SALMOS 68
68
Dios tsi' yʌc'ʌ i bʌ ti cʌjñel ti Sinaí yic'ot ti Ch'ujul bʌ Ajñibʌl
1La' tejchic Dios. La' i puc majlel i contrajob.
La' puts'icob jini mu' bʌ i ts'a'leñob.
2Che' bajche' buts' tomocña bʌ mi' majlel, la' majlicob ja'el jini chocbilo' bʌ i cha'an.
Che' bajche' ta'chʌb mu' bʌ i yulmʌl ti c'ajc,
La' jilicob jini jontolo' bʌ ti' tojlel Dios.
3La' i yubiñob tijicña jini tojo' bʌ.
La' ñuc'acob i pusic'al ti' tojlel Dios.
4Yom mi la' c'ʌyiben i ñuclel Dios.
Tsictesanla i ñuclel Dios c'ʌcʌl bʌ mi' ñumel ti tocal.
I c'aba'ʌch lac Yum. La' ñuc'ac la' pusic'al ti' tojlel.
5I Tatʌch jini meba' alʌlob. I yaj Coltaya meba' x'ixicob,
Jini Dios am bʌ ti Ch'ujul bʌ Ajñibʌl.
6Dios mi' yʌq'ueñob i chumlib jini ch'ijiyemo' bʌ.
Mi' yʌc' ti colel jini xcʌjchelob.
Pero jini mach bʌ anic mi' ch'ujbiñob i t'an mi' tajob i yajñib ti tiquin bʌ lum.
7Jatet, Dios, tsa' majliyet ti ñaxan che' bʌ tsa' pʌyʌ majlel a cha'año' bʌ ti colem bʌ i tiquiñal pañimil.
8Tsa' tili yujquel lum.
C'am tsi' cha'le ja'al che' bʌ tsa' pʌsʌ a bʌ.
Jini Sinaí tsi' ñijca i bʌ ti' tojlel Dios, i Dios Israel.
9Jatet Dios tsa' choco tilel ch'ʌnch'ʌña bʌ ja'al.
Tsa' cha' aq'ueyob i ñuclel i pusic'al a cha'año' bʌ che' ch'ijiyemob.
10Ya' mi' chumtʌlob ba' tsa' wʌq'ueyob lum.
Ti a wutslel, Dios, tsa' chajpʌbeyob i bʌl i ñʌc' jini p'ump'uño' bʌ.
11Lac Yum tsi' yʌc'ʌ jini p'ʌtʌl bʌ i t'an.
Bajc'ʌl x'ixicob tsi' pam pucuyob.
12Tsa' puts'iyob majlel jini reyob yic'ot soldadojob.
Jini x'ixicob ti Israel woli' t'oxbeñob i bʌ i majtan tsa' bʌ chilbentiyob i contrajob ti guerra.
13I t'ojolob jax yic'ot i ch'ʌjlib melbil bʌ ti plata yic'ot ti oro.
14Jini Mach bʌ Anic i P'isol i P'ʌtʌlel tsi' pucu majlel reyob che' bajche' i ña'al tsʌñal am bʌ ti wits i c'aba' Salmón.
15I cha'añʌch Dios jini wits i c'aba' Basán am bʌ cabʌl chan tac bʌ i ñi'.
16Dios tsi' yajca jini pec' bʌ Sion cha'an ya' yom chumtʌl ti pejtelel ora.
Jini yan tac bʌ wits ts'a'lebil yilal, come ma'anic tsi' yajca.
17Wen bajc'ʌl jini carreta tac i cha'an Dios.
Lac Yum tsi' cʌyʌ Sinaí wits. Tsa' juli ti Ch'ujul bʌ Ajñibʌl wʌ' ti Sion.
18Tsa'ix letsi ti chan. Tsa'ix i pʌyʌyob majlel jini cʌchʌlo' bʌ.
Tsa'ix i taja i majtan tac cha'an mi' yʌq'ueñob winicob,
Yic'ot jini mu' bʌ i ñusañob i t'an.
Wʌ' mi caj i yajñel lac Yum Dios la quic'ot.
19La' ch'ujutesʌntic lac Yum.
Ti jujump'ejl q'uin mi' ch'ʌmbeñonla laj cuch.
Jiñʌch laj caj Coltaya Dios.
20Jiñʌch Dios mu' bʌ i coltañonla.
Lac Yum Dios mi' yʌc'onla ti loq'uel ba' bʌbʌq'uen mi lac chʌmel.
21Dios mi caj i jisʌbeñob i p'ʌtʌlel i contrajob,
Come mach yomobic i cʌyob i mul.
22Lac Yum tsi' yʌlʌ: Mi caj c cha' pʌy loq'uel la' contrajob ti Basán yic'ot ti tam bʌ ñajb
23Cha'an mi la' jisañob.
Jini ts'i' mi caj i lembeñob i ch'ich'el, che'en.
24I cha'año' bʌ Dios c Rey woliyob ti marcha cha'an tsa' mʌjli i cha'an.
Mi caj i yochelob ti Ch'ujul bʌ Ajñibʌl.
25Ñaxan mi' majlelob jini xc'ayob,
Wi'ilpat jini mu' bʌ i ñijcañob majlel música.
Ya' ti ojlil jini xch'ocob woli' ñijcañob majlel yambʌ música.
26Ya' ba' mi' tempañob i bʌ yom mi la' ch'ujutesan lac Yum Dios,
Jatetla i p'olbalet bʌ la Israel.
27Ya'an Benjamín jini ijts'inil bʌ woli bʌ ti yumʌl.
Ya' añob i yumob Judá ti' tojlel jini tempʌbilo' bʌ.
Ya' añob i yumob Zabulón yic'ot i yumob Neftalí.
28C Dios, aq'ueñon lojon a p'ʌtʌlel.
Xuc'chocoñon lojon, Dios, come a melbalon lojon.
29Talob reyob i yʌq'ueñet a majtan ya' ti a Templo ti Jerusalén.
30Tiq'ui jini j contrajob lojon.
T'uchtan majlel jini mu' bʌ i wersa c'ajtiñob tojoñel.
Pucu majlel jini winicob x'ixicob yomo' bʌ guerra.
31Jini wen chumulo' bʌ ti Egipto mi caj i tilelob.
Jini año' bʌ ti Etiopía mi caj i sʌts'ob i c'ʌb ti ora cha'an mi' yʌq'ueñob Dios i majtan.
32Jatetla añet bʌ la ti' tejclum tac pañimil, yom mi la' c'ʌyin Dios.
C'ʌyibenla i ñuclel.
33Jiñʌch woli bʌ ti xʌmbal ñumel ya' ti panchan tsa' bʌ i mele ti wajali.
Awilan, mi' choc tilel i t'an, jini p'ʌtʌl bʌ i t'an.
34Subula i p'ʌtʌlel Dios,
Mu' bʌ i pʌsben i ñuclel israelob. Mi' pʌs i p'ʌtʌlel ti tocal.
35Bʌbʌq'uen jax Dios mu' bʌ i tsictesan i bʌ ti ch'ujul bʌ i yajñib.
I Dios Israel, jiñʌch mu' bʌ i yʌq'uen winicob x'ixicob i p'ʌtʌlel yic'ot i wersa.
La' ch'ujutesʌntic Dios.
Currently Selected:
SALMOS 68: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.