SALMOS 80
80
La' i cha' tajob i coltʌntel
1Xcʌnta tiñʌme' i cha'an Israel, ñich'tañon.
Tsa'ix a pʌyʌ majlel José che' bajche' tiñʌme'.
Buchuletix ti' t'ejl querubiñob ya' ti chan.
2Pʌsbeñob a p'ʌtʌlel Efraín, yic'ot Benjamín, yic'ot Manasés.
La', coltañon lojon.
3Dios, cha' ch'ejlesʌbeñon lojon c pusic'al.
Pʌsbeñon a wutslel cha'an mij coltʌntel lojon.
4C Yum Dios, i Yum Panchan yic'ot Pañimil,
¿Jayp'ejl to q'uin mich'et? ¿Mu' ba a ts'a'liben i yoración a cha'año' bʌ?
5I ya'lel i wut i wentajlelʌch i waj mu' bʌ a wʌq'ueñob ti jujump'ejl q'uin.
On tsa' wʌq'ueyob i jap i ya'lel i wut.
6Tsa' wʌc'ʌyon lojon ti a'lentel ti' tojlel c pi'ʌlob ti chumtʌl.
Mi' tse'tañon lojon j contrajob.
7I Dioset bʌ Panchan yic'ot Pañimil, cha' ch'ejlesʌbeñon lojon c pusic'al.
Pʌsbeñon a wutslel cha'an mij coltʌntel lojon.
8Tsa'ix a pʌyʌyon lojon loq'uel ti Egipto.
Tsa'ix a chilbeyob i lum yambʌ winicob x'ixicob
Ba' tsa' cha' pʌc'ʌyon lojon che' bajche' ac'.
9Tsa' cholobe i lumil ac'.
Tsi' chucu lum i wi'. Tsa' bujt'i jini lum.
10I yʌxñʌlel jini ac' tsi' moso jini wits.
Cabʌl i xʌc' ac' che' bajche' ñuc bʌ i ch'ujte' Dios.
11I xʌc'tac tsa' coli majlel c'ʌlʌl ti colem ñajb.
I yal tac te' tsa' coli ba'an colem ja'.
12¿Chucoch tsa' jeme jini corral tac?
Come pejtel jini mu' bʌ i ñumelob ya'i mi' tuc'ob i wut.
13Jini mate' chitam mi' c'uxe'.
Jini bʌte'el am bʌ ti jamil mi' c'uxe'.
14I Dioset bʌ Panchan yic'ot Pañimil, la' ba' añon lojon.
Awocolic mij c'ajtibeñet cha' q'uele jini ac'.
La' ti jubel cha'an ma' wʌc'ñan.
15Cʌntan a pʌc'ʌbʌl.
Cʌntan ch'iton bʌ a walobil tsa' bʌ a cosa cha'an ma' pʌs a ñuclel.
16Pulbilix jini ac' ti c'ajc, cholobil.
Mi' jilelob israelob che' ma' tilel a wʌ'leñob.
17Yom ma' cʌntan a winic ti a p'ʌtʌlel,
Yom ma' cʌntan ti a c'ʌb a walobil tsa' bʌ a cosa cha'an mi' pʌs a ñuclel.
18Che' jini ma'anix mi caj c chʌn cʌyet lojon.
Cha' ch'ejlesañon lojon cha'an mic pejcañet lojon ti a c'aba'.
19C Yum Dios, i Yum Panchan yic'ot Pañimil,
Cha' ch'ejlesʌbeñon lojon c pusic'al.
Pʌsbeñon lojon a wutslel cha'an mij coltʌntel lojon.
Currently Selected:
SALMOS 80: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.