SALMOS 39
CTUBI
39
Ñumel jach woliyonla ti pañimil
1Tsa cʌlʌ: Mi caj c chʌcʌ cʌntan c bʌ,
Ame lecojic mic cha'len t'an.
Mi caj cotsan freno ti quej,
Che' añon ti' tojlel jini jontolo' bʌ, cho'on.
2Ma'anic tsac cha'le t'an, ñʌch'ʌlon.
Ma'anic tsac taja i ñuq'uesʌntel c pusic'al.
Tsa' utsi p'ojli c ch'ijiyemlel.
3Tsac mele c pusic'al.
Che' bʌ tsac cha'le t'an tic pusic'al tsac wen cha'le pensar.
C'am tsac pejca Dios ti oración:
4C Yum, la' c ña'tan mi caj j cʌy pañimil.
Xñumelon jach ti pañimil.
La' c ña'tan c'uñon jach.
5Ma'anic jayñajb tsa' wʌq'ueyon j q'uiñilel.
Ma'anic cabʌl c jabilel ti a wut.
Ora jach mi' ñumel c jabilel lojon che' bajche' ic' mu' bʌ i loq'uel ti quej.
6Che'ʌch añon lojon bajche' axñal mu' bʌ ti ñumel majlel.
Lolom jach mic mel lojon c pusic'al.
Anquese mic tempan lojon c chubʌ'an, mach cujilic lojon majqui mi caj i ch'ʌm.
7Wʌle, c Yum, ¿chuqui to yom mic pijtan?
Wolic pijtañet.
8Chucuyon loq'uel ti pejtelel c mul.
Mach a wʌc'on ti ts'a'lentel ti' tojlel tonto bʌ.
9Tsaj cʌyʌ c cha'len t'an. Ma'anix mi caw quej,
Come jatet tsa' wʌc'ʌyon ti wocol.
10Mach a chʌn jats'on.
Lujbonix cha'an wola' jats'on ti a c'ʌb yilal.
11Che' ma' wʌq'ueñon lojon c tsico' pusic'al cha'an lojon c mul, ma' ju'sʌbeñon lojon c pusic'al. Ma' jisʌbeñon lojon c t'ojlʌwel.
Lecojon lojon bajche' pisil am bʌ i jo'ch'il.
Che'ʌch añon lojon bajche' ic' woli bʌ ti loq'uel ti quej.
12C Yum, ubibeñon coración, ubibeñon cuq'uel.
Q'uele i ya'lel c wut, mach a ñusañon.
Xñumelon jach ti pañimil, che' bajche' pejtel c ñojte'el.
13Mach a chʌn q'uelon ti a mich'ajel. La' poj ajnicon ti tijicña,
Jinto mij cʌy pañimil, jinto che' mach chʌn tsiquilonix.

© Wycliffe Bible Translators, Inc. All rights reserved.

Learn More about the I T’an Dios