SALMOS 38
38
Mi' sub i mul
1C Yum, mach ma' wʌ'leñon ti a mich'ajel.
Mach ma' ju'sʌbeñon c pusic'al che' mich'et.
2Tsa'ix a jec'beyon c pusic'al che' bajche' ti jalʌjb.
Wola' c'uchye'on jubel ti a c'ʌb.
3Ma'anic i c'oc'lel c bʌc'tal come mich'et.
Ma'anic j c'oc'lel come an c mul.
4Come jini c jontolil tsa'ix i teñeyon jubel.
Yom i c'ʌson che' bajche' al bʌ cuchʌl.
5Mi' tuw'an c tsoy tac. Mi' yoc'mʌl
Cha'an c tontojlel.
6C'uchulon, wen peq'uesʌbilon.
C'ʌlʌl mi' sʌc'an c'ʌlʌl mi' yic'an wen ch'ijiyemon.
7Wen ticʌw jax c pusic'al yubil.
Ma'anic i c'oc'lel c bʌc'tal.
8Wen c'uñucñayon jax. Ma'anix c p'ʌtʌlel.
Ajacñayon, wolic mel c pusic'al.
9C Yum, cʌmbil a cha'an pejtel chuqui tac com.
Mach muculic ti a wut che' mic cha'len ajacñiyel.
10T'ʌlt'ʌlña jax c pusic'al. Tsa'ix jili c p'ʌtʌlel.
Mach c'otix c wut.
11Jini c'uxbibilo' bʌ c cha'an yic'ot j cʌñʌyo' bʌ tsa'ix i cʌyʌyoñob cha'an j c'amʌjel.
Ñajt tsi' tʌts'ʌyob i bʌ c pi'ʌlob.
12Jini yomo' bʌ i tsʌnsañon woli' chajpañob i yac.
Jini yomo' bʌ i tic'lañon woli' temob i t'an cha'an mi' jisañon.
Ti sʌc'ajel c'ʌlʌl ti ic'ajel mi' ña'tañob i tech jontolil.
13Pero lajalon bajche' xcojc. Ma'anic mi cubin.
Lajalon bajche' x'uma' mach bʌ yujilic t'an.
14Isujm, lajaloñʌch bajche' winic mach bʌ anic mi' yubin.
Ma'anic mic letsan c t'an.
15Come wolic pijtañet c Yum.
Mi caj a jac'beñon coración, c Yum Dios.
16Ju'sʌbeñob i pusic'al, cho'on.
Machiqui, mi caj i mʌjlel i cha'añob.
Mi caj i chañ'esañob i bʌ tij contra che' colel c yajlel.
17Come bʌbʌq'uen mic yajlel.
Ma'anic mi' wis lajmel i ch'ijiyemlel c pusic'al.
18Jini cha'an wolic sub c mul.
Wolic mel c pusic'al cha'an c mul.
19Cabʌl ch'ejlo' bʌ mi' contrajiñoñob,
Cabʌl mi' ts'a'leñoñob.
20Mi' sutq'uibeñoñob jontolil ti wen bʌ c melbal.
Mi' contrajiñoñob cha'an com c mel chuqui uts'at.
21C Yum, mach ma' cʌyon.
C Dios, mach ma' tʌts' a bʌ ba' añon.
22Coltañon ti ora,
C Yum, caj Coltayajet c cha'an.
Currently Selected:
SALMOS 38: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.