛ, a Bɛt ha̧a̧g nɛya, sɛ̧ɛ̧nɛ an nɛ wɛɛsig dood ɔ̧nɛ. 5Yɔ wi dɔgsin nɛ Dɔgl Rɔb bɔ wi dɔ̄gsin hi dɔgl kpɔd gɛ, wi dɔgsin hi Bɛt tɛŋkɔ, hi Bɛt Mɔkil woosɔ, hi kpoos ɓaasigi a dɔgl yɔ gi rɔb wi gisin dɔk dɔŋgɔ ge. Yɔ anbɔ, nɛ mɛɛ waakyɔ wi waa a nɛ teesdu a nɛ zulɛ an wi ɗaasinɛ. 6Nɛɛ nɛ fɔ̀b wiya, nɛ fɔ̀b Waar Yeesu be. Anyɔ nɛ dag ya̧a̧rhant gbɔɔltɔnɔ a Dɔgl Rɔb bɔ gi dɔŋg si̧, nɛ ta̧a̧ge nɛ dag hat yɔ fu̧u̧z a Bɛt Mɔkilɔ ge. 7Yɔ anbɔ nɛ wɛɛs Waar Yeesu fɔkɔya wɔ a Makeduniya hi Akaya sɛw gbɔnɔdorkyaadɛ.
8Yɔ anbɔ, Waar Yeesu dɔglɔ fu̧u̧ nɛ lɛlɛ gi rek a Makeduniya hi Akaya kpɔd gɛ. Bɛt ɗɔbsig nɛ bɔ dɔglɔ rek tuur lɛl sɛw. An ay ɓɛ dood hi mɛɛ dɔglɔ mɛɛ, dɔgl wi taa du ma an wi boo dɔglɔ. 9Yɔ anbɔ, hii hi zulya̧ hi fɔkig a wi zulha dak yɔ nɛ dagiw a nɛ lɛlɛ hi maakwɔd wɔ nɛ ɔɔ, nɛ fɔk Bɛt za̧a̧til rɔb bɔ. Nɛ gisig kɛŋko. 10Nɛ wɛɛ nɛ ook an waaɔ Yeesu yɔ rɛmsig nɛ a wɔrk du gi wɛɛnig za̧a̧tig du gi fu̧u̧z bɛtha gi zaa. Gii giwɛ za̧a̧sig a Bɛt nɔɔtigɔ yɔ gɔ gi zaa dood zulha gedu.
Currently Selected:
1 TESALONIKI 1: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.