SALMOS 71
71
Che' ch'itoñon to c'ʌlʌl mic ñox'an
1C Yum, tsa'ix cʌc'ʌ c bʌ ti a wenta.
Mach a wʌc'on ti quisin.
2Loc'sañon ti' p'ʌtʌlel j contra come tojet. Coloyon ba' ñup'ulon.
Yom ma' p'ison ti a wenta. Coltañon.
3La' c ñochtañet che' bajche' ch'entun ba' mi mejlel c chumtʌl ti pejtelel ora.
Tsa' wʌc'ʌ a t'an. Mi caj a coltañon,
Come p'ʌtʌl bʌ xajlelet c cha'an.
4C Dios, loc'sañon ti' p'ʌtʌlel jini jontolo' bʌ mach bʌ tojobic, mu' bʌ i tic'lañob i pi'ʌlob.
5Wolic pijtañet, c Yum Dios.
Tsac ñopoyet c'ʌlʌl che' ch'itoñon to.
6Tsa' cʌntayon c'ʌlʌl che' cʌntʌbilon to i cha'an c ña'.
Cha'an ti a p'ʌtʌlel tsa' cha' c'oc'a c ña' che' bʌ tsa quila pañimil.
Mi caj c chʌn c'uxbiñet ti pejtelel ora.
7Mi' toj sajtelob i pusic'al cabʌlob cha'añon,
Pero xuc'ulon cha'añet, come c chumlibet.
8Cabʌl mi caj c sub a ñuclel.
C'ux mi cubiñet ti pejtelel q'uin.
9Mach a chocon che' ñoxonix.
Mach a cʌyon che' ma'anix c p'ʌtʌlel.
10Come j contrajob mi' jop'beñon c mul.
Mi' chijtañoñob. Mi' temob i t'an tij contra.
11Mi' yʌlob: Cʌybilix ti Dios ili winic.
Ajñesan, chucux. Ma'anic majqui mi caj i coltan, che'ob.
12Dios, mach a tʌts' a bʌ ba' añon.
C Dios, ti ora jach yom ma' coltañon.
13Ac'ʌyob ti quisin mu' bʌ i contrajiñon. La' jisʌnticob.
La' a'lenticob jini yomo' bʌ i tic'lañon. La' ts'a'lenticob.
14Pero joñon mi caj c pijtañet ti pejtelel ora.
Ñumen mij c'uxbiñet wʌle bajche' ti yambʌ ora. Ñumen to mi caj j c'uxbiñet.
15Ti pejtelel ora mi caj c tsictesañet come tojet.
Wen awujil coltaya. Mach mejlic ti tsicol a melbal.
16C Yum, mi caj c sub jini ñuc tac bʌ a melbal.
Mi caj c chʌn sub a tojel, come jatet jach tojet.
17Dios, cʌntesʌbilon a cha'an c'ʌlʌl che' ch'itoñon to.
C'ʌlʌl wʌle mic sub jini ñuc tac bʌ a melbal.
18Che' ñoxonix, che' sʌquix i tsutsel c jol, Dios, mach a cʌyon
Jinto mij cʌntesan calobilob yic'ot i yalobilob mu' bʌ caj i tilelob cha'an mi' cʌñob a p'ʌtʌlel ti jujuntiquil.
19C'ʌlʌl ti' chañelal panchan tsa'ix a pʌsʌ a bʌ ti toj.
Tsa'ix a pʌsʌ ñuc tac bʌ a melbal, Dios.
¿Majqui to lajal bajche' jatet?
20Anquese tsa'ix a wʌq'ueyon lojon cabʌl tsʌts tac bʌ wocol
Mux a cha' ac'on lojon ti cuxtiyel.
Mux a cha' pʌyon lojon loq'uel ba' bʌbʌq'uen jax.
21Mux a cha' aq'ueñon c ñuclel.
Mux a cha' ñuq'uesʌbeñon c pusic'al.
22Mi caj c sub a ñuclel yic'ot música.
Dios, mi caj c cha'lebeñet c'ay ti arpa cha'an i sujmlel a t'an,
Come jatetʌch jini Ch'ujul Bʌ i cha'an Israel.
23Tijicñayon che' mij c'ʌyibeñet c'ay.
Tijicña c pusic'al cha'an tsa' tojbeyon c mul. Tsa' wʌc'ʌyon ti colel.
24Belel ora mi caj c chʌn sub tojet,
Come jini yomo' bʌ i tic'lañon tsa'ix ajq'uiyob ti quisin.
Tsa'ix toj sajtiyob i pusic'al.
Currently Selected:
SALMOS 71: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.