SALMOS 69
69
Mi' c'ajtin i coltʌntel ti wocol t'an
1Dios, coltañon. Ochemon ti mal ja' yubil.
Bʌbʌq'uen mic chʌmel.
2Woli' ts'u'on ochel jini tam bʌ oc'ol. Ma'anic c t'uchlib.
Ochemon ti tam bʌ ja' mu' bʌ i mujlañon yubil.
3Tsa' lujbayon ti uq'uel. Ma'anix mic chʌn mejlel ti t'an.
Mach c'otix c wut che' mic pijtan c Dios.
4Cabʌlobʌchix mu' bʌ i ts'a'leñon anquese ma'anic c mul.
Ñumen cabʌlob ti tsicol bajche' i tsutsel c jol.
P'ʌtʌlob jini yomo' bʌ i jisañon.
Mi' lon contrajiñoñob. Ma'anic chuqui tsac tumbeyob.
Jini mach bʌ anic tsac xujch'ibeyob wersa mic to'o q'uextʌbeñob.
5Dios, cʌmbil a cha'an c tontojlel.
Mach mucbilic c mul ti a wut.
6C Dios, i Yumet Panchan yic'ot Pañimil.
Mach a wʌc'ob ti quisin cha'an c mul jini mu' bʌ i pijtañetob.
I Dioset Israel. Mach a wʌc'ob ti ts'a'lentel cha'an c mul jini mu' bʌ i sajcañetob.
7Cha'an tsac ñopoyet tsaj cuchu c ts'a'lentel.
Quisintic jax tsa cubi.
8Mach i cʌñʌyonic c pi'ʌlob.
Lajal mi' q'ueloñob bajche' juntiquil ñajt bʌ ch'oyol.
9Jisʌbil c p'ʌtʌlel cha'an bʌxon ti a we'tel ti awotot.
Mi' yʌ'leñon jini mu' bʌ i yʌ'leñet.
10Tsac cha'le uq'uel, tsac cha'le ch'ajb.
Jini cha'an woli cʌ'lentel.
11Mi' ts'e'tañoñob cha'an tsac moso c bʌ ti coxtal cha'an i ch'ijiyemlel c pusic'al.
12Jini año' bʌ i ye'tel ti tejclum mi' p'ajoñob che' mi' tempañob i bʌ.
Jini xyʌc'ʌjelob mi' wajleñoñob ti c'ay.
13Jixcu joñon, c Yum, mic pejcañet ti oración.
Dios, cabʌlʌchix i yutslel a pusic'al.
14Jini cha'an jac'beñon coración come awujil coltaya.
Loc'sañon ti' p'ʌtʌlel jini mu' bʌ i ts'a'leñoñob.
Chucuyon loq'uel ti tam bʌ ja'.
15Mach a wʌc'on ti chʌmel ti but'ja'lel,
Mach a cʌyon ti tam bʌ ja'.
Mach a wʌc'on ti jilel ti mucoñibʌl.
16C Yum, jac'beñon, come cabʌl i yutslel a pusic'al.
Sutq'uin a bʌ ba' añon come cabʌl a c'uxbiya.
17Mach a mʌybeñon a wut come a winicon.
Woliyon ti wocol, jac'beñon ti ora.
18La' ti coltaya. Tojbeñon c mul cha'an mij colel.
Loc'sañon ti' p'ʌtʌlel j contrajob.
19Awujil woli cʌ'lentel. Awujil quisintic jax woli' melbeñoñob. Woli' ts'a'leñoñob.
Cʌmbil a cha'an pejtel j contrajob.
20Wen ch'ijiyem c pusic'al cha'an a'lebilon. Comix chʌmel yubil.
Tsac lon alʌ an majqui mi caj i p'untañon, an majqui mi' ñuq'uesʌbeñon c pusic'al.
Pero ma'anic mi juntiquilic.
21Tsi' yʌq'ueyoñob veneno i wenta i bʌl c ñʌc'.
Che' tiquin c ti' tsi' yʌq'ueyoñob vinagre.
22La' jisʌnticob che' woli' ñaj'añob ti mesa.
La' chujquicob ti yac jini lon ñʌch'ʌlo' bʌ i pusic'al.
23La' yajpic i wut cha'an ma'anic mi' chʌn c'otel.
Yom tsiltsilña i pusic'al ti pejtelel ora.
24Pʌsbeñob a mich'ajel.
Jisañob ti a mich'lel che' bajche' ti c'ajc.
25La' jochtiyic i chumlib. Mach mi' chʌn ajñel winic ya'i.
26Come jontol mi' tic'lañob a winic che' wola' wʌc' ti wocol.
Mi' yutsi p'ojlesʌbeñob i wocol jini lowbilo' bʌ a cha'an.
27La' aq'uenticob ti' wenta i mul.
Mach a q'uelob ti toj ti pejtelel ora.
28La' yajpic i c'aba' ti jun ba' otsʌbilob año' bʌ i cuxtʌlel.
Mach yomic chucbil i c'aba' yic'ot i c'aba' jini tojo' bʌ.
29Pero bʌjʌch c bʌ, cabʌl c wocol.
La' c taj j coltʌntel ti a tojlel.
Cha' xuc'chocobeñon c pusic'al.
30Mi caj j c'ʌyiben i ñuclel Dios.
Mi caj c suben wocolix i yʌlʌ cha'an uts'atax i pusic'al.
31Tijicña mi caj i yubin Dios, come jiñʌch yom bʌ i pusic'al.
Ñumen mi' mulan bajche' yan tac bʌ i majtan anquese tat wacax yic'ot i yal.
32Jini utso' bʌ i pusic'al mi caj i q'uelob. Jini cha'an tijicñayob.
La' cha' p'ʌt'acob i pusic'al jini mu' bʌ i sajcañob Dios.
33Come Dios mi' ñich'tan jini p'ump'uño' bʌ.
Ma'anic mi' ts'a'len jini ñup'ulo' bʌ i cha'an.
34La' i subob i ñuclel Dios pejtelel año' bʌ ti panchan yic'ot pañimil.
La' i pʌs i ñuclel Dios jini ñajb yic'ot pejtel i bʌl.
35Come Dios mi caj i coltan Sion.
Mi caj i cha' wa'chocon jini tejclum tac ti Judá
Cha'an ya' mi' chumtʌlob i winicob x'ixicob.
Ma'anix mi caj i chilbentelob i lum.
36Mi caj i yʌq'uentelob i winicob Dios yic'ot i p'olbal.
Ya' mi caj i yajñelob jini mu' bʌ i c'uxbiñob i c'aba'.
Currently Selected:
SALMOS 69: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.