SALMOS 9
9
Toj bʌ Xmeloñel
1C Yum, mi caj c subeñet wocolix a wʌlʌ ti pejtelel c pusic'al.
Mi caj c sub pejtel ñuc tac bʌ a melbal.
2Tijicña mi caj cubin, mi caj c ñuq'uesan c pusic'al ti a tojlel.
Mi caj j c'ʌyin i ñuclel a c'aba', jatet C'ax Ñuquet Bʌ.
3Che' bʌ tsa' pujquiyob j contrajob
Tsa' yajliyob. Tsa' jiliyob ti a tojlel.
4Come tsa' pʌsʌ ti toj chuqui wolic mel.
Buchulet ti a yumʌntel.
Toj wola' cha'len meloñel.
5Tsa'ix a wʌ'le jini tejclum tac mach bʌ a cha'añobic.
Tsa'ix a jisa jini jontolo' bʌ.
Tsa'ix a junyajlel yʌpbeyob i c'aba'.
6Tsa' jiliyob laj contrajob.
Jejmenix i tejclum tac tsa' bʌ a jisa.
Ma'anix mi' chʌn ña'tʌntelob.
7Lac Yum mi caj i yajñel ti pejtelel ora.
Tsa'ix i chajpa i buchlib cha'an meloñel.
8Toj mi caj i mel jini año' bʌ ti pañimil.
9Lac Yum mi' wen q'uel jini tic'lʌbilo' bʌ.
Lajalʌch lac Yum bajche' melbil bʌ ts'ajc ba' mi mejlel ti ochel jini woli bʌ ti bʌq'uen.
10Pejtel mu' bʌ i cʌñetob mi' yʌc'ob i bʌ ti a wenta.
Come jatet, c Yum, ma'anic tsa' cʌyʌ mi junyajlic jini mu' bʌ i sajcañet.
11C'ʌyinla i ñuclel lac Yum chumul bʌ ti Sion.
Subula i melbal lac Yum ti' tojlel winicob x'ixicob.
12Come Dios mi' q'uextan tsʌnsa.
Mi' ña'tʌben i ch'ich'el jini tsʌnsʌbilo' bʌ.
Ma'anic mi' ñajʌyel ti' pusic'al Dios i yuq'uel jini tic'lʌbilo' bʌ.
13C Yum, pʌsbeñon i yutslel a pusic'al,
Q'uele bajche' woli cubin wocol cha'an woli' ts'a'leñoñob.
Jatet ma' coltañon che' colelix c chʌmel
14Cha'an mic pʌs pejtelel a ñuclel
Ya' ti' ti' jini c'uxbibil bʌ Jerusalén
Che' tijicña c pusic'al cha'an j coltʌntel.
15Jini mach bʌ i cha'añobic Dios tsa' cha' wʌlʌc yajliyob ti jini jach bʌ ch'en tsa' bʌ i lon top'oyob.
Tsa' chujqui i yoc ti yac tsa' bʌ i lon ac'ʌyob.
16Lac Yum mi' tsictesan i bʌ che' mi' cha'len meloñel.
Mi' chujquelob jini jontolo' bʌ ti' melbal i c'ʌb.
Wen ña'tanla.
17Mi caj i chojquelob ochel jini jontolo' bʌ ti' yajñib chʌmeño' bʌ
Yic'ot pejtel colem tejclum tac mu' bʌ i sʌtob Dios ti' pusic'al.
18Anquese p'ump'un jini pobre wʌle, mach ti junyajlelic cʌybil.
Anquese maxto i tajayobic chuqui tac yomob jini tic'lʌbilo' bʌ, mach ti pejtelelic ora mi caj i pijtanob.
19C Yum, pʌsʌ a p'ʌtʌlel ti' tojlel winicob ame mi' cha'leñob bajche' jach yom i bajñel pusic'al.
Wets'eyob tilel ti meloñel jini mach bʌ a cha'añobic ti pejtelel lum.
20C Yum, la' i cha'leñob bʌq'uen.
La' i ña'tañob ti jujumpejt colem tejclum winicob x'ixicob jach.
Poj jumuc' jach añob.
Currently Selected:
SALMOS 9: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.