Joshuwa 3
3
Baiziraela banotjuluka Jorodani
1Kwakati mu mangwanana makulu Joshuwa ne Baiziraela bose bakafuluka pa bukotokelo gwabo mu Shitimu ngono bakakotokela tjandingeno kwe gwizi gwe Jorodani. 2Ngono kwakati shule kwe mazhuba matatu batungamili bakapalama bukotokelo gose, 3beyenda bedwa bathu beti, “Ha mubona Bhokisi le Tjidumano tja Yahwe Ndzimu wenyu lipinda, lakasengwa nge bapirisiti be Balevi, makafanila kuti mumilike mulisale shule, 4ndiko kwamunowoziba zila yamakafanila tobela ngoti amuthu mukatongo tobela zila iyeyi. Koga mubone kuti kube thambo dzingabhata mazana ali zhanakadzi (900) pakati kwenyu ne Bhokisi le Tjidumano, musitongo sedzela pejosa nalo.”
5Joshuwa kadwa Baiziraela kati, “Muzwitjenapadze ngobe mangwana Yahwe banowothama matjenamiso makulu pakati kwenyu.” 6Ku bapirisiti, Joshuwa kabadwa kati, “Tolani Bhokisi le Tjidumano, mupindile mbeli mutungamile bathu.” Ngono bapirisiti bakatola Bhokisi le Tjidumano bakatungamila bathu.
7Yahwe bakadwa Joshuwa bakati, “Nasi ndowotangisa kukukudza mbeli kwe Baiziraela bose, kuti bazibe kuti, koga sekwa ndakabe na Mushe nawebo ndinawe. 8Ndizoke, budza bapirisiti bakasenga Bhokisi le Tjidumano uti, ‘Amuswika pa ndzibo we vula ye gwizi gwe Jorodani mungine muguli mube muma pakati kwago.’ ” 9Joshuwa kadwa Baiziraela kati, “Sedzelani ngeno muhwe matama a Yahwe Ndzimu wenyu!
10“Ndiko sekwa munowoziba kuti Ndzimu unotjila unamwi kakale unowotatila kutjena Bakanana ne Bahiti ne Bahivi ne Baperizi ne Bagirigashi ne Baamori ne Bajebusi mbeli kwenyu. 11Bonani bapirisiti bakasenga Bhokisi le Tjidumano tja She we shango yose, banowomutungamila kutjuluka Jorodani. 12Ndizoke ngwenu shalulani balume bali gumi lina babili mmwe ne mmwe wabo ali milile ludzi gugwe. 13Ngono kowoti koga makumbo e bapirisiti bakasenga Bhokisi le Tjidumano la Yahwe, She we shango yose etshamba vula ye Jorodani, vula ye Jorodani inowoma kuwunga ngono ika zwibumba ikasala inga phili ye gwizi.”
14Ndizo kwakati bathu befuluka pa bukotokelo kunotjuluka Jorodani, bakabe bakatungamigwa nge bapirisiti bakasenga Bhokisi le Tjidumano. 15Kwakabe kuli tjibaka tjekuvuna, tjibaka mu gole tjinoti gwizi gwe Jorodani gukabe guthwa ne shango. Ngono kwakati koga bapirisiti bakasenga Bhokisi betshamba vula, 16vula ikama kuwunga, ikazwithama phili kutangisa tjose pa nzi nkulu we Adamu wakabapa newe Zarethani, vula yakabe iwungila mu Gungwa le Mwenyu le Araba ikama kuwunga tjoselele. Ndizo bathu bakatjulukila seli kwe Jerikho. 17Bapirisiti bakabe bakasenga Bhokisi le Tjidumano tja Yahwe bakabe bali mile pakati kwe Jorodani ngono pakawoma, kudzina itjaba tjose tje Iziraela tjatjuluka.
Currently Selected:
Joshuwa 3: KBTP
Highlight
Copy
Compare
Share
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
